Din isteri jáne azamattyq qoǵam vıse-mınıstri Berik Aryn 6-7 jeltoqsan aralyǵynda Túrkııaǵa issaparmen baryp, Túrkııa Premer-Mınıstriniń Keńsesi janyndaǵy Din isteri basqarmasynyń basshysy Mehmet Górmezben jáne Qorlar isteri jónindegi bas dırektoratynyń jetekshisi Adnan Ertemmen kezdesti, dep habarlady mınıstrliktiń baspasóz qyzmeti.
Kezdesýde memleket pen dinı birlestikterdiń ózara árekettestigi, dinı birlestikter men qorlardyń qyzmetin retteý jónindegi máseleleri talqylanyp, dinı ekstremızm jáne turǵyndar arasyna iritki salatyn ıdeıalardyń taralýyna jol bermeý taqyryby boıynsha pikir almasyldy.
Sonymen qatar, dinı saladaǵy yntymaqtastyqty jalǵastyrý jaıly, onyń ishinde qazaqstandyq ımamdardyń Túrkııanyń jetekshi teologııalyq oqý oryndarynda biliktilikterin arttyrý jóninde ýaǵdalastyqqa qol jetkizildi.
Issapar barysynda QR Din isteri jáne azamattyq qoǵam mınıstrliginiń Din máseleleri jónindegi ǵylymı-zertteý jáne taldaý ortalyǵy men Túrkııa Premer-Mınıstriniń Keńsesi janyndaǵy Din isteri basqarmasyna qarasty «ISLAM» Islam zertteýleriniń ortalyǵy arasyndaǵy Yntymaqtastyq týraly memorandýmǵa qol qoıyldy.