Kórmeniń maqsaty – kópshiliktiń qoldanbaly óner men keskindeme janryna kórkem qundylyq turǵysyndaǵy kózqarasyn qalyptastyrý, jergilikti qólóner sheberleri arasynda tájirıbe almasý jáne ulttyq mádenı muramyzdy nasıhattaý.
«Táýelsizdigimizdi alǵaly beri basty tól jádigerlerimiz bolyp sanalatyn ulttyq kıimderimiz ben qolónerimizdi dáripteýge aıryqsha kóńil bóline bastady. «El ishi – óner kenishi» demekshi, aımaqtarda osy salany damytýǵa aıryqsha nazar aýdarylyp, ónerlerimen tanylǵan sheberlerimizdiń qarasy artty. Memleket basshysy Nursultan Nazarbaev «Bolashaqqa baǵdar: rýhanı jańǵyrý» atty baǵdarlamalyq maqalasynda babadan balaǵa mura bolyp kele jatqan mádenı muralarymyzdy óskeleń urpaqqa jetkizýdi hám tanystyrýdy mindettedi», dep atap ótti shara uıymdastyrýshylary.
Kórmege ınstıtýttyń Kásiptik oqytý jáne dızaın kafedrasynyń oqytýshylary men stýdentteriniń 50-den astam qoldanbaly óner, keskindeme janryndaǵy týyndylary jáne ulttyq naqyshtaǵy kıim úlgileri qoıylǵan.
Atap aıtqanda, A. Nazarovanyń «Skakýn – volnaıa dýsha kazahskoı stepı», A. Hamıttyń «Er-toqym», G. Ashyqbaıdyń «Dombyrashy qyz», J. Bazarbektiń «Mahabbat», E. Boshquldyń «Qasqyr terisi», Q. Nurbaıqyzynyń «Aısha bıbi», A. Neıfeldtiń «Bala besik» atty týyndylary tól tarıhymyzdyń tereń qoınaýynan syr shertedi. Al A. Amanjoldyń «Sheber qoly», M. Áljanovtyń «Halyq óner tamyry», J. Turmahanovanyń «Báıterek tarıhy», Sh. Jumalıevanyń «Astana joly», «Táýelsizdikke 25 jyl», G. Nurpashtyń «Ertegi álemi», J. Qılybaevanyń «Kóktem kóńili», A. Fıeshkanyń «Nejnost» taqyrybyndaǵy shyǵarmalarynda elimizdiń táýelsizdik jyldaryndaǵy jetken jetistikteri men tolaıym tabystary kórkem beınelengen. Sondaı-aq, ulttyq mýzykalyq aspaptar, «Kóktem gúli», «Kerbez sulý», «Tomırıs», «Hanshaıym» sándi kıim kolleksııalary men kúndelikti turmys-tirshilikte qoldanylǵan ulttyq buıymdar kópshilik nazaryna usynyldy.
«Kórmeni uıymdastyrýdaǵy basty kózdegenimiz – tól qundylyqtarymyzdy jandandyrýshy stýdentterdiń qataryn kóbeıtip, olardyń ónerleri arqyly ulttyq kıim úlgilerindegi elementterdi jańa úlgidegi ulttyq kıimderimizge endirip, tyń brendtter qalyptastyrý. Búgingi sharany tamashalaǵan kópshilik kóp nársege kóz jetkizdi dep oılaımyn. Eń bastysy, umyt bolyp bara jatqan dúnıelerimizben qaıta qaýyshtyq», deıdi Kásiptik oqytý jáne dızaın kafedrasynyń meńgerýshisi Aınur Jaskılenova.
Is-shara sońynda úzdik dep tanylǵan óner týyndylarynyń avtorlary arnaıy sertıfıkatpen marapattalyp, pedagogıkalyq ınstıtýttyń óner ujymdarynyń gala-konsertine ulasty.
Kórmege qoıylǵan qolóner buıymdary eki apta boıy Taraz qalasynyń turǵyndary men qonaqtarynyń nazaryna usynylmaq.