Qurmetti otandastar!
Qazaqstan halqy Assambleıasy sizderdi Qazaqstan halqynyń birligi kúni merekesimen shyn júrekten quttyqtaıdy!
Dostyq pen ózara túsinistiktiń nyshanyna aınalǵan bul mereke Qazaqstan qoǵamyndaǵy biriktirýshi faktorlardyń birine aınaldy. Ol – árkimge de qymbat jáne mıllıondaǵan azamattardyń júregine jyly sezim uıalatatyn mereke.
Qazaqstan – mádenıetteriniń, tilderi men dástúrleriniń áralýandyǵy basty baılyǵyna aınalǵan, al azamattary jasampazdyq pen damý ıdeıasy aınalasynda birikken el.
Bıylǵy jyly Qazaqstan Prezıdenti N.Á.Nazarbaevtyń bastamasymen el damýynyń jańa paraǵyn ashatyn jan-jaqty jańǵyrý boıynsha aýqymdy mindetterdi iske asyrý bastaldy.
Olardyń sátti iske asyrylýy qýatty da básekege qabiletti memleket qurýdyń basty sharty – qazaqstandyqtardyń birligi men jumylǵandyǵyn saqtaýǵa tikeleı baılanysty.
Qymbatty dostar!
Bizde halyq birligi kúni shyn máninde de qazaqstandyq patrıotızmniń, óz eline degen súıispenshilik pen oǵan adal berilgendiktiń merekesine aınaldy.
Osy jarqyn mereke kúni Qazaqstan halqy Assambleıasy barsha qazaqstandyqtarǵa myqty densaýlyq, baqyt pen bereke tileıdi! Ol sizderdiń úılerińizge kóptegen qýanysh pen shattyq, al Otanymyzǵa tatýlyq pen órkendeý ákelsin!
Qazaqstan halqy Assambleıasynyń Keńesi
ASTANAdan – Nurlybek DOSYBAI
Qalyń eldi bereke-birlikke bastaıtyn bul kúni elordadaǵy buqaralyq oıyn-saýyq ortalyqtary men qalalyq alańdarda jáne konsert zaldarynda birqatar mádenı-buqaralyq sharalar uıymdastyryldy. Olarǵa qala turǵyndary men qonaqtary qatysyp, merekelik kóńil kúıdi sezinip, kópshilik qýanyshqa kenelip jatty.
Astana qalasy ákimdigine qarasty tıisti vedomstvolar men elordalyq túrli etnomádenı birlestikter ókilderiniń qolǵa alýymen qalyń kópshilik jınalatyn oryndar men alańqaılarda konserttik sharalar ótti. Osynyń ishindegi eń aýqymdysy – «Qazaq Eli» alańy men qalalyq ákimdik aldyndaǵy qalalyq alań bolatyn. Bul jerde otandyq estrada ónerpazdarynyń qatysýymen konserttik baǵdarlamalar uıymdastyryldy. Sonymen qatar, buqaralyq serýenge negizdelip, tańnan keshke deıin jalǵasqan shara aıasynda qaladaǵy etnomádenı birlestikter ókilderiniń ázirleýimen teatrlandyrylǵan túrli qoıylymdar jurtshylyq nazaryna usynyldy. Sondaı-aq, Qazaqstan halqynyń tatýlyǵy men birligin tý etken saltanatty sharalardyń barlyǵy da qalyń kórermendi yrys-yntymaq pen bereke-birlikke úndep, ónerpazdar zor qoshemetke bólendi.
Qazaqstan halqy Assambleıasy sońǵy eki jyldan beri respýblıka boıynsha túrli buqaralyq is-sharalardyń biri retinde qaıyrymdylyq aksııasynyń uıytqysy bolyp kele jatqany belgili. Búginde dástúrge aınalyp úlgergen aıtýly aksııanyń maqsaty – aýyr dertke shaldyqqan jandarǵa qolushyn sozý, qarjylaı kómek kórsetý. Azamattardy baýyrmaldyqqa baýlıtyn qamqorlyq aksııasy aıasynda bul joly uzyndyǵy elý metrge jetetin mol dastarqan jaıyldy. Al dastarqannan san alýan ulttyń túrli taǵamdarynan dám tatýǵa múmkindik boldy. Haltymysh, chapılgısh, bırx, dýk sııaqty cheshen-ıngýsh taǵamdary men koreı salattarynyń túr-túri, ázerbaıjandar usynǵan xamplov, dolma, kebab, lıýlıa-kebab, lavash, gýtab, nemistiń shtrýdeli men krebeli, ózbek pen qaraqalpaqtyń palaýy, polıak xalqynyń bıgýsy, armıandar pisirip alyp kelgen xachapýrı, dolma, lavash, ýkraınnyń varenıkteri, tatardyń bálishi, qystybyı, tatarsha azý, ýchpýchmak pen orama, dúngender jasaǵan laǵman, ganfan, manty, orystardyń bálishteri men quımaqtary, túrikterdiń pıde, laxmandýn, sıgara borek, ıapraksarma, adanakebab pen doner, daǵystan xalqynyń xınkaly, samsasy men chýdýsy, túrikmender alyp kelgen kýtab, chekterme syndy taǵamdar bar.
Qaıyrymdylyq aksııasyn uıymdastyrýshylardyń aıtýynsha, merekelik jıynnan jınalǵan qarajattyń barlyǵy da elordalyq búldirshin Aıymjan Dosjannyń em-domyna jumsalatyn bolady.
Júzden astam ult pen ulystyń basyn qosqan merekelik jıynda árbir ulttyń ulttyq qolóner buıymdary men turmystyq zattar kórmesi de uıymdastyrylǵan edi. О́zderine ǵana tán erekshe ónerleri men ónegeli salt-dástúrlerin qaıta jańǵyrtýdy kózdeıtin mundaı jıynǵa Astana qalasy О́zbek etnomádenı birlestiginiń jetekshisi Sherzod Pýlatovtyń ujymy da belsendi qatysty.
