Japonııa úkimeti aǵymdaǵy qarjy jylynyń bıýdjetin tolyqtyrý jóninde sheshim qabyldady. Osy eldiń «Kıodo» agenttiginiń habarlaýynsha, Japonııa úkimeti naýryzdaǵy zilzala men onyń saldarynan bolǵan apattardyń zardaptaryn joıýǵa 4,02 trıllıon ıen (50 mıllıard dollarǵa jýyq) bóldi.
Agenttiktiń atap ótýinshe, 11 naýryzdaǵy 8,9 balldyq joıqyn zilzala Japonııa ekonomıkasyna ekinshi dúnıejúzilik soǵystan keıingi asa zor kólemde shyǵyn keltirip otyr. Al 1995 jyly Honsıý aralynda bolǵan qýatty zilzala zardaptaryn joıý úshin bul el 3,23 trıllıon ıen bólgen edi. Japonııa qarjy mınıstrliginiń málimdeýinshe, memleket qosymsha qundy qaǵazdar shyǵarmaı-aq, zardap shekken aımaqtardy qaıta qalpyna keltire alady.
JARYLYSTAN 16 ADAM OPAT BOLDY
Pákstannyń Karachı qalasyndaǵy qumar oıyn prıtonynyń birinde bolǵan jarylystan 16 adam mert bolyp, 40-qa jýyq adam jaraqat alǵan. Bul týraly «Frans press» agenttigi qalalyq polısııanyń málimetterine silteme jasaý arqyly habarlady.
Paket ishindegi qoldan jasalǵan bomba beısenbi kúni keshkisin jarylǵan. Jarylys kezinde ǵımarat ta aıtarlyqtaı búlingen kórinedi. Jergilikti polısııanyń málimetterine qaraǵanda, bul Rýmmı klýbyndaǵy qumar oıyny zańsyz jumys istep kelgen. Al mekemeniń ózi jergilikti qylmystyq toptardyń menshiginde bolsa kerek. Quqyq qorǵaý organdary jarylystyń jasalýy qylmystyq toptardyń ózara esep aıyrysýlarynan bolǵan degen boljam aıtýda.
OQIǴA SEBEP-SALDARY TEKSERILÝDE
«Vashıngton post» basylymynyń habarlaýynsha, AQSh-tyń federaldy azamattyq avıasııa basqarmasy eldiń birinshi hanymy men vıse-prezıdent ushaqtarynyń áýe keńistiginde ushýy kezinde olarǵa avıadıspetcherler baqylaýdy kúsheıtý týraly sheshim qabyldady.
Azamattyq avıasııa basqarmasynyń osyndaı sheshim qabyldaýyna AQSh prezıdenti Barak Obamanyń zaıyby Mıshel hanymnyń ushaǵy áskerı kólik ushaǵymen soqtyǵysyp qala jazdaǵany sebep bolyp otyr. Bul oqıǵa 18 sáýirde bolǵan. Avıadıspetcherlerdiń qateliginen bolsa kerek, áýe keńistiginde AQSh-tyń birinshi hanymynyń Boıng-737 ushaǵy men S-17 áskerı-kólik ushaǵynyń esepti ara qashyqtyǵy tym jaqyndap ketken. Qazir osy oqys oqıǵanyń sebep-saldary tekserilip jatyr. Buǵan deıin avıadıspetcherler AQSh prezıdentiniń ushaǵy áýege kóterilgen kezde ǵana baqylaýdy kúsheıtilgen rejimde júzege asyryp kelgen eken.
ON JETI JYLDAN SOŃ AQTALDY
Iraktyń burynǵy vıse-premeri Tarık Azızdi osy eldiń Joǵarǵy soty aqtaý týraly úkim shyǵardy. 2009 jyldyń naýryzynda sot ony ólim jazasyna kesken bolatyn.
