El Táýelsizdiginiń 20 jyldyǵyna arnalǵan ıgi sharalar Qyzyljar óńirinde odan ári jalǵasa túsýde. Solardyń biriniń tusaýy Qazaqstan Prezıdenti janyndaǵy áıelder isi jáne otbasylyq-demografııalyq saıasat jónindegi ulttyq komıssııa, Qazaqstan isker áıelder qaýymdastyǵy jáne «Habar» agenttiginiń uıymdastyrýymen ótken «Jasyl japyraq» aksııasy aıasynda kesildi. Bul kúni oblystyq perınataldyq ortalyq alańyna adamdar kóp jınalyp, «Ana men bala» saıabaǵynyń irgesi qalandy. Onyń ashylýyna oblys ákimi Serik Bilálov qatysyp, ana men balanyń múddesin qorǵaý jolynda memleket tarapynan atqarylyp jatqan jumystardy aıtyp berdi. Oblysta byltyrdan beri «Urpaq qory» baǵdarlamasy jumys istep keledi. Qazir oǵan kemi 4 bala ósirip otyrǵan 300-den astam otbasy múshe. Olardyń balalary úshin bankten arnaıy depozıt ashylǵan. «Balapan» baǵdarlamasy boıynsha ótken jyly 5 myń búldirshin balabaqshalar men shaǵyn ortalyqtarǵa ornalastyrylsa, bıyl 2700-ge kóbeıetin bolady.
Aksııa barysynda alleıaǵa 150 túp shyrsha kósheti egildi.Oǵan eńbek ardagerleri, «Altyn alqa» ıegerleri atsalysty. «Urpaq qory» baǵdarlamasynyń qatysýshysy Olga Kýrenkova 4 balasyna arnap aǵash otyrǵyzdy. Ol kóp balaly ana atanǵanyn maqtanysh etetinin, taǵy da sábıli bolýdy armandaıtynyn jasyrmady. Aldaǵy ýaqytta jańa alańǵa músindik kompozısııalar ornatý josparlanyp otyr.
Perınataldyq ortalyqtyń bas dárigeri Janna Maýytovanyń aıtýynsha, emdeý mekemesinde 20 jyldyń ishinde 63 myńdaı náreste dúnıege kelipti.
О́mir ESQALI.
Soltústik Qazaqstan oblysy.