Tús aýa merekelik sharalar legi ulttyq sport túrlerinen saıystarmen jalǵasyn tapty. Atap aıtqanda, arqan tartý men asyq atý, qazaq kúresi men kir tasyn kóterý syndy kúsh synasýdan jeńgen de, jeńilgender syılyq pen marapatqa ıe bolyp jatty.
«Armanym – azamattyq alý. Jaqyn kúnderi oǵan da qol jetkizemin. Sodan soń sóz baılasqan arýmen bas qosyp, elimizdegi yntymaǵy jarasqan otbasylardyń qataryn kóbeıtsem deımin. Altyn asyqtaı ul, kúmis qasyqtaı qyz ósirip, qoǵamdaǵy tatýlyqtyń úlgisin kórsetýdi qalaımyz. Ártúrli ult pen ulystyń ókilderinen quralǵan Otan-Anamyzda bul oıymyzdy iske asyrýǵa tolyq múmkindikter bar», – deıdi azamat.
ALMATYdan – Talǵat SÚIINBAI
Mereke qarsańynda úsh kún, úsh tún úzdiksiz jaýǵan jańbyr halyqty mezi etip, tipti, taýly aımaq turǵyndaryn úreılendirgeni de ras. Kóńili kúpti almatylyqtar 1 Mamyr tańynyń altyn kún nurymen araılanyp atqanyna qýanyp, birden shat-shadymen kúıge endi.
Ádettegideı Abaı alańynan aqtaryla tógilgen áýezdi mýzyka halyqtyń kóńil qoshyn odan beter kóterip jiberdi. Dostyq pen Abaı dańǵyldarynyń buryshyndaǵy Respýblıka saraıynyń aldy – halyq birliginiń merekesin atap ótý úshin tekten-tek tańdalmasa kerek. Almatydaǵy barlyq etnomádenı birlestik búgin osynda bas qosyp, arnaıy otaý tikti. Ulyq mereke dál osy jerden bastaý aldy. Alyp Abaı eskertkishiniń túbinde bizge bergen suhbatynda Qazaqstan halqy Assambleıasynyń múshesi, «Ahyska» túrik etnomádenı birlestiginiń jetekshisi, fılosofııa ǵylymdarynyń doktory, professor Qazaqbaı Qasımov aǵa bylaı dedi:
«Baıqaısyz ba, bıylǵy halyq birliginiń merekesi Elbasymyz Nursultan Nazarbaevtyń «Egemen Qazaqstanda» jarııalanǵan «Bolashaqqa baǵdar: rýhanı jańǵyrý» baǵdarlamalyq maqalasymen tuspa-tus keldi. Maqalada aldaǵy ýaqytta da qazaqstandyq qundylyqtardy nyǵaıtý men ulttyq ıdeologııany jetildire berýge, jalpy ulttyq birlikti nyǵaıtatyn qazaqstandyq patrıotızmge aıryqsha mán berildi. Jyldar jyljyǵan saıyn túrlene túsip, jańa nyshanda ótetin mynaý – bir týdyń astyndaǵy ulttar dostyǵynyń merekesi, mine, sol talaptarǵa naǵyz jaýap qoı dep bilemin.
Almatynyń barlyq segiz aýdanynda bir mezette bastalǵan halyqtar birliginiń merekesi alyp shahardyń bar buryshyn dýmandatyp jiberdi. Dombyranyń únine uıǵyr doırasynyń, koreı daýylpazynyń, ázerbaıjan sybyzǵysynyń únderi qosylyp, kók kúmbezge erekshe saz áýeledi. Qazaqstannyń asa tanymal óner sheberleri men estrada ónerpazdary sahna sánin keltirdi.
«Shańyraqtaǵy» merekelik kross, «Familý» saıabaǵyndaǵy ult taǵamdarynyń baıqaýy, balalar úıinde tárbıelenýshilerdiń konserti, «Mega Parktegi» ár ult ónerpazynyń saıysy halyq birligi merekesine erekshe shyraı berdi. Juldyzdar jamyraǵanda Almatynyń ústine ár tustan otshashý tógildi...
Aqtaýdan – Gúlaıym ShYNTEMIRQYZY
Bul kúngi shara Aqtaý qalasyndaǵy «Máńgilik alaý» men «Astana» alańy arasynda merekelik sherýmen bastaldy. Sherýge qaladaǵy barlyq kásiporyndar men mekemelerdiń, áleýmettik salalardyń, etnomádenı birlestikterdiń ókilderi men jastardan, stýdentterden quralǵan 43 top, ıaǵnı 8 myńǵa jýyq adam qatysty.
«Qazaqstan halqynyń birligi – bizdiń yntymaǵymyzdyń, damýymyzdyń kepili. Táýelsizdik alǵan kúnnen beri qaraı Memleket basshysynyń sarabdal saıasaty arqasynda Qazaqstandaǵy barlyq ult ókilderi el erteńi, urpaq nesibsi úshin birlese eńbek etip, tatý-tátti ómir súrip keledi. Bizdiń bolashaǵymyz, beriktigimiz osy birlikke tyǵyz baılanysty», – dedi Mańǵystaý oblysynyń ákimi Eraly Toǵjanov óz quttyqtaýynda.
Merekemen turǵyndardy Mańǵystaý oblysy boıynsha saılaý komıssııasynyń tóraǵasy E.Kúmisqalı, «Vıdergebýrt» nemis etnomádenı birlestiginiń tóraǵasy S.Martyn jáne «Qazaqstan koreıleri» qaýymdastyǵy Aqtaý qalalyq fılıalynyń tóraıymy R.Mádenova-Hvan quttyqtap, ózara yntymaǵy jarasqan halqymyzǵa birlik, tynyshtyq pen órkendeý tiledi.
