Elorda tórindegi Táýelsizdik saraıynda «Táýelsizdik taǵylymy-25» atty fotokórmeniń ashylý saltanaty ótti. Sharaǵa elimizdiń úzdik fotojýrnalısteri usynǵan, sondaı-aq «Meniń elim – Qazaqstan» fotobaıqaýyna qatysqan 100-ge tarta jumys qoıyldy.
Kórme eki bólimnen turady. Alǵashqysy 9-20 qarasha aralyǵynda «Táýelsizdiktiń besigi» degen ataýmen Almaty qalasynda ótse, kelesisi 6 jeltoqsannan jyl sońyna deıin Astanada jalǵasady.
«Elimiz egemendigin alǵaly 25 jyl ishinde birqatar mańyzdy ári aıtýly oqıǵalar júzege asty. Olardyń elimizdiń bolashaǵy men damýyna eleýli úles bolyp qosylary anyq. Búginge deıingi ýaqyt aralyǵynda jas memleketimizdiń bolashaqqa jasaǵan árbir qadamy fotojýrnalısterdiń nazarynan tys qalǵan joq jáne solar arqyly jurtshylyqqa jarııalanyp, tarıh betterinen oryn alyp, óskeleń urpaq úshin saqtalyp keledi», dedi «Fotoóner» qoǵamdyq birlestiginiń basshysy Asylhan Ábdiraıym.
«Fotoóner» qoǵamdyq birlestigi bul is-sharany Astana qalasy ákimdiginiń qoldaýymen ótkizip otyr. Uıymdastyrýshylar keler urpaqqa jańa tarıhtyń shejiresindeı qundy derekterdi qyzyqty etip jetkizýdi maqsat etti.
Fotokórme aıasynda «Aıqyn» respýblıkalyq qoǵamdyq-saıası gazetiniń fototilshisi Sovetbek Maǵzumov Qazaqsan fotojýrnalıstıkasyna sińirgen eńbegi úshin «Fotoóner qaıratkeri» medalimen marapattaldy.
Sondaı-aq, shara sheńberinde Úkimet basshysynyń fotografy Shúkir Shahaıǵa, «Qazaqparat» halyqaralyq agenttiginiń fotografy Muhtar Holdorbekovke, qazaq tilinde jaryq kóretin National Geographic jýrnalynyń shef-fotografy Erbolat Shadyraqovqa, Qorǵanys mınıstrliginiń fotografy Ermek Sarbasqa jáne «Egemen Qazaqstan» gazetiniń fotografy Erlan Omarovqa da qurmet kórsetildi. Olarǵa táýelsiz Qazaqstannyń fotshejiresin jasap júrgen jandar retinde baǵaly syılyqtar tapsyryldy.
Aıan ÁBDÝÁLI,
«Egemen Qazaqstan»
Sýretterdi túsirgen
Orynbaı BALMURAT,
«Egemen Qazaqstan»