...páterlerge qonystandy
Jaqynda Hromtaý qalasyndaǵy Dóń taý-ken baıytý kombınatynyń 65 qyzmetkeriniń otbasy baspanaly boldy. Jańa páter kiltterin alǵandardyń bári de kásiporynnyń jas jumysshylary men mamandary. Bir, eki jáne úsh bólmeli páterler olarǵa on bes jylǵa jyldyq ósimi 1 paıyzdyq nesıemen berildi. Bul páterler asa qymbat emes, bir sharshy metri 80 304 teńge turady.
Bul «Qazhrom» TUK-nyń 2007 jyldan bastap korporatıvtik turǵyn úı baǵdarlamasy aıasynda salǵan besinshi úıi bolyp tabylady. Turǵyn úıdi salýǵa kásiporyn 432 mıllıon teńge jumsady. Atalǵan baǵdarlama boıynsha altynshy úıdiń qurylysy júrgizilýde. Jalpy, kásiporynda jumysshy-qyzmetkerlerge áleýmettik jaǵdaı jasaýǵa basa kóńil bólingen.
Satybaldy SÁÝIRBAI, Aqtóbe oblysy.
...balabaqshanyń aty – «Nuraı»
Jaqynda Taraz qalasyndaǵy «Astana» shaǵyn aýdanynda «Nuraı» dep atalatyn 280 búldirshinge arnalǵan jańa balabaqsha ashyldy. Ǵımarattyń qurylys jumysyn ótken jyldyń tamyz aıynda «Bınom» JShS qolǵa alǵan bolatyn.
Smetalyq quny 382,403 mln. teńgeni quraǵan balalar baqshasynda 12 top bólmesi bar. Ádiskerge, psıhologqa, mýzykantqa, medısına qyzmetkerine, dene shynyqtyrý mamanyna arnalǵan bólmeler de qarastyrylǵan.
Qurylys kompanııasy, sondaı-aq, balalar baqshasyn búldirshinderge arnalǵan qajetti jıhazdarmen, oıynshyqtarmen tolyǵymen jabdyqtady.
Kósemáli SÁTTIBAIULY,Taraz.
...basshy taǵaıyndaldy
Elimizdiń munaı alyptarynyń biri – «Mańǵystaýmunaıgaz» AQ-tyń basshysy aýysty. Aksıonerlik qoǵamnyń bas dırektory bolyp buǵan deıin Munaı jáne gaz mınıstriniń orynbasary qyzmetin atqarǵan Áset Maǵaýov taǵaıyndaldy. Ol – Máskeýdiń Gýbkın atyndaǵy memlekettik munaı jáne gaz akademııasynyń túlegi. Vıse-mınıstrlikke deıin «QazaqOıl», «Munaı jáne gaz tasymaldaý», «QazMunaıGaz» ulttyq munaı-gaz kompanııalarynda, «TeńizShevroıl» jaýapkershiligi shekteýli seriktestiginde laýazymdy qyzmetter atqarǵan.
Al «Mańǵystaýmunaıgazdyń» burynǵy bas dırektory Alık Aıdarbaev Astanaǵa aýysyp, «QazMunaıGaz» ulttyq kompanııasy» AQ-tyń basqarýshy dırektory bolyp taǵaıyndaldy.
Jolaman BOShALAQ, Aqtaý.