Sherý sońy jergilikti ónerpazdardyń konsertine ulasty, konsertpen bir mezgilde uıymdastyrylǵan jármeńkeler men túrli sporttyq saıystar mereke kórigin qyzdyrdy. Aqtaýdaǵy «Jastar» kınoteatrynda «Dostyǵymyz jarasqan» fılmi qazaq jáne orys tilderinde kórsetilse, teńiz jaǵalaýynda shahmat, doıby, toǵyzqumalaq oıyndarynan oblystyq týrnır ótti. Sondaı-aq, qala turǵyndary men qonaqtary arqan tartý, armrestlıng, asyq atý, strıt-vorkaýt oıyndarynan saıysqa túsip, otbasylyq jarystarǵa qatysty.
Aqtóbeden – Temir QUSAIYN
Aqtóbe aımaǵynda bıylǵy jyly Qazaqstan halqynyń birligi kúnine arnalǵan is-sharalar bir apta buryn bastalyp ketti. Mundaǵy túr men mazmunnyń jarasymdylyǵyna, ótkizilgen sharalardyń sanalýandyǵyna eshqandaı baǵa jetpeıdi.
Keshe 1 Mamyr kúni Aqtóbe qalasyndaǵy «Birlik pen kelisim» gúlzarynda «Bir shańyraq astynda» degen taqyryppen keń aýqymdy merekelik baǵdarlama márege jetti. Shat-shadyman sherýge eńbek ujymdary men toqsannan astam etnostyń ókilderi, jalpy sany bes myńnan astam adam qatysty. О́ńirdiń barlyq jurtshylyǵyn Aqtóbe oblysynyń ákimi Berdibek Saparbaev quttyqtap, barlyq tabystar men jetistikterdiń basty kepili – tek turaqtylyq, birlik pen kelisim ekenine ekpin túsirdi. Sodan soń óńir basshysy búgingi mereke Qazaqstan halqy Assambleıasy aıasynda júrekterge jylylyq darytyp otyrǵanyn aıta kelip, aımaqtaǵy etnomádenı birlestikterge óz grantyn tapsyrdy.
Osy sátte oblystaǵy «Oksana» ýkraın ulttyq mádenı birlestigi tóraǵasynyń orynbasary Veronıka Kabachek gazet tilshisine óz tilegin bylaısha jetkizdi:
«Búgingi kúni Assambleıa qyzmeti jańasha mazmunǵa ıe bolyp, barsha qazaqstandyqtardyń tatý-tátti tirshiligin tý etip kótere bastady. Búgingi birlik merekesi kúni de bárimiz Assambleıa aıasynda bas qosyp, qýanysh qushaǵynda turmyz. Dúnıede bári de ótkinshi. Tek dostyq pen birliktiń ǵana ǵumyry uzaq. Osynaý teńdesi joq rýhanı qundylyq ómirimizdiń ózegine, máni men sánine aınala alǵany úshin de ózimizdi baqytty sezinemiz.
1 Mamyr Qazaqstan halqynyń birligi kúnine arnalǵan baǵdarlamalar oblys ortalyǵyndaǵy alty alań men gúlzarlarlarda jáne barlyq aýdandarda ótkizildi. Gazet tilshisine shalǵaıdan habarlasqan Baıǵanın aýdanyndaǵy qoǵamdyq keńestiń tóraǵasy Ibragım Ermekbaev merekeniń mamyrajaı keıpi men mamyr shýaǵy kóńilderdi kókke kótergenin jetkizdi.
Qysqasy, Aqtóbe aımaǵynda ótkizilgen birlik merekesi dostyq pen týysqandyqty taǵy bir márte pash etti.
Atyraýdan – Baqytgúl BABASh
Isataı-Mahambet alańynda «Máńgilik El – Qazaqstan» taqyrybyndaǵy teatrlandyrylǵan qoıylym kópshilik nazaryna usynyldy. Munaıly aımaq turǵyndary men qonaqtaryn oblys ákimi Nurlan Noǵaev quttyqtap, táýelsiz Qazaqstannyń búginge deıin qol jetkizgen tabystary men jetistikterinde elimizdegi barlyq ult ókilderiniń úlesi bar ekenin atap ótti.
«Birlik bar bar jerde, tirlik bar. Qazaqstan halqy Assambleıasynyń sessııasynda Elbasy el birligi beıbitshilik pen turaqtylyqtyń, jasampazdyqtyń negizi ekenin málimdeı otyryp, aldaǵy ýaqytta da rýhanı jańǵyrýda árbir qazaqstandyqtyń el damýyna óz úlesin qosaryna senim bildirgen edi. Qazir Atyraý oblysynyń ózinde 80-nen astam ult ókilderi tatý-tátti turmys keship keledi», – degen aımaq basshysy óńirde júzege asyrylyp jatqan jaqsy ister jaıynda aıtty.
Merekelik sherýde ár ult ókilderi ónerlerin kórsetý arqyly yntymaq pen yrystyń úlgisin pash etti. Al halyq ártisi Roza Rymbaevanyń merekelik konserti saltanatty sharanyń sánin keltirdi. Sondaı-aq, N.Jantórın atyndaǵy oblystyq fılarmonııa ujymy konsert qoıdy. «Almaly.kz» halyqaralyq balalar shyǵarmashylyǵy festıvali de osy kúnge oraılastyryldy.
Atyraý óńirindegi turǵyndar sanynyń 92 paıyzy qazaq ultynyń úlesinde. Buryn 17 etnomádenı birlestik jumys isteıtin, endi olardyń qataryna jańadan «Kýrdyı» atty kúrdterdiń birlestigi qosyldy.
«Aldaǵy ýaqytta qazaqtardyń etnomádenı birlestigi qurylady. Osy uıymdar arqyly árbir ulttyń óz salt-dástúrin, tili men mádenıetin saqtap, nasıhattaýyna múmkindik jasalyp otyr. Taǵy bir jańalyq – oblys ortalyǵynda etnomádenı birlestikter bas qosatyn «Kelisim saraıy» salynady», – deıdi Atyraý oblysy Qazaqstan halqy Assambleıasy tóraǵasynyń orynbasary, hatshylyq meńgerýshisi Gúlmıra Shákirova.
