Bir shańyraq astynda birneshe ult ókili berekeli tirlik keship keledi

Adal eńbek, yntymaq pen birliktiń almaıtyn asýy, jeńbeıtin qıyndyǵy joq. Osy qundylyqtar ómirdiń ózegine aınalǵanda ǵana elimizdiń órkendeýindegi belester bıikteı bermek. Al, otbasy  shaǵyn memleket desek, osyndaı mamyrajaı túsinistik qajettigi basy ashyq áńgime. Otbasyndaǵy shańy­raqty shalqytyp, ómirlerin izgilikpen órip, ultyna qaramastan, syılastyqtyń jibek jibin jalǵaǵandar qatary qanshama deseńizshi! Oraz Jandosov kóshesindegi № 8 úıdiń shańyraǵyna kelgende aýlasyn rettestirip, bir sát damyldaǵan azamat qaýyzyn ashý­ǵa «talpynǵan» qyzǵaldaqqa kóz tige qalypty. Aınala muntazdaı. Rettiliktiń lebi esedi. Bizdi jady­raı qarsy aldy. Amandyqtan soń, kelgen maqsatymyzdy túsindirdik. – Bárekeldi! Bul úı Qazaq­stan­daǵy kóp ulttyń basyn biriktirgen qasıetti shańyraqtar qatarynan. Tipti, qansha ult ekenimizdi sanamappyz da. Biraq  má­­se­le sonda ma eken. Jeń­ge­le­riń Raıhan ózbek, kelinderim Natalıa orys, Elena uıǵyr qyz­da­ry. Quda-jekjattar da ózge ult­tar­dyń ókilderi, dedi otaǵasy Marat kóńildene sóılep. Marqum Jumabaı atamyz Múkáram atty ózbek qyzymen otasyp, úbirli-shúbirli bolypty. Shańyraqtaǵy Maratqa da ózbek qyzymen taǵdyryn qosý bu­ıyr­ǵan. Muny urpaq jalǵas­tyǵy, taǵ­dyr syıy deýge keledi. ­ Shańyraqtyń kıesi sanalǵan Raıhan ana tilimizdiń maıyn ta­myzyp, Marattan góri áńgimeni qyzdyryp áketti. Otbasy múshe­leri túgelimen Uzynaǵashtaǵy «Rı­nat» fotosalonynda jumys isteıdi eken. Marat sonaý jyl­dary Aqtóbe qalasyndaǵy foto­ýchı­lısheni  bitirip, kóp jyl aý­dan­dyq turmys qajetin óteıtin mekemede jumysyn jalǵastyrǵan. – Keńes odaǵy ydy­ra­ǵan kezde adamdardyń abdyrap qalǵany jasyryn emes. Jan baǵý kerek. Bázbireýler ala qabyn arq­alap, bazar jaǵalady. Endi bireýler jumys izdep qalaǵa tart­ty. Osyndaı óli­ara sátte men de kóp oıǵa qaldym. Ne isteý kerek, neden bastaǵan jón? Týǵan aýy­lyń­dy, ot jaqqan ordańdy tastap qaıda barmaqsyń. Sonymen, táýe­kel­ge bel býyp, 1999 jyly kási­bim­di ash­tym. Ony tuń­ǵysh neme­rem­niń esimimen «Rınat» dep ata­dym. Bar múm­kindikti jumyl­dy­ryp, bar qa­ra­jatymdy salyp, ar­naıy oryn aldym. Sóıtip, maǵan jumys ta­byl­dy. Balalarym Ta­ıyr­dy, Rý­fatty da úıretip, oqyt­tym. Naryq esepten turatyn bolsa kerek. Shy­ǵyn men paıdany shot­qa saldym. Tutyný­shynyń tal­ǵa­myn zerttesek, taza tabys edáýir ekenine kóz jetti. Eńbektiń janǵany degen osy. Sóıtip, ot­ba­sym­daǵy áıelimnen bastap, bar­sha­nyń qyzyǵýshylyǵy arta tús­ti. Munymen qoımaı, aýyl-aýyl­dy aralaýǵa, qyzmet kórsetýge kiristik, deıdi otaǵasy. Er jigitke jeti óner de az degen. Olar memlekettik tapsy­rys­tarǵa da qatysqan. Máselen, aza­mattardy tólqujatqa sýretke tú­sirý, fototaýarlar satý, degen sekildi. Mektep oqýshylarynyń re­ferattaryn kórkemdeý, úılený toılary men  mereıtoılardy sýretpen qamtamasyz etý, aıta bersek jumys jetedi eken. Jalpy, qol qýsyryp, bos otyratyn kezderi joq kórinedi. Osylaısha aýyl­da turyp jatyr. Eshkimge alaqan jaımaıdy. Erinbeı eńbek etseń, eńbektiń janaty­ny­na kóz­deri jetken. Mine, erli-za­ıypty Barakovtar osylaı deıdi bir-biriniń áńgimesin tolyqtyryp. Bala-shaǵalarymen úlken sha­ńy­raqtyń astynda berekeli ǵu­myr keshkenderdiń tirligine rıza bola­syń. Taıyr men Rýfat áke-she­she­lerin qurmet tutyp, aldy­nan qııa ótpeıdi. Kelinderi Natalıa men Elena eneleriniń qolyn uzartyp, izettilikterin tanyt­qan. Elena­nyń ákesi uıǵyr, sheshesi Lıýdmıla Mıhaılovna orys. Bıyl Álem tilderi ıns­tıtýtyn bitiretin Karına tatar jigitimen kóńil qo­syp, mamyr merekesinen keıin uzatylatyn bolypty. Fotosalonda Barakovtardan basqa segiz adam jumyspen qam­tylǵan. Aýdan bıýdjetine qosa­tyn úlesteri de qomaqty. Áı­teýir olar qatyspaıtyn mádenı shara kemde-kem. Osynaý eńseli úıdegi ynty­maq kórshilerge de juǵysty. Bolat pen Gúlnár, Nurlan kórshi­leri merekede bas qosyp, bir-biriniń qýanysh­taryn bólisedi. Al, Ýálıhanov atyndaǵy orta mek­tep dırektory Zoıa Qyrǵyz­baeva kóp ultty otbasyndaǵy balalardyń tárbıesi jaıly oıyn jetkizdi: – Karına zerek, ári tárbıeli. Endi, mine, aǵylshyn tiliniń ma­ma­ny boldy. Dıana 3-synypta oqı­dy. Qazaq, orys, ózbek tilderin jaq­sy meńgergen. Barakovtar ata-analar komıtetiniń belsendi mú­she­leri. Bala tárbıesine arnalǵan is-shar­alarǵa qatysyp, áleýmettik ja­ǵynan jetkiliksiz qamtylǵan­dar­ǵa qamqorlyq kór­se­tedi. Jal­py, tili basqa, tilegi bir, júzi bas­qa, júregi bir osy bir jandardyń ómirleri izgilikpen nurlana tús­ken, dedi. «Tirliktiń kúshi – birlikte, birliksiz iste – bereke joq». Qazaqtyń osy bir danalyq sózin júrekterine myqtap túıgen otbasy dáýletke qol jetkizip, turmystaryn sáý­let­tendire túsipti. Baqyty men baǵyn adal eńbekpen órgen shańyraqtaǵy shattyqqa kýá bolyp marqaıdyq. Kúmisjan BAIJAN. Almaty oblysy. _______________ Sýrette: ulttar dostyǵy jarasym tapqan Barakovtar shańyraǵynda.