Forýmǵa «Egemen Qazaqstan» gazetin ala kelgen oblys ákimi Janseıit Túımebaev qatysýshylar aldynda Prezıdenttiń maqalasynan úzindi oqyp berdi. «Prezıdent maqalasynda jańǵyrý prosesiniń de naqty maqsat-mindetteri, basymdyqtary men oǵan jetkizetin joldary bar ekenin atap ótti. Maqsatqa jetý úshin bizdiń sanamyz isimizden ozyp júrýi, ıaǵnı odan buryn jańǵyryp otyrýy tıis. Bul saıası jáne ekonomıkalyq jańǵyrýlardy tolyqtyryp qana qoımaı, olardyń ózegine aınalatyny aıtylǵan Elbasy maqalasynda. Bolashaqta ulttyń tabysty bolýy onyń tabıǵı baılyǵymen emes, adamdarynyń básekelik qabiletimen aıqyndalady. Maqalada aıtylǵan mańyzdy máselelerdi jas urpaqqa aıta júrińizder, ardagerler arqyly jastardyń qulaǵyna jetsin», dedi oblys basshysy. Sondaı-aq, J.Túımebaev oblys ekonomıkasy men mádenıetin, bilimin damytýda bul tarıhı mańyzdy qujat naqty baǵdar bolýy tıis ekenin jetkizdi. Forýmǵa qatysýshy zııaly qaýym ókilderi men ardagerlerdi Memleket basshysynyń ıdeıalaryn qoldap, ony belsendilikpen júzege asyrýǵa shaqyrdy. Qatysýshylarǵa «Egemen Qazaqstan» gazeti taratyldy.
Basqosý barysynda sóz alǵan oblystyq ardagerler keńesiniń tóraǵasy Jeńisbek Máýlenqulov Elbasynyń bul mańyzdy maqalasynda halyqty tolǵandyryp júrgen máselelerdiń barlyǵy kórinis tapqanyn atap ótti. Jalpy maqalaǵa qatysty pikir bildirýshiler eleýli eńbekte aıtylǵan ultymyzdyń mádenıetin jańǵyrtýdyń jańa qadamdarynyń naqtylanǵanyn, aldaǵy ýaqytta qazaqtyń salt-dástúri, mádenı kody bolashaǵymyzdyń negizgi baǵdary degen tuǵyrnama resmı túrde paıda bolatynyn, al 2018 jyldan bastap elimizde latyn álipbıine kóshý prosesi bastalatynyn qyzý qoldady. Sondaı-aq, ardagerler baǵdarlamanyń jalpyulttyq patrıotızmniń naǵyz ózegine aınalatynyna senimdi.
− Elbasynyń «Bolashaqqa baǵdar: rýhanı jańǵyrý» dep atalatyn bul maqalasyn Joldaý retinde qabyldasaq ta bolady. Tek resmı ataýy ózgeshe. Maqalada ótkenge sholý, búgingini baǵamdaý, keleshekke kóz tastaý bar. Tarıhı mańyzy bar eńbekte elimizdiń barlyq negizgi aspektilerin qamtıtyn dúnıeler aıtylǵan. Osylardyń ishinde aıryqsha eki máseleni atap ótkim keledi. Birinshisi – «Týǵan jer» baǵdarlamasyn usynýy. Rasynda da, keń baıtaq jerimizde qyr-syry beımálim túrli qazynalar men tarlan tulǵalar bar. Memleket basshysynyń osy usynysy mundaı dúnıelerdi keńinen nasıhattaýǵa muryndyq bolar edi. Onyń ústine atalǵan baǵdarlama jalpyulttyq patrıotızmniń naǵyz ózegine aınalady dep otyr. Bul bir jaǵynan jat ıdeologııalardan qorǵanatyn qorǵanymyz bolsa, ekinshi jaǵynan óshkenimiz janyp, joǵalǵanymyzdy túgendeıtin múmkindik. Ekinshisi – «Jahandaǵy zamanaýı qazaqstandyq mádenıet» jobasy. Jobanyń negizgi basymdylyǵy – Qazaqstandy mádenı jaǵynan tanytý. Sonymen qatar, álemdik órkenıet tutynatyn tilderdi ıgerip, dúnıe dúrbeleńinde elimizdiń ózge memleket terezesimen teń turýy. Bul baǵyttaǵy jumystarda nasıhattaýdyń tyń túrlerin taýyp, júıeli jumys jasaıtyn jurtshylyqty jumyldyrý. Biz mundaı ózgeristerge óte beıim halyqpyz. О́ıtkeni Qazaq jerinde talaı mádenıetter toǵysyp, qanshama ulttar uıyǵan. Sondyqtan, men de barsha qazaqstandyqtar, ásirese, jas urpaq jańǵyrý jónindegi osynaý usynystardyń mańyzyn tereń túsinedi degen úmittemin, – dedi maqalaǵa qatysty pikirin bildirgen Shymkent qalalyq ardagerler keńesiniń tóraǵasy Isamýddın Rysbaı.
Forýmǵa qatysýshy 300-den astam ardager aldaǵy ýaqytta Elbasy eńbegin el arasynda nasıhattaýǵa, baıandy bastamalardyń júzege asýyna uıytqy bolýǵa, óz úlesterin qosýǵa nıetti. Bul oraıda ońtústikte 750 bastaýysh uıymy bar ardagerler keńesiniń 222 myńnan astam múshesi keıingi urpaq arasynda nasıhatty kúsheıtpek. Jıyn sońynda oblys pen qalaǵa eńbek sińirgen birqatar ardagerler oblys ákimi J.Túımebaevtyń Alǵys haty jáne Qurmet gramotasymen marapattaldy.
Ǵalymjan ELShIBAI,
«Egemen Qazaqstan»
Ońtústik Qazaqstan oblysy