Parlament Senatynda Konstıtýsııalyq zańnama, sot júıesi jáne quqyq qorǵaý organdary komıtetiniń uıymdastyrýymen «Ekonomıkalyq qylmystar jáne zań: yryqtandyrý shekteri» taqyryby boıynsha dóńgelek ústel ótti, dep habarlady osy palatanyń baspasóz qyzmeti.
Komıtet tóraǵasy Serik Aqylbaı dóńgelek ústeldi asha kelip, bul basqosý jedel-izdestirý salasyndaǵy zańnamany odan ári jetildirý máseleleri boıynsha pikir almasýǵa múmkindik beretinin atap ótti. «Jıyn barysynda alaıaqtyq, jalǵan kásipkerlik, salyqtan jaltarý, ekonomıkalyq kontrabanda jáne basqa da máselelerdi retteıtin Qylmystyq kodekstiń baptaryn qarastyrý kerek dep oılaımyz», – dedi senator.
Dóńgelek ústelge qatysýshylar Qylmystyq kodekstegi ekonomıkalyq baǵyttaǵy qylmystardy jasaǵany úshin beriletin jazalardy retteıtin birqatar baptyń tıimdiligin tekserý qajettigi týǵanyn aıtty. Máselen, Qylmystyq kodekstiń 190-babyndaǵy alaıaqtyqpen qatar, qylmystyq zańda alaıaqtyqtyń meılinshe keń taralǵan jáne qoǵamǵa qaýipti túrlerine jaýapkershilik belgileıtin jekelegen quramdardy qarastyrý qajet.
Bas prokýratýranyń málimetteri boıynsha, ondaı túrlerge tanystar nemese týystardyń ótinishteri boıynsha rásimdeletin, azamattardyń jalǵan qujattary paıdalanylǵan nemese senimine ıe bolý arqyly nesıe alýǵa baılanysty alaıaqtyq; ınternet-alaıaqtyq, onyń ishinde qosalqy quraldar, uıaly telefondar jáne basqa da taýarlardyń ınternet saýdasy; jalǵan kompanııalardyń túrli aksııalaryn ótkizý týraly SMS-habarlama jiberý arqyly bolatyn alaıaqtyq jáne basqalar jatady.
Sharaǵa Parlament depýtattary, Bas prokýratýranyń, Joǵarǵy sottyń, Ádilet mınıstrliginiń, Memlekettik qyzmet jáne sybaılas jemqorlyqqa qarsy is-qımyl agenttiginiń, Qarjy mınıstrligi Memlekettik kirister komıtetiniń jáne «Atameken» ulttyq kásipkerler palatasynyń ókilderi qatysty.
Dóńgelek ústel qorytyndysy boıynsha kásipkerler quqyqtaryn qorǵaý salasyndaǵy zańnamany jetildirý jóninde usynystar ázirlenip, olar tıisti memlekettik organdarǵa jiberiletin bolady.