Ońtústik Qazaqstan oblysyndaǵy aýdan, qalalar arasynda kitap qory jaǵynan kósh bastap turǵan kitaphana bar. Ol Sozaq aýdanynyń ortalyǵy Sholaqqorǵanda ornalasqan aýdandyq ortalyq kitaphana. Mundaǵy kitap qory 400 myń danaǵa jýyqtaıdy. Jáne atalǵan mekemede jıi kezde bermeıtin qundy kitaptardy tabýǵa bolady eken. Bul týraly taıaýda OQO-nyń BAQ ókilderi úshin Sozaq aýdanyna jasalǵan arnaıy press-týr kezinde kórsetilip, aıtyldy, dep habarlaıdy OQO ákimdiginiń baspasóz qyzmeti.
Sholaqqorǵan aýdandyq kitaphanasynda 385 myńnan astam kitap bolsa, olardyń 8500-i qundy kitaptar, ıaǵnı, kóp kezdese bermeıtin týyndylar. Sonaý 1950 jyly jaryqqa shyqqan dúnıeler de qaz-qalpynda saqtalǵan. Kitaphana qyzmetkerleriniń aıtýynsha, munda jylyna 6 myńǵa jýyq kitap turaqty túrde oqyrman qolyna tıedi. Taǵy bir aıta keterligi, aýdandyq kitaphanada sońǵy 32 jyldan beri «Egemen Qazaqstan» («Sosıalıstik Qazaqstan»), «Ońtústik Qazaqstan», «Kazahstanskaıa pravda», «Jas Alash», «Molshylyq úshin», «Teriskeı», «Sozaq úni» gazetteri syndy merzimdi basylymdardyń muraǵaty saqtalǵan. Rýhanı azyq mekeni elimizge tanymal tulǵalar tarapynan joǵary baǵasyn da alyp úlgeripti.
«Bizdiń kitap qorymyz kórkem ádebıetke óte baı. Bizde balalar álem ádebıetiniń barlyq tomy saqtalǵan. Árıne, bul – biz úshin maqtanysh. Sonymen qatar, ensıklopedııalyq, anyqtamalyq, ǵylymı kitaptardyń da túr-túrin taba alasyz. Osydan biraz jyl buryn Saýytbek Ábdirahmanovtyń ózi bir kelgeninde «Pýshkın eńbekteri jáne qazaqsha zertteý» kitabyn osy jerden kórip tań qalǵan. Al jazýshy, qoǵam qaıratkeri Sherhan Murtaza aǵamyz bizdiń kitap qorymyz Astana kitaphanalarymen birdeı dep baǵasyn bergen», - dedi kitaphananyń aqparattyq jáne bıografııalyq qamtamasyz etý bóliminiń basshysy Sáýle Boranshıeva.
Tehnologııanyń qaryshtap damyǵan zamany oqyrman sanyna ózindik salqynyn da tıgizbeı qoımaǵan. Bul turǵyda qyzmetkerler oqyrman qyzyǵýshylyǵyn arttyrý boıynsha turaqty jumystar júrgizip keledi eken.