Elordadaǵy Astana Music Hall-da Qazaqstan Respýblıkasy Úkimetiniń «Daryn» memlekettik jastar syılyǵyna laıyqty azamattardy saltanatty túrde marapattaý rásimi ótti. Bul syılyq túrli salada júrip, óziniń bilim-biligimen, tabıǵı talantymen, belsendiligimen top jarǵan jastardy memleket tarapynan qoldaý maqsatynda eki jylda bir ret 10 atalym boıynsha berilip keledi.
Bıylǵy is-sharany Din isteri jáne azamattyq qoǵam mınıstrligi uıymdastyrǵandyqtan, oǵan vedomstvo basshysy Nurlan Ermekbaev, sonymen qatar, Parlament Májilisiniń depýtattary, memlekettik organdardyń ókilderi, qoǵam qaıratkerleri, úkimettik emes uıymdardyń basshylary, kolledjder men joǵary oqý oryndarynyń stýdentteri qatysty.
Saltanatty rásimde sóılegen sózinde Nurlan Ermekbaev: «Bul syılyq 1993 jyly Prezıdenttiń bastamasymen taǵaıyndalǵan bolatyn. Syılyqty berýdegi basty maqsat – ózderiniń asqan talantymen elimizdegi túrli salalardyń damýyna eńbek sińirip júrgen jastarymyzdy qanattandyrý, daryndylyǵymen, qabiletterimen kózge túsken jas býyndy marapattaý. Máselen, sportta, qoǵamdyq qyzmette, klassıkalyq mýzykada, ónerde ter tógip júrgen jastar kóp. Endeshe, «Daryn» memlekettik jastar syılyǵymen marapattaý arqyly biz mine, osyndaı jastardy qoldap, olardyń talanttarynyń odan ári jetilýine qosymsha kúsh-jiger bergimiz keledi», – deı kele, bul marapat Prezıdenttiń, memlekettiń jastarymyzǵa jasap otyrǵan qamqorlyǵynyń bir belgisi ekenin atap ótti.
Búginge deıin «Daryn» syılyǵyna ár jyldary elimizge keńinen tanymal adamdar qol jetkizip keldi. Olardyń arasynda Nurlan О́nerbaev, Qydyráli Bolmanov, Aıgúl Kemelbaeva, Olga Shıshıgına, Erbolat Qudaıbergenov, Bahtııar Artaev, Serik Sápıev syndy óner, shyǵarmashylyq, sport salalarynyń beldi ókilderi, «Muzart», «Báıterek», «Jigitter» toptary bar.
Bıyl da bul syılyqqa eń úzdik ári talantty jastar ǵylym, ádebıet, jýrnalıstıka, sport, halyq shyǵarmashylyǵy, dızaın jáne beıneleý óneri, estrada, teatr jáne kıno, klassıkalyq án, sondaı-aq, qoǵamdyq qyzmet atalymdary boıynsha marapattaldy.
Máselen, «Qoǵamdyq qyzmet» atalymy boıynsha syılyqqa Kámshat Qoskelova, Elına Paýlı, Oljas Sýleımenov jáne Jandos Tabylǵanov ıe boldy. «Sport» atalymynda «Daryn» syılyǵymen Dmıtrıı Balandın men Ádilbek Nııazymbetov marapattaldy. «Teatr jáne kıno» atalymynda Jasulan Erbolat, Eldar Otarbaev pen Asylhan Tólepov úzdik dep tanyldy. «Estrada» atalymyndaǵy syılyqty Qaırat Aıdarbekov, Álı Oqapov ıelendi. «Halyq shyǵarmashylyǵy» boıynsha «Daryn» syılyǵyn Jandarbek Bulǵaqov pen Sadjana Myrzalıeva enshiledi. Oljas Qasymov pen Manarbek Qydyrbaı «Ádebıet» atalymy boıynsha marapattalsa, «Ǵylym» atalymyndaǵy jastar syılyǵyn Daryn Bórgekov, Maqsat Jabaǵın, Abylaıhan Eskendirov, Artem Kozlovskıı men Aqnur Turǵymbaeva aldy. «Dızaın jáne beıneleý óneri» atalymyndaǵy syılyqtyń jalǵyz ıegeri Ásel Kemelbaeva boldy. «Jýrnalıstıka» atalymy boıynsha «Daryn» syılyǵyn Nursultan Qurmanov pen Irına Ten ıelendi. Al «Klassıkalyq mýzyka» atalymymen Rahat-Bı Abdysaǵın, Maqsat Júsipov jáne Azat Málik marapattaldy.
Barlyq jeńimpazdarǵa «Qazaqstan Úkimetiniń 2016 jylǵy «Daryn» memlekettik jastar syılyǵynyń ıegeri» ataǵy, dıplom, tósbelgi jáne aqshalaı syıaqy berildi.
Bul kúni jýrnalısterge bergen suhbatynda Dmıtrıı Balandın joǵary deńgeıdegi syılyqqa ıe bolý ózi úshin tosyn syı bolǵanyn jasyrmady. «Men bul syılyqtyń ıegeri ataný úshin eshqandaı qujat tapsyrǵan joqpyn. Ony Almaty qalasynyń ákimdigi jibergen bolýy kerek. Sondyqtan, bul marapat shynymen de, tosyn syı, kútpegen jaǵdaı boldy. Árıne, bul men úshin óte úlken qurmet, osyndaı marapatqa ıe bolǵanyma qýanyshym sheksiz. «Daryn» syılyǵyn ıelený maǵan úlken shabyt berip otyr», – deıdi Olımpıada chempıony.
Láıla Edilqyzy, "Egemen Qazaqstan".