Kókshetaýdan – Asqar TURAPBAIULY
Keshe Aqmola oblysynyń ortalyǵy – Kókshetaý qalasynda Qazaqstan halqynyń birligi kúni merekesi erekshe ataldy. Merekelik shara ádettegideı Abylaı han alańynda ótti.
Jalpy, búgingi tańda Aqmola oblysynda 53 etnomádenı birlestik (aýdandar men Kókshetaý jáne Stepnogor qalalarynda) jumys istep keledi. Jyl basynan beri Aqmola oblystyq Qazaqstan halqy Assambleıasy etnomádenı birlestiktermen birlese etnosaralyq jáne dinaralyq kelisimdi nyǵaıtý jáne ulttyq birlikti qamtamasyz etý maqsatynda oblys ortalyǵy men aýdan-aımaqtarda 360 taqyryptyq sharalar ótkizgendigin aıta ketý kerek.
Oblys ákimi Málik Myrzalın sahna tórinen júrekjardy quttyqtaýyn jetkizdi. Artynan mereke úsh teatrlandyrylǵan bloktan turatyn sharalarǵa ulasty. Atap aıtqanda, «Yntymaǵy jarasqan, týǵan ólkem – Qazaqstan!» horeografııalyq kompozısııasyn «Kókshetaý», «On alty qyz», «Shalqyma», «Sývenır», «Tumar» atty halyq bıi ansamblderi oryndady. Budan keıin «My – býdýshee Kazahstana» teatrlandyrylǵan blok boıynsha «Kókshetaý» MS 200-ge tarta baladan turatyn shyǵarmashylyq ujymy «Beıbitshilik shýaǵy, baqyt shýaǵy» mýzykalyq-horeografııalyq kartınasymen kórermender júregine jol taba bildi.
Elbasynyń birlik pen tatýlyq ornyqqan eldiń jańa álemdegi jańa Qazaqstan bolýy kerektigin uly mindet etip qoıǵan ustanymyn pash etken «Dostyq – bizdiń tiregimiz» atty sońǵy teatrlandyrylǵan blokta merekeniń kórkin qyzdyrǵan ár halyqtyń bıi bılendi. Sońynan solıst Seráli Baıdalıevtiń oryndaýynda jáne barlyq qatysýshylardyń qosylýymen «Qazaqstanym» áni shyrqaldy. Ánniń sońǵy notasynda kókke myńdaǵan shar ushyrylyp, beıbitshilik pen bereke jaılaǵan el ekendigimiz pash etildi.
Qaraǵandydan – Mıras ASAN
Qaraǵandy 1 Mamyr – Qazaqstan halqynyń birligi kúni merekesin erekshe jaǵdaıda atap ótti. Ádettegideı, merekeni meılinshe qyzdyrǵan meken – qaladaǵy ortalyq saıabaq boldy. Onda etnomádenı birlestikterdiń «Birlik shańyraǵy» atty HHII oblystyq festıvali ótti. Atalǵan sharada bir shańyraq astyndaǵy bir atanyń balasyndaı ártúrli ulttar men ulystar kórermender aldynda óz ónerlerin kórsetip, elimizdegi tatýlyq pen turaqtylyqty dáriptedi. Ár aýdan, qalalardan sharalarǵa 28 etnomádenı birlestiktiń 500-ge tarta ónerpazy qatysty.
Aıtýly merekege arnaıy at shaldyrǵan aımaq basshysy Erlan Qoshanov jıylǵan jurtty merekemen quttyqtady.
«Elimiz júıeli jańǵyrý, qoǵamdyq jańarý jolyna tústi. Keshe ǵana Elbasymyz Nursultan Nazarbaevtyń qatysýymen Assambleıa sessııa ótti. Memleket basshysy sol sessııada birlik – baılyǵymyz, turaqtylyq – tuǵyrymyz, jańǵyrý jarqyn jolymyz ekenin atap ótti. Myqty, tabysty, rýhanı baı memleketti tek beıbitshilik pen kelisimde ǵana qurýǵa bolady», – dedi oblys ákimi.
Jalpy, bul kúni shańyraqtaǵy shattyq shartarapqa jaıylyp, sharany ótkizýshiler qala turǵyndary men qonaqtaryna arnap túrli oıyn-saýyq uıymdastyrdy.
Sondaı-aq, buǵan deıin Qaraǵandy oblysynyń ákimi Erlan Qoshanov Qazaqstan halqynyń birligi kúni qarsańynda etnomádenı birlestikterdiń basshylarymen, Qazaqstan halqy Assambleıasynyń múshelerimen kezdesken bolatyn. Dostyq úıinde elimizdi rýhanı jańǵyrtý, birlik pen ultaralyq kelisim týraly sóz qozǵaldy. Shara barysynda oblys ákimi aımaqtaǵy 24 etnomádenı birlestikke 700 myń teńge mólsherinde syıaqy tabystady.
О́z kezeginde is-sharaǵa uıytqy bolǵan Qaraǵandy oblysynyń mádenıet, muraǵattar jáne qujattama basqarmasynyń basshysy Erkebulan Aǵymbaev ta ulttyq til men dástúrdi dáriptep, joǵarydaǵy festıvaldiń bıik deńgeıde ótýine atsalysqan qatysýshylardy dıplomdarmen jáne sertıfıkattarmen marapattady.
