Oral qalasynda tasqyn sýdan zardap shekken áleýmettik mekemelerdiń biri – qarııalar men múgedekter úıi. Mundaǵy qosymsha ǵımarattarǵa sý kirip, ylǵal tartqandyqtan, adamdardyń turýyna jaramaı qaldy. Sondyqtan olar bas ǵımaratqa yǵystyrylyp, qazir eki adamnyń ornyna tórt adam syǵylysyp kúı keshýde. Bul kórinistiń ózi atalǵan áleýmettik mekemege shuǵyl qosymsha ǵımarat turǵyzý qajettigin kórsetedi.
Osyndaı kúrdeli jaǵdaıda olarǵa alǵash qaıyrymdylyq kómek jasaǵan K.Jaqypov basqaratyn Oral qalasyndaǵy «Qurylysgaz» JShS ujymy. Shara sońynda qarııalar atynan Ǵaısa Sársenbıev óz rızashylyǵyn bylaısha jetkizdi:
– Seksennen asyp, selkildep qalǵan shaǵymyzda bizge kóp nárseniń qajeti joq. Onsyz da biz memleket qamqorlyǵyna bólenip otyrmyz. Degenmen, yqylas, nıet qaı kezde de artyqtyq etpeıdi. Kárımolla baýyrymyz basqaratyn kásiporyn ujymyna sheksiz rızamyz.
Temir QUSAIYN.
Oral.