Orta salmaqta WBA (Super), IBO, WBC jáne IBF tujyrymdary boıynsha álem chempıony qazaqstandyq Gennadıı Golovkın (36-0, 33 KO) qarsylastaryna nelikten syılastyqpen qaraıtynyn, sondaı-aq meksıkalyq Saýl «Kanelo» Alvarespen ótetin jekpe-jegi kelesi jylǵa qalýy múmkin ekendigin málimdedi.
«Bul ómir, al boks – sport. Árkim óz mindetin laıyqty túrde oryndaýy qajet. Men óz jumysymdy jaqsy bilemin. Qarsylastaryma barynsha syılastyqpen qaraýǵa tyrysamyn», – dedi Golovkın CBSsports.com tilshisimen suhbatta.
«Alvarespen ótýi tıis jekpe-jegim jaıly aıtar bolsam, promoýterim Tom Lefflermen sóılestim. Ol Golden Boy (Alvarestiń promoýterlik kompanııasy) ókilderimen baılanysqa shyqqan eken, meksıkalyq boksshynyń taraby tek bir jyldan keıin uıymdastyraıyq degen jaýap beripti. Onymen judyryqtasýǵa ylǵı da daıynmyn. «Kanelo» ekeýimiz jóninde tym kóp jańalyqtar tarap ketipti. Bul týraly keıinirek aıtarmyn. Qazirgi ýaqytta oıymnyń bári Dennıel Djeıkobspen ótetin aıqasym jaıly», – dedi qazaqstandyq boksshy.
Aıta keteıik, Golovkın men Alvares arasyndaǵy jekpe-jek ótken jyly ótýi tıis bolatyn. Biraq qos tarap áli kúnge deıin qarjy máselesinde ortaq ymyraǵa kele almaı júr. 18 naýryzda Gennadıı WBA (Regular) belbeýiniń ıegeri, amerıkalyq Dennıel Djeıkobspen judyryqtassa, «Kanelo» 6 mamyr kúni otandasy kishi Hýlıo Sezar Chavespen qolǵap túıistiredi.