Sýretti túsirgen Erlan Omarov, "Egemen Qazaqstan"
Qostanaıdan – Názıra JÁRIMBETOVA
Qazaqstandaǵy birlik keńqoltyq qazaq halqynyń baýyrmaldyǵynan, meımandos adamgershilik qundylyqtardy tý etip ustaıtyn tektiliginen tarap jatqanyn zamannyń daýyly men jaýynyn kórgen aǵa urpaq ókilderi jaqsy biledi. Qostanaı qalasynyń turǵyny Valentına Mıhalsovanyń ata-anasy soǵys jyldary Ýkraınadan Qazaqstanǵa kelgen edi. Qazaqtar olarmen bir tilim nanyn bólip jedi, keýdesinen keri ıtermeı, baýyryna tartty.
«Soǵystan keıin atamekenimizge baraıyq dep, Ýkraınaǵa ketip, jaǵdaıymyz bolmaǵan soń, qaıtyp kelgen otbasymyz. Adamgershilik pen qaıyrymdylyqty qazaqtardan úırený kerek. Qazaqstanǵa bar jaqsylyqty tilep otyramyn», – deıdi merekege shyqqan Valentına Mıhalsova apaı.
Merekege jınalǵandar aldynda oblys ákimi Arhımed Muhambetov qostanaılyqtardy 1 mamyr – Qazaqstan halqynyń birligi kúnimen quttyqtady.
«Qazaqstan Táýelsizdigin alǵan soń, 1 mamyr merekesi tereń mazmunǵa ıe boldy. Elbasy Nursultan Nazarbaev eldiń birligin, halyqtyń dostyǵyn óziniń saıasatynyń negizi dep biledi. Shırek ǵasyrda Qazaqstan álemdik arenada óziniń laıyqty ornyn ala bildi. Ekonomıkamyz qarqyndy damyp keledi. Beıbitshilikti basty baǵyt etken saıasatymyzdy dúnıe júzi biledi. Bizdiń elimizdegi baǵa jetpes baılyǵymyz – birlik, dostyq, tatýlyq. Byltyr barlyq etnomádenı birlestikter birigip, túrli ulttyń 8 balasyn baýyryna basqan Tólegenovter otbasyna úı turǵyzyp berdi, úıi órtengen oralman jas otbasyna Analar keńesi bastama kóterip, úı satyp áperdi. Birlik bar jerde bereke bar, al bereke ylǵı da merekeniń bastaýy ekenine bizdiń eldiń ómiri, Elbasynyń saıasaty kýá», – dedi Arhımed Begejanuly.
1 mamyr merekesine oraı ortalyq alańda konsert, oıyn-saýyq qyzdy, túrli ulystar dastarqanyn jaıdy.
Qyzylordadan – Erjan BAITILES
Birlik pen yntymaqtyń, yrys pen berekeniń merekesin Syr boıyn jaılap jatqan jurtshylyq úlken yqylaspen atap ótti. Aqmeshittegi «Dostyq úıiniń» alańynda Qazaqstan halqynyń birligi merekesine arnalǵan «Bolashaǵy birtutas ult» atty forým uıymdastyryldy. Oǵan aımaq basshysy, oblystyq Qazaqstan halqy Assambleıasynyń tóraǵasy Qyrymbek Kósherbaev, etnomádenı birlestikter músheleri, jastar, qala turǵyndary qatysty.
Merekelik sharany Qyrymbek Eleýuly quttyqtaý sózimen ashty. Ol mamyrajaı meırammen barsha qyzylordalyqty quttyqtady.
«Halqymyzdyń «Yrys aldy – yntymaq» degen qanatty sóziniń astarynda úlken mán bar. El birligi, dostyq pen baýyrmaldyq, beıbit kúnniń, tatýlyqtyń temirqazyǵyndaı eń basty qundylyq – bekem birlik bizdiń baǵa jetpes baılyǵymyz. Elbasymyz Nursultan Nazarbaev aıtqandaı, «Qazirde Qazaq eli – ózindik bet-beınesi bar, ózindik erekshelikteri men ustanymy bar, berekesi men birligi jarasqan tabysty memleket». Biz bir maqsat, bir múdde, bir bolashaq jolyna jumylǵan qýatty elmiz. Elimizdegi qalyptasqan ulttar tutastyǵy men halyq dostyǵynyń arqasynda búginde elimizdiń ekonomıkasy órkendep keledi. Qoǵamda turaqtylyq pen tynyshtyqtyń saqtalýy elimizde demokratııalyq memleket qurýǵa jáne alǵa órleýge zor yqpal etýde. Elbasynyń kóregen saıasatynyń arqasynda búginde 130-dan astam etnos ókilderi bir shańyraq astynda tatý-tátti ómir súrip, birliktiń jarqyn úlgisin kórsetip keledi», – dedi ol.
Shara aıasynda aspanǵa EKSPO-2017, Qýatty Qazaqstan, «Birlik, Yntymaq, Beıbitshilik» degen jazýlary bar lenta baılanǵan shar ushyryldy.
Merekelik shara «Maqsattar birligi – rýh birligi» atty etnomádenı birlestikterdiń óner festıvalimen jalǵasty.
Oraldan – Qazbek QUTTYMURATULY
Bıylǵy 1 mamyr merekesi sonaý bir jyldardaǵydaı eńbek ujymdarynyń merekelik sherýimen bastaldy. Sharany uıymdastyrýshylar Prezıdenttiń «Bolashaqqa baǵdar: rýhanı jańǵyrý» baǵdarlamalyq maqalasyndaǵy «Jańǵyrý ataýly burynǵydaı tarıhı tájirıbe men ulttyq dástúrlerge shekeden qaramaýǵa tıis. Kerisinshe, zamana synynan súrinbeı ótken ozyq dástúrlerdi tabysty jańǵyrýdyń mańyzdy alǵysharttaryna aınaldyra bilý qajet», degen sózin basshylyqqa alsa kerek.
