«Qurmetti ońtústikqazaqstandyqtar!
Sizderdi 1 mamyr – Qazaqstan halqynyń birligi kúni merekesimen shyn júrekten quttyqtaımyn!
Memleket basshysy N.Á.Nazarbaev oblysymyzǵa jasaǵan jumys sapary aıasynda «Qazaq eline myń alǵys!» monýmenti men «Qazaqstan halqy Assambleıasy» ǵımaratynyń ashylý saltanatyna qatysyp, berekeli birligimizdi baıandy etý baǵytyndaǵy baıypty jumystardy maqsatty jalǵastyrýdy tapsyrdy.
Halqymyzda «Baq qaıda barasyń − yntymaqqa baramyn» degen dana sóz bar. Bárimizdiń basty armanymyz − berekeli-baıandy, tatý-tátti ómir súrý. Osy maqsatymyzdyń oıdaǵydaı júzege asýy eń aldymen árbirimizdiń qajyrly eńbegimiz ben elimizdegi ishki saıası turaqtylyqqa, paıymdy parasatymyzǵa baılanysty.
Egemen elimiz búginde berekeli birliktiń mereıli mekenine aınaldy. Qazaqstan halqy Assambleıasynyń shańyraǵyna toptasqan túrli ult ókilderi eldigimizdi tanytar ıgi bastamalardyń barlyǵyna belsendi atsalysýda. Táýelsiz Qazaqstannyń qoǵamdyq kelisimge negizdelgen úılesimdi saıasatyn álemdik qaýymdastyq joǵary baǵalaýda.
Elbasy: «Birligi berekeli, tirligi merekeli, yntymaǵy jarasqan eldiń ǵana yrysy men tabysy mol bolmaq», − dedi. Biz basty baılyǵymyz – qoǵamdaǵy kelisim men tatýlyqty saqtaý isine atsalysýǵa mindettimiz. Ońtústik óńiri bul iste de ózgelerge ónege bolýy tıis.
Qurmetti jerlester!
Kóne tarıh betteriniń qaısysyn paraqtasaq ta halqymyzdyń asyl armandarynyń kósh basynda eń aldymen birlik pen tatýlyq turady. Endeshe, Qazaqstan halqynyń birligi merekesi barsha qazaqstandyqtardyń yntymaǵyn jarastyryp, yrysyn arttyrsyn. Barshańyzǵa amandyq, shańyraqtaryńyzǵa shattyq, otbasylaryńyzǵa baq-bereke, amandyq tileımin!», delingen habarlamada.
Foto: Samat Myrzalıev