Ǵ.Jubanova atyndaǵy fılarmonııada Táýelsizdiktiń 25 jyldyǵyna oraı Aqtóbe qalalyq mádenıet jáne tilderdi damytý bólimi «Orkestrler sherýi» festıvalin ótkizdi. Festıvalge 7 orkestr qatysty, onyń ishinde Qaraǵandy oblysy Balqash qalasynan kelgen «Orfeı» fleıtashylar ansamblinen basqasy óz óńirimizden.
Festıvaldiń maqsaty úrlemeli jáne urmaly aspaptarda oryndaýshylardyń kásibı sheberligin arttyrý, úrlemeli aspaptar ansamblderi men orkestrleriniń shyǵarmashylyǵyn nasıhattaý bolyp tabylady.
Ansamblder arasynda Qaraǵandy oblysy, Balqash qalasynan kelgen «Orfeı» ansambli (kórkemdik jetekshisi Svetlana Shohataeva) I orynǵa ıe boldy. Ujymdar arasynda Q.Medetov atyndaǵy mýzyka mektebiniń úlgili estradalyq-sımfonııalyq balalar orkestri (kórkemdik jetekshisi A.Iаblýnovskıı) I oryndy jeńip aldy. Eki márte Keńester Odaǵynyń Batyry T.Bıgeldınov atyndaǵy Áýe qorǵanys kúshteri áskerı ınstıtýtynyń áskerı orkestri, A.Jubanov atyndaǵy mýzyka kolledjiniń úrlemeli aspaptar orkestri (kórkemdik jetekshisi Bekturǵan Dúısenbaev) festıval jeńimpazdary atandy.
Arnaýly oqý oryndary arasynda A.Jubanov atyndaǵy Aqtóbe mýzykalyq kolledjiniń «Bestau band» ansambli (kórkemdik jetekshisi Qýanysh Dúısenbaev), sol oqý ordasynyń taǵy bir ansambli «Bress-Quartet» (kórkemdik jetekshisi Maqsat Qarabasov) II oryndy enshiledi. Qatysqan orkestrlerdiń bári de júldeden qur qalǵan joq. Festıvaldiń sońy aqtóbelikter úshin orny bólek estradalyq úrlemeli aspaptar orkestriniń 35 jyldyq mereıtoıyna ulasty.
Satybaldy SÁÝIRBAI,
«EgemenQazaqstan»