Bastaýysh mekteptiń qarapaıym muǵalimi alaıaqtyq qylmyspen aınalysyp, teris jolǵa tústi degenge birden sený de qıyn. О́kinishke oraı, bul aqıqat. «Almaty qalasynyń Túrksib aýdanynda ornalasqan orta mektepte jumys isteıtin jas maman Alena Ivanova óziniń eńbekaqysyna qanaǵattanbaı, qaltasyn toltyrýdyń jańa ári tıimdi jolyn izdestirgen. Sóıtip, ol zeınetkerlerdiń zeınetaqysynan jymqyrýdyń ádis-tásilderin oılap tapqan» deıdi Almaty qalalyq IID baspasóz qyzmetiniń jetekshisi Saltanat Ázirbek.
Shyn mánisinde de, alaıaqtyq qylmyspen aınalysýshy «óziniń tabys kózin» tym alystan izdemegen. Kórshiles úıde turatyn sábıdeı ańǵal, ańqaý qarttardy jáne turmys jaǵdaıy nashar otbasylaryn aınalsoqtap, olarmen jyly sóılesip, aralasýdy bastaǵan. Qynjylarlyǵy, qartaıǵanda bir bala demekshi, azǵana zeınetaqyny kúnkórisine aınaldyryp otyrǵan qarııalar Alena Ivanovanyń «qosymsha kiris» týraly sózine birden senip, maıdaı erigen.
Túrksib aýdandyq IIB bastyǵy, polısııa polkovnıgi Nurlan Moshqalov «alaıaqtyq qylmystyń ádis-tásilderiniń qaı-qaısysynyń bolmasyn bir-birinen eshqandaı aıyrmashylyǵy joq ekendigin» ashyp aıtady.
– Alaıaq áıel óziniń alǵashqy jemtigin budan úsh jyl buryn, ıaǵnı 2008 jyly tapqan bolatyn. Kórshi úıde turatyn Savelıı Petrovqa Alena Ivanova óziniń jaqynda Almaty qalalyq áleýmettik qorǵaý departamentine jumysqa ornalasqany týraly qýanyshty habar aıtqan. Munymen qosa, endi joq-jitik qarııaǵa kómektese alatyndyǵyn da jetkizgen. Anyǵyraq aıtqanda, bul departament zeınetkerler men áleýmettik, turmystyq jaǵdaıy tómenderge júıeli túrde kómek kórsetetindigin de aıtqan. Sodan keıin qarııaǵa kómekke qajetti qujatty rásimdeý úshin aqsha surap alǵan, – deıdi Nurlan Moshqalov.
Árıne, áleýmettik kómek týraly bul jaqsy habardy estigen ózge zeınetkerler de Alena Ivanovaǵa óz qujattaryn rásimdeý úshin qolyndaǵy qarajattaryn bere bastaǵan. Sóıtip, aılakerlik qabileti arqyly qylmysker áıel qarııalardan bir mıllıon teńgeni kóp qınalyp, ter tókpeı-aq jınap alady. Zeınetkerlerdiń senimine kirý úshin keıbirine alaıaqtyq baǵyttaǵy óz «operasııasynyń» alǵashqy kezeńinde qarııalardyń biren-saranyna bes kılogramm et, úsh kılogramm makaron jáne 20 jumyrtqa ákelip, aldaýsyratqan. Degenmen, mundaı úleske, ıaǵnı syılyqqa sheksiz rıza bolyp, máz bolǵan qarııalar qýanyshy uzaqqa sozylmady.
Jetkilikti mólsherdegi, ıaǵnı bir mıllıon teńgeni jınap alǵan alaıaq izin sýytyp úlgergen soń ǵana, Túrksib aýdandyq IIB-na shaǵymdanǵan zeınetkerler ózderin aıdyń kúnniń amanynda aldap soqqan áıeldiń zań aldynda jaýap berýin ótingen bolatyn.
Alaıaqtyq qylmysy úshin quryqtalǵan bastaýysh synyptyń burynǵy muǵalimi óziniń aǵattyǵy úshin jábirlenýshilerden jalbarynyp, keshirim surap, olardyń aqshalaryn qaıtaryp berýge daıyn ekendigin de aıtady. Alaıda, resmı tergeý jumystary bastalyp ta ketti. Al qarııalar bolsa ózderin osynshama azapqa salyp, qorlaǵan jandy eshqashan keshirmeıtindigin ashyna aıtady. О́ıtkeni, onyń olardy sońǵy tıyn-tebeninen ǵana emes, ózgelerge degen seniminen de aıyrǵany qarııalarǵa óte aýyr tıip otyr.
Baqyt BALǴARINA.
Almaty.