Shynynda da Oral qalasynda túrli salada eńbek etip jatqan qarapaıym jumysshylar men qyzmetkerler osy sherýde qoldaryna Otanymyzdyń Kók týyn, túrli-tústi sharlar men eldi birlikke, yntymaqqa shaqyratyn urandar ustap, halyqtyń aldynan júrip ótti. Jaqynda ǵana jańa ónimin – «Mańǵystaý» atty zymyrandy-artıllerııalyq kemeni tapsyrǵan «Zenıt» zaýytynyń ujymy, óńirdegi eń úlken salyq tóleýshi kompanııanyń biri – «Kondensat» AQ jumysshylary, «Omega» zaýyty, aýyl sharýashylyǵy salasy qyzmetkerleri, áleýmettiń qos qanaty ispettes bilim berý jáne densaýlyq saqtaý salasy qyzmetkerleri – bir sózben aıtqanda, qarapaıym eńbek adamdary halyq aldyna qol ustasa shyǵyp, birlik pen tatýlyqtyń úlgisin kórsetti.
О́ńirdegi 33 etnomádenı birlestik ókilderi túrli ulttyń kıimimen mereke mozaıkasyn tolyqtyra tústi. Bıyl bir ǵasyrlyq toıyn atap ótkeli otyrǵan Batys Qazaqstan oblystyq gazetteri ujymy basylymnyń 100 jyldyq tarıhynda ujymda qyzmet etken tarıhı tulǵalardyń portretterin ustap shyqty.
«Qadirli batysqazaqstandyqtar, qurmetti jerlester, qonaqtar! Búgingi erekshe kún, qasıetti mereke barshamyzǵa qutty bolsyn! Qazir Qazaqstanda jańǵyrý urany kóterilýde. Jańǵyrý úshin biz kúshti bolýymyz kerek. Kúshti bolý úshin bir bolýymyz kerek!», – dedi saltanatty jıynda óńir basshysy Altaı Kólginov.
Saltanatty shara Batys Qazaqstan oblystyq óner ujymdarynyń merekelik konsertimen jalǵasty.
О́skemennen – Azamat QASYM
О́skemenniń turǵyndary 1 mamyr meıramyn qalanyń qaq ortasyndaǵy úlken alańda «Men – Qazaqstannyń patrıotymyn» atty aksııa aıasynda atap ótti. Atalǵan shara sheńberinde shahardaǵy «Qazsınk», «TMK», «Úlbi metallýrgııa zaýyty», «Azııa avto», «Shyǵysenergotreıd», «Jylý júıeleri» syndy kásiporyndar men osyndaǵy barlyq joǵary oqý oryndary men kolledjderdiń, mektepterdiń, bankterdiń, oblystyq basqarmalar men departamentterdiń ujymdary, sportshylar, uzyn sany 10 myńǵa jýyq adam qala kóshelerin jaıaý júrip ótip, ortalyq alańda sap túzedi.
Qyzyldy-jasyldy kıingen óńirdegi túrli etnomádenı birlestik músheleriniń ásem bıinen keıin sahnaǵa aımaq basshysy Danıal Ahmetov kóterilip, oblys jurtshylyǵyn merekemen quttyqtady.
«Birligi men yntymaǵy jarasqan eldiń almaıtyn asýlary joq. Bul – halqyn asqaq arman, uly murattar jolyna nyq senimmen bastap kele jatqan Nursultan Ábishuly Nazarbaevtyń sózi. Tarıhı qysqa ýaqyttyń ózi bul sózdiń aınymas qaǵıda ekenin dáleldep berdi. Jıyrma bes jyldyń ishinde halyqaralyq uıymdardyń bedeldi múshesine aınalǵan Qazaqstan memleketi álem elderine kóp ult ókilderiniń beıbit ómir súrýiniń teńdessiz úlgisin kórsetti. Táýelsiz Qazaqstannyń eń basty baǵa jetpes baılyǵy – jalpyulttyq birlik, beıbitshilik pen kelisim. Turaqtylyq pen kelisim, dostyq pen tatýlyq merekesi qutty bolsyn! Taǵdyry bir, maqsaty ortaq kópultty halqymyzdyń birligi arta bersin», – dedi oblys ákimi.
Budan ary alańdaǵy sharalar legi óńirdiń ónerpazdary men etnomádenı birlestikterdiń kúshimen ázirlengen merekelik konsertpen jalǵasty. Keshke ortalyq alańda «Stýdenttik kóktem-2017» baıqaýynyń gala-konserti ótip, túrli-tústi, mýzykalyq sýburqaq iske qosyldy.
Pavlodardan – Farıda Byqaı
Bıylǵy 1 Mamyr – Qazaqstan halqynyń birligi kúni merekesinde oblys ortalyǵyndaǵy alańda óńirdegi etnomádenı birlestikterdiń qatysýymen «Uly Dalanyń shoq juldyzy» atty sahnalandyrylǵan qoıylym kórsetildi.
Etnomádenı birlestikterdiń dostyq áýenderine Isa Baızaqov atyndaǵy oblystyq fılarmonııanyń konserttik baǵdarlamasy qosylyp, ásem áýenderdi sharyqtatyp, búkil qalany merekelik dýmanǵa bóledi. Kúnniń salqyndyǵy da sezilmeıdi. Ortalyq alańǵa jınalǵan jurtshylyqqa oblys basshylyǵy, soǵys jáne eńbek ardagerleri quttyqtaý sózderin arnaýda.
Al Ertis ózeni jaǵalaýyndaǵy «Shańyraq» atalatyn alańda Almaty, Shymkent, Túrkistan, Qostanaı qalalary sheberleriniń halyqtyń qyzyǵýshylyqtaryn týdyrǵan qoldanbaly óner kórmesi jáne óńirlik sýretshilerdiń sýret jármeńkeleri ótti. «Án-shashý» atty alańda konserttik, «Baldáýren» alańynda balalardyń oıyn-saýyq baǵdarlamalary uıymdastyryldy. Al «Shymyrlar» alańynda sporttyq saıystar jarysy, ulttyq oıyndar kórsetildi.
