«Kaneloǵa» qarsy jekpe-jekte ol Gennadıı Golovkın bolyp qalýy kerek. Djeıkobsqa qarsy kezdesýde ol birnárseni durys istemedi dep aıta almaımyn. Men qaıta Denıeldi keremet qarsylas bola bildi dep aıtar edim. Sondyqtan bul joly GGG óz ózimen bolyp «Kanelony» soqqyǵa jyǵýy tıis. Osynyń arqasynda boks ta jańa bir kezeńge kóteriledi degen oıdamyn», dedi Abel Sanches.
Saýl «Kanelo» Alvarestiń promoýteri Oskar De La Hoııanyń aıtýynsha, meksıkalyq boksshy kishi Floıd Meıýezerden jeńilgennen keıin tájrıbesi tolysqan úzdik boksshylardyń biri boldy.
«Jankúıerler úlken boks keshine kýá bolary anyq. Mundaı aıqastyń ótpegenine kóp boldy. Sharshy alańda eshqashan jeńilip kórmegen Gennadıı Golovkın men kishi Floıd Meıýezerge ǵana ese jibergen nokaýtshy Saýl Alvares kezdesedi. Kishi Floıdtan utylǵannan keıin «Kanelo» kóp nárseni úırendi. Rıngke shyqqan saıyn tájirıbesi molaıa tústi. Mundaı kezdesý kúnde óte bermeıdi», dep jarııalady Boxingscene.com.
Oskar De La Hoııa sondaı-aq, qos boksshynyń jekpe-jegi ótkizý úshin Birikken Arab Ámirliginen usynys túskenin de atap ótti.
«Maǵan boks keshin uıymdastyrý úshin Dýbaıdan, artynsha Ulybrıtanııadan habarlasqandar boldy. Bul aıqas búkil álemge qyzyq bolyp otyr. Istiń anyq-qanyǵy kelissózder bastalǵannan keıin, ıaǵnı aldaǵy aptalarda belgili bolady», dep habarlady ESPN basylymy.
Qazirgi ýaqytta Golovkın-Alvares keshin uıymdastyrý úshin negizinen úsh arena qarastyrylyp otyr. Olar Las Vegastaǵy T-Mobile (Jaqynda ǵana kishi Hýlıo Sezar Chaves pen Saýl Alvares kezdesýi ótken oryn) kesheni, Nıý-Iorktegi Madison Square Garden (Golovkın-Djeıkobs kezdesýi ótken oryn) arenasy jáne Dallastaǵy AT&T Stadium stadıony.
Sonymen qatar, osy keshti uıymdastyrýǵa Las-Vegastaǵy MGM Grand jáne Los-Andjelestegi Staples Center arenalary da qyzyǵýshylyq tanytyp otyr. Jekpe-jek AQSh-tan ózge elderde de ótýi múmkin. Olar: Londondaǵy «Ýemblı» jáne Mehıkodaǵy «Asteka» stadıondary.
Al «Kanelonyń» komandasy Las-Vegastaǵy «T-Mobile» arenasynda ótkizýge nıet bildirip otyr. Osy maqsatta olar Nevada shtatynyń Atletıkalyq komıssııasyna suranys jiberdi.
Esterińizge sala keteıik, boks keshi 16 qyrkúıekke josparlanyp otyr. Bul aıqasqa Gennadıı Golovkın WBC, WBA (Super), IBF jáne IBO belbeýlerin, al Saýl Alvares The Ring jýrnalynyń belbeýin sarapqa salmaq. Aıta keterligi, meksıkalyq boksshy Dúnıejúzilik boks keńesimen (WBC) bolǵan janjaldan keıin osy uıymnyń tıtýlynan bas tartyp otyr.
Daıyndaǵan: Aıan ÁBDÝÁLI, «Egemen Qazaqstan»