Qazaq ániniń qubylysy bolǵan Ámire Qashaýbaev Parıj, Maındaǵy Frankfýrt, Máskeýde án salǵany belgili. Sonymen birge Ámireniń Bakýge de tabany tıdi. Ánshi 1926 jyly Bakýde ótken túrkitanýshylar sezine qatysyp, óner kórsetti.
Osydan jeti-segiz jyl buryn «photoirs.musigi-dunya.az» saıtyndaǵy ázerbaıjannyń tiltanýshy ǵalymy, pedagog Farhad Aǵazadeniń qorynan Baký sezine qatysýshylardyń birneshe sýretin keziktirdik. Keıin ol sýretterdi áleýmettik jelilerge salyp, súıinshi habar da jarııaladyq. Sonyń birinde Ahmet Baıtursynulynyń beınesi kózge ottaı basyldy.
Naqtyraq aıtar bolsaq, birinshi qatarda qaq ortada qasqaıyp Ahmet Baıtursynuly otyr. Onyń oń jaǵyna túrkitanýshy ǵalym Bekır Chobanzade, sol jaǵyna Bilál Súleıuly jaıǵasqan. Al ekinshi qatarda sol jaqtan birinshi Ámire Qashaýbaevty kórýge bolady. Shashyn tyqyrlap alyp tastaǵan, sony jasyrý úshin basyna fýrajka kıgen. Ústine kıgeni – qara palto, moınyna sharf taqqan. Ámireniń Bakýge barǵanyn osy sýrettiń ózi-aq aıǵaqtap tur. Ámireden keıin Eldes Omaruly men ázerbaıjan pedagogi Farhad Aǵazade tur. Keıin Ahmet Baıtursynuly atyndaǵy Til bilimi ınstıtýtynyń zertteýshileri ǵylymı issaparmen Baký qalasyna baryp, Salman Mýmtaz atyndaǵy Ádebıet jáne óner memlekettik arhıvinen osy jáne basqa da sýretter men qujattardyń kóshirmelerin elge ákeldi.
Ánshi Ámireniń buryn-sońdy beımálim bolyp kelgen sýretin mýzyka zertteýshisi, ámiretanýshy Jarqyn Shákárimge kórsetkenimizde: «Taǵy da sol muń, taǵy da sol zar Ámire túrinen syrt kózge anyq kórinip tur. 1926 jyly Bakýde ótken Túrkitanýshylardyń quryltaıyna Ámire resmı túrde shaqyrylǵan», degen edi. Tipti Jarqyn Shákárim ánshiniń Baký sapary jaıynda jazýǵa da oqtaldy. Alaıda jazyp úlgermegen syńaıly. Ámireniń sezge shaqyrtý alǵanyna qaraǵanda, jıynda án salǵan sekildi.
Baký saparyna qatysty suraqty óner zertteýshisi Rústem Núrkenovten suraǵanymyzda, ol da buǵan qatysty qysqa ǵana qaıyrdy. «Ámire 1925 jyly Parıjge, 1927 jyly Maındaǵy Frankfýrtqa bardy. Sonyń arasynda, ıaǵnı 1926 jyly arnaıy shaqyrtýmen, Bakýge barǵan bolýy múmkin. Sebebi Parıjden kelgen soń Ámireniń tanymaldylyǵy artty. Túrki halyqtary ishinde qazaqtan ánshi Ámire, bashqurttan sybyzǵyshy Jumabaıdyń bedeli bıik boldy. Soǵan qaraǵanda Bakýdegi sezge ekeýin arnaıy shaqyrǵan bolýy múmkin», dedi Rústem Núrkenov.
Ámireniń Bakýge barǵany Jumat Shanınniń esteliginde aıtylady. «1926 jyly Bakýde ótken Túrkologııa sezine baryp, án salyp qaıtty» degen bir-aq sóılem. Sezge ánshi ne úshin shaqyryldy, jıynda qandaı án shyrqady, ol jaǵy belgisiz. Túrkitanýshylar seziniń stenogrammasynda da bul jaıynda biraýyz sóz joq. Demek Ámireniń osydan týra 100 jyl burynǵy Baký sapary áli de zertteýdi qajet etedi degen sóz.