Ardagerlerin ardaqtady

Keshe Bas Prokýratýrada Jeńis jáne Otan qorǵaýshylar kúnine arnalǵan saltanatty jınalys bolyp ótti. Uly Otan soǵysynda shaıqasqan jáne tylda jeńisti jaqyndatýǵa kómektesken prokýratýra organdarynyń 19 ardageri merekelik is-sharanyń qurmetti qonaqtary retinde qatysty. Elimizdiń Bas Prokýrory Ashat Daýylbaev ardagerlerdi Je­ńis­tiń 66 jyldyǵymen quttyq­tap, maı­dan­daǵy jáne tyldaǵy erlikteri úshin olarǵa tereń alǵys sezimderin jetkizdi. Barlyq ur­paqtar úshin 9 mamyr bizdiń hal­qymyzdyń Otanǵa degen sheksiz súıispen­shili­giniń, qaharmandyǵy men erliginiń máńgilik belgisi retinde qalatyn erekshe jarqyn mereke, dedi ol. Prokýratýra qyzmetkerleriniń jartysyna jýyǵy surapyl so­ǵys­qa attansa, olardyń kópshiligi maıdan dalasynan oralmady. Kóp­tegen ardagerler tyl eńbek­kerleri retinde soǵys kezinde asa qajetti jumystardy istep, aıanbaı ter tókti. Tereń qurmet jáne rızashy­lyq belgisi retinde Bas Prokýror soǵys ardagerleri men tyl eńbek­kerlerine vedomstvolyq nagradalar men qundy syılyqtar tapsyr­dy. Ardagerler ózderiniń jas árip­testerin quttyqtap, pro­kýror­lardyń jas býynyna Otan úshin ot keshkenderdi este saqtap, solarǵa laıyqty qyzmet isteýdi, proký­ror­lyq kásiptiń jaqsy dás­túr­lerin saqtaýdy jáne damy­týdy tiledi. Otan qorǵaýshylar kúnine oraı Qazaqstan Respýblıkasy Pre­zı­den­tiniń Jarlyǵymen Bas Prokýror Ashat Daýylbaevqa 2-synypty mem­­lekettik ádilet keńesshisi sy­nyptyq sheni jáne Bas Proký­rordyń oryn­basary Berik Asy­lovqa 3-synypty memlekettik ádi­let keńesshisi synyp­tyq sheni tapsyryldy. Minsiz qyzmet etkenderi jáne zańdylyq pen quqyq tártibin qam­tamasyz etýge úles qos­qan­dary úshin Bas Prokýror prokýratýra organ­darynyń 82 qyzmet­kerine vedom­stvolyq nagradalar tabys etti. Ardagerlerdiń Astanadaǵy mere­kelik baǵdarlamasynda «Otan qor­ǵaý­shylar» monýmentine gúl shoq­taryn qoıý rásimi, Beıbitshilik jáne kelisim saraıyn­daǵy merekelik konsertke qatysý jáne elor­danyń kórik­ti jerlerin aralaý jospar­lanǵan. «Egemen-aqparat».