«Frans press» agenttiginiń aqparattaryna qaraǵanda, 1994 jyly Iraktyń eks-prezıdenti Saddam Hýseınniń jaqtastary retinde Tarık Azızben birge, barlaý qyzmetiniń burynǵy qyzmetkerleri Hadı Hasýnı, Abdýl Hasan ál-Madjıd jáne Farýk Hıdjazıge Iraktyń ejelgi taıpasynyń urpaǵy Baný Tamımdi óltirdi degen aıyp taǵylǵan edi. Al kezinde aty-jónderi atalǵan bul úsheýi ólim jazasyna kesilip, úkim oryndalǵan bolatyn.
MERIIаNYŃ ǴIMARATYN BASYP ALDY
Qyrǵyzstannyń batysyndaǵy Maılysý qalalyq merııasynyń ǵımaratyn 50-den astam adam basyp aldy. Bul aqparatty «AKIpress» agenttigi taratty.
Atalǵan agenttiktiń habarlaýynsha, basyp alǵandar qalanyń burynǵy basshysy, qyzmetinen jaqynda bosatylǵan Turǵynaly Arıpovtiń jaqtastary. Mılısııa qalalyq merııanyń ǵımaratyn basyp alǵandyǵy jónindegi aqparatty joqqa shyǵaryp otyr. Degenmen, jergilikti ákimdik agenttikke 22 sáýirde qala merııasyn T.Arıpovtiń jaqtastary shynynda da basyp alǵandyǵyn habarlaǵan. Al olar qala basshysy Rysbek Yzabekovtiń qyzmet bólmesine kirip alyp, odan oblys gýbernatorymen, Premer-mınıstr Almaz Atambaevpen kezdestirýdi talap etken. Sondaı-aq R.Yzabekovti bólmesinen kúshtep shyǵaryp, onyń ornyna óz jaqtastary T.Arıpovti otyrǵyzǵan.
ÝKRAINANYŃ KEDEN ODAǴYNA KIRGISI JOQ
ITAR-TASS agenttiginiń habarlaýynsha, Ýkraına Keden odaǵyna kirmeıdi. Bul týraly 22 sáýirde eldiń syrtqy ister mınıstri Konstantın Grıshenko parlamentte depýtattardyń suraqtaryna jaýap berýi kezinde málimdegen.
Mınıstrdiń pikirinshe, Ýkraına Keden odaǵymen ózara is-qımyl jasaýy yqtımal. Reseı Ýkraınanyń Keden odaǵyna múshelikke kirý jaǵdaıyn qoıyp otyrǵan joq. Bul másele eki eldiń premer-mınıstrleri N.Azarov pen V.Pýtınniń kezdesýinde de qozǵalǵan. Buǵan Eýrokomıssııanyń basshysy J.M.Barrozýdyń 18 sáýirde Ýkraınaǵa kelgen saparynda eldiń bir ýaqytta eki odaqpen ıntegrasııalanýy múmkin emes, degeni áser etse kerek.
QYSQA QAIYRYP AITQANDA:
Meksıkanyń soltústigindegi Tamaýlıpas shtatynda bir jerde jerlengen adamdardyń múrdeleri taǵy da tabyldy. Búginde olardyń jalpy sany 177-ge jetti.
Vengrııanyń №1 telearnasy ınternetke Adolf Gıtlerdi týǵan kúnimen quttyqtaǵan rolıkti ornalastyrdy. Onda Gıtlerdi «nemis saıasatkeri» dep ataǵan.
Fransııanyń Nant qalasynda alty adamnan turatyn otbasy ushty-kúıli joǵalǵan. Polısııa olardy urlaǵan, odan keıin óltirgen degen joramal jasap otyr.
Lıvııa jańalyqtar agenttiginiń habarlaýynsha, NATO kúshteri Lıvııanyń munaı tankerin basyp alǵan. Tankerde munaı bar, ne joq ekendigi qazirge belgisiz.
Internet materıaldary negizinde ázirlendi.