Áıgili balýannyń urpaqtarynyń uıymdastyrýymen qolǵa alynǵan jarysqa Tarbaǵataı, Zaısan aýdandary men Semeı jáne Almaty qalalarynan uzyn sany 115 balýan qatysty. Oqýshylar 8 salmaqta sheberlik baıqassa, 16 jigit «túıe balýan» saıysynyń kórigin qyzdyrdy. Jıyrma tórt jyldan keıin jańǵyrǵan birinshilikte aýyl, aýdan, oblys deńgeıinde júlde alyp júrgen balýandardan bólek eki birdeı Azııa chempıony kilemge shyqty. Bárinen de balp-balp basqan túıe balýandardyń aqtyq básekeleri tartysty boldy. Qazaq kúresinen Azııa chempıony, salmaǵy 78 kılo Bekzat Manaspaev fınalda 130 kılo tartatyn Bıha Qydyrmen beldesip, aılasyn asyryp, Tarbaǵataı aýdanynyń týmasy Nurlan Manaqov osy týrnırge arnaıy tiktirgen aýyspaly beldikti taǵyndy. Tarbaǵataı aýdanyndaǵy Marat Imashev atyndaǵy sport mektebi dırektorynyń orynbasary, jarystyń tóreshisi Hamıt Ydyryshev bul birinshiliktiń alǵash ret uıymdastyrylsa da, joǵary dárejede bolǵanyn tilge tıek etip, aldaǵy jyldary oblystyq deńgeıde ótkizýdi josparlap otyrǵandaryn jetkizdi. «1993 jyly Moldabaı balýannyń qurmetine týrnır ótken bolatyn. Sodan beri arada jyljyp 24 jyl ótipti. Moldabaı balýannyń dańqy pen daqpyrtyn jurtshylyqqa tanystyryp jatý artyq bolar. Degenmen sońǵy jyldary eren kúsh ıesiniń esimi umytyla bastap edi. Elbasymyzdyń «Bolashaqqa baǵdar: rýhanı jańǵyrý» maqalasyndaǵy «Árbir ólkeniń halqyna sýyqta pana, ystyqta saıa bolǵan, esimderi el esinde saqtalǵan birtýar perzentteri bar. Osynyń bárin jas urpaq bilip ósýge tıis» degen sózinde úlken mán jatyr. Bul jarysqa qatysqan aýyldyń qara domalaqtary arasynan erteń Olımpıada chempıondary shyǵyp jatsa, nur ústine nur emes pe?!», - deıdi atalǵan jarysty uıymdastyrýshy, Moldabaı balýannyń urpaǵy Ardaq Qasenov. Saıys kezinde Ekpin aýylynda turatyn Moldabaı balýannyń nemere inisi Bolathan Muqyshevty jolyqtyrdyq. Aǵamyz batyr tulǵaly atasyn bala kezinde kórgenin aıtyp, anasynan estigen esteliktermen bólisti. «Moldabaı atamyz qazaq balýandarymen ǵana kúresken joq. 19 jasynda shynjyrly, noqtaly qytaı balýanynyń qabyrǵasyn qaqyratyp, tizesin búktirgen. Shet, Shıqý, Manas, Qyzaıǵa deıin baryp, ataqty balýandardyń bárin jyqty. О́skemen, Semeı óńirinde bul kisi qarsylas shaq keltirmegen. Áıgili Boranqul balýan albyrt shaǵynda Moldakeńmen kúrespekshi bolǵanda, eki ret ıyǵynan basyp, tizesin búktirip, «úshinshi ret baspaıyn, taýyń shaǵylyp, baǵyń qaıtar» dep óziniń aq batasyn bergen eken. 1924 jyly Moldabaı balýan Zaısan qalasynda Qajymuqanmen kezdesken. Biraq kúrespegen. Qajekeń Moldakeńniń jasyn syılap, Tezek Qısyqovtyń ózine syılaǵan shubar atyn syıǵa tartypty. Osy at balýan dúnıeden ótkende janazasyna soıyldy», – dedi balýannyń nemere inisi.
Azamat QASYM,
«Egemen Qazaqstan»
Shyǵys Qazaqstan oblysy,
Tarbaǵataı aýdany