Bul aksııasynyń ereksheligi sol, týǵan jerinen jyraqta júrgen qaltaly azamattar ózi týyp-ósken aýylyna qaraılasyp, qolynan kelgenshe kómegin kórsetedi. Biri aýylyna mektep, balabaqsha, sport zalyn, emhana salyp berse, endi biri meshit turǵyzady, jol jóndeıdi.
Jaqynda Oralhan Bókeı, Qalıhan Ysqaq syndy qabyrǵaly qalamgerlerdi túletken, túrkiniń tóri, alashtyń ata jurty bolǵan Katonqaraǵaı aýdanynyń ortalyǵy Úlken Naryn aýylynda taǵylymdy shara ótti. «Týǵan jerge - taǵzym» aksııasynyń aıasynda uıymdastyrylǵan ınvestısııalyq forýmda týǵan jerge jany ashıtyn, kindik kesken mekenniń tútini túzý ushsyn dep tileıtin kásipker azamattar bas qosyp, shekara shebindegi aýdannyń túıtkildi máselelerin birlese talqylady. Oılaryn ortaǵa saldy. Aýdan ekonomıkasyn órge bastyrar, jergilikti jurtqa septigin tıgizer degen joba-josparlaryn jarııa etti.
- Elbasymyz bıylǵy Joldaýynda ekonomıkalyq básekelestikti yntalandyrýǵa aıryqsha mán berip, ekonomıkany qarjylandyrýǵa jeke menshik sektordy tartýdyń mańyzdylyǵyn atap kórsetken edi. Bul aksııaǵa kásipkerlerimiz aqshasy tasyǵannan emes, týǵan jerlerine, atamekenge jany ashyǵannan qatysyp, at salysyp jatyr dep túsingenimiz lázim. Aýdanymyzda tuńǵysh ret uıymdastyrylyp otyrǵan ınvestısııalyq forým jergilikti jerdegi áleýmettik máselelerdiń sheshilýine, týrızm salasynyń damýyna tyń serpin beredi dep senemiz, - dedi Katonqaraǵaı aýdanynyń ákimi Ahmetqalı Nurǵojın forýmdy ashqan sózinde.
Forým barysynda aýdan aýmaǵyndaǵy týrıstik nysandar salýǵa, ara sharýashylyǵyn damytýǵa qolaıly jer telimderi kásipkerler nazaryna usynyldy. Katonqaraǵaı memlekettik ulttyq tabıǵı parkiniń bas dırektory Erlan Mustafın park aýmaǵynda ekologııalyq týrızmdi damytýǵa mol múmkindik bar ekenin aıtyp, qaltaly azamattardy ınvestısııa salýǵa shaqyrdy.
Katonqaraǵaıdyń eń túkpirinde, jan jaǵyn qalyń orman qymtaǵan Arshaty degen aýyl bar. Osy aýylda týyp-ósip, búginde Ońtústik Qazaqstan oblysynyń Shymkent qalasynda turyp jatqan Ǵanı Shaımerdenov esimdi kásipker sonaý jerden at arytyp arnaıy kelipti.
-Qazir ózge óńirde turyp jatsaq ta, júregimiz árkez týǵan jer dep soǵady, - dep sózin sabaqtaǵan kásipker 300 oryndyq jazdyq lager salyp beretinin aıtyp, jerlesterin bir jelpindirip tastady.
«Alty aı qystyń azaby, ónimderdiń ótpeýi, órkenıettiń jetpeýi, kedergilerdiń ketpeýi sekildi qıyndyqtar az emes. Taýly aımaq tabıǵatynyń adamdarǵa bereri mol bolǵanymen sony tolyq uqsata almaı kelemiz. О́zimizde óndiris bolmaǵandyqtan barlyq baılyǵymyzdy shıkizattaı saýdalap jiberýge tyrysamyz. Álem órkenıetke bet buryp, aldy týrıstik saparmen aspanǵa ushyp jatqanda aýyldaǵylar aýdan ortalyǵyna áreń jetedi. О́rkenıetti ańsaǵan jastarymyz qalaǵa qashyp, erteńine alańdaǵandar qala mańyna qonys aýdaryp, aýyldarymyz jalańashtanyp bara jatyr».
Forýmda sóz alǵan aýdandyq máslıhat depýtaty Ertaı Keshilbaev áýeli týǵan jerindegi túıtkilderdi tilge tıek etip, sózden iske kóshetin ýaqyttyń jetkenin aıtyp, Katonqaraǵaı aýylynda qańyrap bos turǵan 5 úıdiń birin óz qarjysyna jóndep, iske qosýǵa ýáde berdi.
Tabıǵaty tamyljyǵan tór Altaıdyń bir brendi – álemge áıgili Berel qorǵandary. Alaıda saqtarǵa qonys bolǵan saqı mekendi kelgisi, kórgisi keletin týrısterge tusaý bolyp otyrǵan túıtkilder az emes. Sonyń biri – alystan aryp, ashyp jetken saıahatshylardyń aıaq sýytyp, as ishetin jeriniń joqtyǵy. Berel qoryq-murajaıy dırektorynyń orynbasary Almas Sarbasov osy másele sheshilse, patshalar jazyǵyna keletin týrıster qatary burynǵydan da arta túsetinin aıtyp, bıyl Berel qorǵandaryn tórtkúl dúnıege áıgilegen ataqty arheolog Zeınolla Samashevtiń 70 jasqa tolatynyn, ǵalymnyń qurmetine ǵalym úıin ashsaq degen usynysyn jetkizdi. Onyń aıtýynsha, mundaı ǵalymdar úıi álemniń kóptegen elderinde bar eken. Jumaq meken tór Altaıdyń erteńine alańdaǵan azamattardyń basyn qosqan forým qorytyndysynda quny 1 mlrd.200 mıllıon teńgeniń 50 memorandýmyna qol qoıyldy.
Azamat Qasym,
«Egemen Qazaqstan»
Shyǵys Qazaqstan oblysy
Sýretti túsirgen – Shamıl Bagaýtdınov