Ázirshe «Arlandar» alda

Jeńimpaz komanda taǵdyry kelesi jekpe-jekterde sheshiletin bolady Keshe Gýıang qalasynda byltyrdan beri Halyq­aralyq áýesqoı boks qaýym­dastyǵynyń bastamasy­men ótkizilip kele jatqan Dúnıejúzi­lik boks serııa­synyń fınaldyq kezdesý­leri­niń alǵashqy jekpe-jek­teri ótti. Gýıdjı provınsııasy ýnıver­sıtetiniń sport arenasynda kerilgen sharshy alańda Azııa, Amerıka jáne Eýropa qurlyq­tary­nan qatysqan 12 koman­danyń arasynan fınalǵa joldama alǵan «Astana arlan­dary» men «Parıj ıýnaıted» komandasynyń alǵash­qy bestigi kúsh synasty. Osy kúngi jekpe-jekterge shar­shy alańǵa bas bapker Beıbit Esjanovtyń jetekshiligimen Qa­nat Ábýtálipov, Mereı Aqshalov, Qanat Silám, Ramjon Ahmedov pen Rýslan Myrsataev shyǵyp, qarsylastary – fran­sııa­lyq klýbtyń grýzın legıoneri Georgıı Klınavamen, tegi afrıkalyq Rashıd Azzedınmen, Stefan Gýevaspen, Hrvoj Seppen jáne asa aýyr salmaqtaǵy Tonı Iokamen qolǵap túıistirdi. Bul aıqastar­dyń bárinde qazaq boksshylary Qytaıdan qurala­qan qaıtý úshin emes, jeńiske degen zor qulshy­nys­pen kelgenderin kórsetti. Eń jeńil salmaqta rıngke shyqqan Q.Ábýtálipov (50-54 kg. arasy) grýzın boks­shy­symen kúsh synasyp, taza jeńdi. M.Aqshalov  pen R.Azzedınniń ara­syn­daǵy kezdesýde (57-61 kg. arasy) jeńis qazaqstandyqtyń qarsylasyna be­rildi. 68-73 kılo salmaqta shar­­shy alańǵa shyqqan Q.Silám kez­desý taǵ­dyryn alǵashqy raýnda-aq shesh­ti. Qarsylasy S.Gýevas jekpe-jekti jalǵastyrýdan bas tartty. Al R.Ah­medov pen H.Septiń (80-85 kılo arasy) arasyndaǵy báse­ke qy­zyq­ty ári tartysty ótti. Ekeýi de jeńis úshin baryn salyp ju­dy­ryqtasty. Sóıtip, eń sońǵy raýndta jeńis bizdiń boks­shyǵa berildi. Asa aýyr salmaq­taǵy (91 kılodan joǵary) R.Myr­sataev óziniń qar­sylasy T.Iokamen kezdesýinde jeńilýge májbúr boldy. Sóıtip, alǵashqy kúngi jekpe-jekterden keıin «arlandar» 3:2 esebimen alda tur. «Arlandarǵa» aldaǵy jekpe-jekter de ońaı soqpaıtyn syńaıy bar. Ol da túsi­nikti. О́ıtkeni, bul fınal ǵoı. Bul básekelerge azııalyq tóreshiler qazylyq jasaǵan joq. Bas tóreshi brazılııalyq bolsa, qalǵandary Eýropa men Amerıka qurlyqtarynan kelgen qazylar boldy. Endi fınaldyń ekinshi kúni Mirjan Raqymjanov, Erjan Mú­sápirov, Baqyt Sársekbaev, Marat Moldagereev pen Sardor Abdýllaev qolǵap túıistiredi. Jalpy, «Astana arlandary­nyń» fınalǵa daıyndyǵyn bas barmaqpen baǵalaýǵa bolady. Báriniń jarysqa saqadaı saı daıyndalyp kelgenderi kórinip tur. Sol úshin komandanyń bas dırektory Bolat Mankenov pen bas bapker Beıbit Esjanovqa, boks­shylardyń jattyqtyrý­shy­lary men dárigerlerine, koman­da­ny kúzden beri jeńiske jetelep kele jatqan basqa da ma­mandarǵa alǵys aıtqanymyz jón. Al fınaldyq kezdesý ótken Gýıdjı provınsııasy ýnıversıteti sport kesheniniń Almatynyń QazUÝ qalashyǵyna uqsastyǵy kóp eken. Bul jerde sport are­na­synan basqa bilim ordasyna kerekti nárseniń bári bar dese bo­la­dy. Oqý ornynyń aınalasy ǵı­marattarǵa toly, arasynda sport arenasynan basqa halyqtyń dene tárbıesimen aınalasýyna bola­tyn oryndar kóp. «Astana arlan­dary» komandasy Qytaıǵa kelgen kúni boksshylar osy jerdegi jattyǵý zaldarynda fınaldyq synǵa alǵashqy daıyndyqtaryn bastady. Fınaldy uıymdastyrý jaǵyna osylaı kóńil bólinip jatqanda bizdiń jigitter de úsh kúnnen beri osynda jattyǵyp, jekpe-jekterge daıyndaldy. Qy­taıǵa kelgende bizdiń boksshy­larymyz Gýıangtiń aýa raıyna tez beıimdelip, eki-úsh kúnde jergilikti tabıǵatqa úırenisip qaldy. Al negizi boksshylarǵa shetelge shyqqanda bes-alty kún kerek ekenin belgili. Qytaılyqtar fınaldy la­ıyq­ty ótkizý úshin 1 mln. AQSh dollaryn jumsap, sportshy­lardy saqtandyrý úshin de árbir boksshyǵa belgili bir kólemde qar­jy bólipti. Bul máselemen jergilikti saqtandyrý kompa­nııasy aınalysqan. Saqtandyrý­dyń mer­­zimi 28 mamyrǵa deıin jaramdy. Taǵy bir aıtatyn nárse, osy aıqasqa 200 eriktiler tar­tylsa, jarysty nasıhattaýǵa kel­gen sheteldik jýrnalısterdiń sany 100-ge jetedi. Fınaldyq jekpe-jekterdiń alǵashqysyn «Eýronıýs» telearnasy tikeleı translıasııa arqyly kórsetse, bas­qa 30 eldiń telearnalary da kezdesýlerden  reportaj berýdi josparlap otyr eken. Osy eki kúndik fınalda jeńiske jetken komanda bas júldege ıe bolyp, 500 000 AQSh dollary tabys etiledi. Sonymen birge, ár nomınasııa boıynsha bapkerler men boksshylar mara­pattalady. Al fınaldan keıin bizdiń boksshylardy taǵy eki mańyzdy jekpe-jektiń kútip turǵany belgili. 27-28 mamyr kúnderi Makaoda WSB jarysynyń jekelegen chempıonatynda kúzden beri Dú­nıejúzilik boks serııasynyń eń joǵary reıtıngisine ıe bol­ǵan Qanat Ábýtálipov pen Erjan Músápirov qolǵap túıis­tiredi. Qanattyń qarsylasy aljırlik Ábdilhamıd Benshabla bolsa, Erjanmen kúsh synasatyn boksshy qytaılyq Jımın Vang. Osy jekpe-jekte jeńgenge 20 000 AQSh dollarymen qosa, Olımpıadaǵa joldama beriledi.  Jeńilgen boks­shy 10 000 AQSh dollaryn alady. Al Gýıangtegi fınalda je­ńilgen ujymǵa 150 000 AQSh dollary tıedi. Dastan KENJALIN, – Gýıang (QHR-dan).