Jalpy, oblystyq mádenıet basqarmasynyń habaryna qaraǵanda, oblysta mamyr aıyndaǵy merekelerge arnalyp 600-ge tarta mádenı jáne sporttyq is-sharalar josparlanypty. Birlik kúni merekesindegi bir erekshelik – Pavlodar men Aqsý qalalaryn jalǵaıtyn jańa kópir arqyly velosherý ótti. Oblys ákimi B.Baqaýov bastaǵan oblystyq ákimdik qyzmetkerleri bar, jalpy sany 1500-deı adam 30 shaqyrymdyq velomarafonǵa qatysty. Merekelik konserttik baǵdarlama, merekelik saýda, ulttyq jáne sport oıyndary – barlyǵy Birlik kúnine arnaldy. Keń alań tórinde «Dervıshı» toby, Álisher Kárimov, basqa da estarda ónerpazdary Otan, týystyq, dostyq taqyrybynda án shyrqady.
Petropavldan – О́mir ESQALI
Qazaqstan halqynyń birligi kúni merekesin soltústikqazaqstandyqtar joǵary kóńil kúımen atap ótip, Prezıdenttiń uzaq merzimge arnalǵan strategııalyq basym qaǵıdattaryn qoldaıtyndaryn jasampaz eńbek, rýhanı kelisim, patrıottyq sezim arqyly taǵy bir pash etti. Boılaryna ıman uıalap, júzderinen kúlki tógilip, qoǵamdy toptastyrýdyń asyl qundylyqtaryn ár qyrynan tanytsa, onyń áýelgi álqıssasy ortalyq alańnan bastaý aldy. Iin tiresken jurtshylyqty oblys ákimi Qumar Aqsaqalov dostyq, beıbitshilik merekesimen quttyqtap, jyly lebizin arnady. Ol óz sózinde Elbasynyń kópqyrly syndarly saıasaty arqasynda ekonomıkalyq, saıası tabystarmen qatar, rýhanı salada da kúrdeli betburystar jasalǵanyn, etnostardyń tilin, mádenıetin damytýǵa jan-jaqty jaǵdaı týdyrylǵanyn atap ótti.
Merekelik konsertte ár tilde shyrqalǵan ánder, myń buralǵan bıler adamdarǵa erekshe kóńil-kúı syılap, odan beter jaqyndastyra tústi. Alańqaılarda konkýrstar, aksııalar, jármeńkeler uıymdastyrylyp, «Biz – qazaqstandyqtar!» atty qoldanbaly kórme jergilikti óner sheberlerin toptastyrsa, balalardyń teatrlandyrylǵan kórinisi ózindik baǵdarlamamen aıshyqtaldy. Abaı men Pýshkın eskertkishi mańaıynda sporttyq saıystar saıdyń tasyndaı kil kúshtiler jınalsa, Táýelsizdik stellasy aýmaǵynda etnomádenı birlestikterdiń «Birligimiz jarasqan!» atty qoıylymy tamashalandy. «Saǵyndyrǵan ánder-aı!» retro-festıval óz jarasymyn tapty.
Bul mekemede otyzdan astam ınternasıonaldyq otbasy eńbek etedi. Kez kelgen merekeni birigip atap ótedi. Bul kúni aǵa býynnyń ónege-tálimderi nasıhattalyp, jastarǵa úlgi etildi. «Vıdergebýrt» nemis mádenı birlestiginiń tóraıymy Elvıra Kovzel Qazaqstan halqy Assambleıasynyń jýyrda ótken sessııasyna qatysqanyn aıta kelip, alǵan áserlerimen bólisti.
Aımaq basshysy Qumar Aqsaqalovtyń ár aýlada tatýlyq, dostyq dastarqanyn jaıý, úılesimdi sabaqtastyqtardy nasıhattaý týraly bastamasyn alǵashqylardyń qatarynda qalalyq qazaq gımnazııasy qoldap, jınalǵandarǵa dámi til úıiretin ulttyq taǵamdar men sýsyndar usyndy. Konsert uıymdastyrdy.
Qazaqstan halqynyń birligi kúni merekesi aýdandarda da keńinen atap ótildi.
TARAZdan – Hamıt ESAMAN
Qazaqstan halqynyń birligi kúni merekesi kóne Taraz shaharynda da ózindik saltanatpen atalyp ótti. «Kóne Taraz» tarıhı-mádenı kesheninde «Bir shańyraq astynda» atty merekelik-kópshilik is-shara uıymdastyrylyp, oǵan qala turǵyndary men qonaqtary kóptep qatysty. Keshen aýmaǵynda ornalasqan Jambyl Jabaev eskertkishiniń sol jaǵyna aıtýly kúnge oraı 12 shatyr tigilip, onda óńirde turatyn túrli ult ókilderiniń merekelik baǵdarlamalary turǵyndar nazaryna usynyldy. Olardy oblys ákimi Kárim Kókirekbaev kelip tamashalady. Budan keıin oblys basshysy jınalǵan kópshilikti Qazaqstan halqynyń birligi kúnimen quttyqtady.
«Birligi berekeli, tirligi merekeli, yntymaǵy jarasqan eldiń ǵana yrysy men tabysy mol bolmaq. Ortaq shańyraǵymyzdyń astynda tynyshtyq pen kelisim máńgi ornasyn! Beıbit ómirdiń berekesi arta bersin! Elimiz aman bolsyn! Eldigimiz baıandy bolsyn! Máńgilik Qazaqstan – Máńgilik El bolsyn», – dedi óńir basshysy óz sózinde.
Merekelik is-shara barysynda etnomádenı birlestikterdiń, oblystyq fılarmonııa ónerpazdarynyń konserttik baǵdarlamalary men túrli taqyryptaǵy teatrlandyrylǵan qoıylymdar kópshilik nazaryna usynyldy. «Lavka sladosteı» atty túrli ult ókilderiniń tátti taǵamdary men qolóner sheberleriniń kórmesi kópshilikke jol tartty.
