«Nurly jol» memlekettik baǵdarlamasy aıasynda «KEGOC» aksıonerlik qoǵamy Soltústik-Shyǵys-Ońtústik baǵytynda ulttyq elektr jelisiniń tranzıttik áleýetin arttyrýǵa, Shyǵys Qazaqstan men ońtústik óńirlerde elektrmen jabdyqtaýdyń senimdiligi men turaqtylyǵyn qamtamasyz etýge jáne atalǵan aımaqtarda elektr qýaty jetispeýshiliginiń ornyn toltyrýǵa múmkindik beretin keń aýqymdy ınvestısııalyq jobany júzege asyrýda.
Burnaǵy kúni ótken respýblıkalyq telekópir aıasynda Memleket basshysy «KEGOC» AQ-tyń basqarma tóraǵasy Baqytjan Qajıevke osy aýqymdy joba sheńberinde «Ekibastuz – Shúlbi GES (Semeı) – О́skemen» baǵytymen ótkizilgen jańa joǵary voltty jelilerdi iske qosýǵa pármen bergen bolatyn. Ortalyq kommýnıkasııalar qyzmetinde ótken baspasóz konferensııasynda Energetıka mınıstrligi elektr energetıkasy departamentiniń dırektory Baýyrjan Sársenov jańa elektr jelileriniń qurylys jumystary, qyzmeti men mańyzy jóninde áńgimelep beri.
Departament dırektory «Soltústik-Shyǵys-Ońtústik 500 kV EJ salý» keń aýqymdy ınvestısııalyq jobasy eki kezeńge bólinip júzege asyrylyp jatqanyn atap ótti.
«500 kV jáne 220 kV elektr jetkizetin 700 shaqyrym jeliler, sondaı-aq, 500 kV «Semeı», 500 kV «О́skemen» jáne 1150 kV «Ekibastuz» qosalqy stansalary soltústikte óndiriletin elektr energııasyn Qazaqstannyń shyǵys óńirlerine jetkizetin bolady», – dedi B.Sársenov.
Ol sondaı-aq, jobanyń el ekonomıkasyn damytý úshin asa mańyzdy ekenine toqtaldy.
«Shyǵys Qazaqstan oblysynyń tutynýshylary osy ýaqytqa deıin Reseı BEJ jelileri arqyly ótetin jáne óńirdi energııa júıesimen jalǵaıtyn jelilerdi qoldanyp kelse, endi jańa jeliler arqyly elektr energııasymen qamtamasyz etiletin bolady. Bul elimizdiń energetıkalyq qaýipsizdigin qamtamasyz etý jaǵynan kelgende asa mańyzdy», – dedi departament dırektory.
Ol qurylystyń ekinshi kezeńi – «500 kV Shúlbi GES (Semeı) – Aqtoǵaı – Taldyqorǵan – Alma salý» jobasy kestege sáıkes júrgizilip jatqanyn jetkizdi.
«Bul jobany aıaqtaý birqatar máselelerdi sheshýge múmkindik beredi. Naqty aıtqanda, shyǵys óńiriniń Qazaqstannyń birtutas elektr energetıkalyq júıesimen baılanysyn kúsheıtedi, Soltústik-Ońtústik baǵytyndaǵy tranzıttik áleýetti arttyrady, shyǵystaǵy ózenderdiń áleýetin ıgerýge jol ashady. Bul óz kezeginde, jańartylatyn energııa kózderin damytý saıasaty aıasynda mańyzdy rólge ıe, – dep atap ótti B.Sársenov. – Budan bólek, jobany júzege asyrý barysynda taý-ken ónerkásibiniń elektr energııasyna degen suranysty qamtamasyz etýge múmkindik beretin Aqtoǵaı energııa torabynda 500 kV «Aqtoǵaı» qosalqy stansasy salynady. Sondaı-aq, «Aqtoǵaı – Almaty», «Aqtoǵaı – Dostyq», «Aqtoǵaı – Moıynty» baǵyttary boıynsha temir jol ýchaskelerin elektrlendirýge múmkindik týady».
Aıdar О́RISBAEV,
«Egemen Qazaqstan»