Elimizde 5 sáýirden bastap 30 maýsymǵa deıin halyqty emhanaǵa tirkeý naýqany bastaldy. Bul jumys mindetti áleýmettik medısınalyq saqtandyrý (MÁMS) júıesin engizý sheńberinde ótkiziledi. Emhanaǵa «elektrondy úkimet» portalyndaǵy onlaın-qyzmetin paıdalaný arqyly tirkeýge bolady. Bul rette elektrondy sıfrly qoltańba (ESP) qajet emes. Qyzmetti onlaın túrinde alý úshin eGov.kz portalynda avtorızasııadan ótý jáne «Densaýlyq saqtaý» bólimine ótip, «Alǵashqy medısınalyq-sanıtarlyq kómek kórsetetin medısına uıymdaryna tirkelý» degen qyzmet ataýyn tańdaý jetkilikti. Ári qaraı «Onlaın suraý» batyrmasyn shertip, azamat týraly derekterdi kórsete otyryp, suraýdy toltyrý jáne ótinishti jiberý kerek. Emhanadaǵy jaýapty qyzmetker suranymdy alyp, tirkelý týraly talon resimdeıdi. Qyzmet tegin kórsetiledi, merzimi 1 jumys kúnin quraıdy. Qyzmet kórsetý reglamenttik merzimnen asqan jaǵdaıda, tirkelý suranymy jiberilgen medısınalyq uıymǵa jolyqqan jón. Qyzmet kórsetýdiń nátıjesi jeke kabınettiń «Qyzmetter alý tarıhy» bóliminde, tirkelý týraly aqparat retinde nemese tirkeýden sebeppen bas tartý retinde paıda bolady.
«Egemen-aqparat»