Sonymen qatar, kishkentaı balalarǵa jáne sýretke túsýshilerge arnalǵan úlken qýyrshaqtardyń serýenderi, jasóspirimder úshin «Bilimdiler alańy» atty suraq-jaýap oıyndary, jastarǵa arnalǵan breık-dans festıvali men jastardyń merekelik fleshmoby da laıyqty deńgeıde ótti. Al qyrǵyz ultynyń «Quryq ilý», tatar-bashqurttardyń «Jastyqpen uryp qulatý», tájik ultynyń «Kýrash», orystardyń «Baǵanaǵa shyǵý» jáne qazaq ultynyń «Qoı kóterý» oıyndary da kópshiliktiń qyzyǵýshylyǵyn týǵyzyp, merekeniń sán-saltanatyn asha tústi.
Taldyqorǵannan – Nurbol ÁLDIBAEV
Bul kúni Taldyqorǵannyń tóbesin torǵyn bulttar torlaǵanymen, túrli etnostardyń kóńilderi shat, júzderi jarqyn. Ertelete qalanyń soltústik-batysyndaǵy «Jastar» saıabaǵyn betke alǵan el ara-tura sebelegen jaýyndy da eler emes. Saıabaq tórinde ornatylǵan daýys zoraıtqyshtan shyqqan ásem án áýeleı kóterilip, kóńil hoshyn kóterýde.
Jetisýlyq qolóner sheberleriniń tól týyndylary da birinen ekinshisi asyp tur. Kórgen jannyń kózin toıdyra óńirdiń tamasha tabıǵatyn, san alýan ereksheligin pash etedi.
Merekelik sharany Taldyqorǵan qalasynyń ákimi Baǵdat Qarasaev ashyp, jetisýlyqtardy 1 mamyr – Qazaqstan halqynyń birligi kúni merekesimen quttyqtaǵan soń, Súıinbaı atyndaǵy obystyq fılormonııa ónerpazdaryna kezek tıdi. Qazaqstanda turatyn túrli etnos ókilderiniń ánderi shyrqalyp, án arasynda ulttardy quttyqtaý sózderi retimen aıtylyp, ózindik úılesim taýyp otyrdy.
Almaty – Taldyqorǵan kúrejolynyń boıyndaǵy sport alańynda sporttyń san túrinen de básekeler ótip jatty. Bulshyq etteri bult-bult oınaǵan sportshylar kir tastaryn urshyqsha úıirip, eldi tánti etti.
Sóıtip, Taldyqorǵan tórinde de qalyptasqan dástúr saqtalyp, halyq shadyman-shattyqqa bólendi.
ShYMKENTten – Ǵalymjan ELShIBAI
Ulysymnyń uıytqysy atanǵan Ońtústik turǵyndary men qonaqtary 1 mamyr – Qazaqstan halqynyń birligi kúni meıramynda Ál-Farabı alańyna aǵyldy. Elimizdiń basty merekeleriniń birin toılaýǵa kelgen jurtshylyqty yntymaǵy jarasqan túrli etnos ókilderiniń besik terbetken analary «Aq kógershin» ánimen qarsy aldy. Olarǵa qoldaryna aq kógershinderi bar búldirshinder qosyla shyrqady. Áserli kompozızııa sońynda beıbitshiliktiktiń belgisindeı bolǵan qustar kókke samǵady... Alańǵa «Máńgilik El» beınesinde EKSPO-2017 emblemasymen bezendirilgen mashına shyǵaryldy. Altyn adam kıimindegi salt attylar sherýi men elimizde turatyn túrli ult pen ulys ókilderi Kók týdyń mańyna toptasty. Bul – bekem birligimizdiń belgisi!
Merekelik sharaǵa qatysqan oblys ákimi J.Túımebaev ońtústikqazaqstandyqtardy Birlik merekesimen quttyqtady.
«Halqymyzda «Baq qaıda barasyń – yntymaqqa baramyn» degen dana sóz bar. Eldik bolmysymyzǵa tán bul uǵymdy táýelsizdiktiń tuǵyrly, memlekettiń ǵumyrly bolýyna ózek ettik. Birlikti basty baılyǵymyz – Táýelsizdiktiń arqaýy etip aıshyqtadyq. Elbasymyz usynǵan jol, jurt bolyp jumyla ustanǵan saıasat shırek ǵasyrda jemisti nátıjesin berdi. Búgingi Qazaqstan birligi bekem, tirligi kelisken, yntymaǵy jarasqan elge aınaldy. Jetken jetistikterimiz ben alǵan asýlarymyz az emes. Búgin biz Uly Dalanyń ulaǵatymen Máńgilik El qurýǵa qadam bastyq. Kún saıyn qubylǵan zamananyń ıirimine tótep beretin qýatty memleketti jasaqtaýdyń qamyna kiristik. Eleýli ózgerister qoǵamnyń barlyq salasyn qamtyp otyr. Jalpyulttyq jańǵyrý saıası-ekonomıkalyq salalarmen qatar, azamattyq sanaǵa da serpilis alyp kelmek», – dedi J.Túımebaev.
Saltanatty jıynda aımaq basshysy eldegi etnosaralyq tatýlyq pen qoǵamdyq-saıası turaqtylyqty saqtaýǵa súbeli úles qosqan 18 etnomádenı birlestikke oblys ákiminiń «Baýyrmal» syılyǵy men birqatar azamatqa oblys ákiminiń Qurmet gramotasyn tabystady.
Shattyqqa toly shyraıly Shymkent tórinde «Ońtústik Sırk» ónerpazdary at ústindegi ónerlerin kórsetti. Dostyq sıýıtasy oryndaldy. Sahna men alańǵa ornalasqan horeograftar «Máńgilik El úshin!» ánin shyrqady. Merekelik shara sońy oblystyq etnomádenı birlestik ókilderiniń konserttik baǵdarlamasyna ulasty.
Sýretti túsirgen Temir Qusaıyn