Krıs Ýılıams sóziniń basyn Abel Sanchestiń (Golovkınniń bapkeri) Dontae’s Boxing Nation basylymyna bergen suhbatyna pikir bildirýmen bastady. Meksıkalyq maman bul aıqasty trılogııaǵa teńep, mundaı kezdesýdi jurt eki ret kórýge de qarsy bolmaıtynyn aıtqan bolatyn.
«Menińshe, Sanches trılogııa týraly nemese revansh jaıly aıtyp tym alǵa shyǵyp ketken sııaqty. Eger «Kanelo» Golovkındi nokaýtpen jeńer bolsa, meksıkalyq ary qaraı ketedi. Golovkınge ekinshi múmkindik bermeıdi. Sebebi, boks jankúıerleri mundaı jaǵdaıda ekinshi ret jekpe-jek úshin aqsha tólegisi kelmeıdi. Revansh GGG jeńiske jetkende nemese jeńimpaz daýly sheshimmen aıaqtalǵanda ǵana uıymdastyrylýy múmkin.
Denıel Djeıkobsqa qarsy kezdesýinen keıin Genanyń jeńiske jetýi ekitalaı. 16 qyrkúıek kúni ol jeńiledi. Al Golden Boy ony nazaryna da ilmeıtin bolady. Boks keshin 2018 jyly ótkizeıik deýi múmkin. Biraq ol jaı sóz bolyp qalady. Meksıkalyq boksshynyń komandasy Golovkınge taǵy bir múmkindik beredi dep oılamaımyn», dedi Krıs Ýılıams.
Al sarapshy Allan Fokstyń pikiri múldem basqa. Ol saýl Alvarestiń osal tustaryn aıtyp, Gennadıı Golovkınniń jeńisine senim bildirdi. Sondaı-aq, ol qazaqstandyq boksshynyń bapkerin Denıel Djeıkobsqa qarsy jekpe-jekke tyńǵylyqty daıyndamaǵanyn synǵa aldy.
«Alvares Gennadııdi nokaýtpen jeńedi dep oılamaımyn. Qaıta qazaqstandyq boksshy meksıkalyqty nokaýtqa túsirýi múmkin. Buǵan basty sebep – Golovkınniń ıegi myqty, soqqylardy kótere alady. Gena osyǵan deıin de «Kanelodan» myqty pancherlermen qolǵap túıistirgen, biraq jaraqat alǵan emes.
«Kanelonyń» soqqylary Devıd Leme, Kertıs Stıvens sekildi boksshylardan kúshti emestigi belgili. Golovkın olardyń joıqyn soqqylaryn kótere aldy. Eger meksıkalyq jyldam qozǵalyp, GGG sekildi aýyr soqqylarǵa shimirikpese, Golovkındi nokaýtqa túsirer me edi! Biraq ol shydamdy boksshy emes.
Alvarestiń dál osy kemshiligin tıimdi paıdalanatyn boksshylar shyǵýy múmkin. Bapker Abel Sanches meksıkalyqtyń kemshin tustaryn jaqsylap zerttep shyǵyp, qandaı amal qoldaný kerektigin oılaýy tıis. Biraq Sanches olaı istemeıtin sııaqty. Denıel Djeıkobsqa qarsy kezdesýge ol shákirtin tyńǵylyqty daıyndamaǵany baıqalyp qaldy. Eger de Abel 2010 jyly shákirti Dmıtrıı Pırogqa (WBO nusqasynyń bos belbeýi úshin Djeıkobspen kezdesip, besinshi raýndta tehnıkalyq nokaýtpen jeńgen) bergen nusqaýlaryn aıtqanda kezdesý Golovkın úshin ońaı óter me edi! Bul tusta bapkerdiń jospary durys bolmady», dep jazdy Allan Foks.
Aıta keteıik, ESPN.com bul aıqastyń jeńimpazy chempıondyq belbeýlerin qorǵaý úshin kimmen judyryqtasatynyn habarlady. IBF jelisi boıynsha Bagam araldarynyń ókili Týreano Djonson (20-1, 14 KO) men ýkraınalyq Sergeı Derevıanchenko (10-0, 8 KO) qolǵap túıistiredi. Bul boksshylar 7 maýsymǵa deıin kezdesý jóninde ortaq sheshimge kelýi tıis. Mine, Golovkın-Alvares aıqasynyń jeńimpazy Djonson-Derevıanchenko arasyndaǵy úzdikpen kúsh synasady.
Daıyndaǵan: Aıan ÁBDÝÁLI, "Egemen Qazaqstan"