AQSh-tyń jańadan saılanǵan prezıdenti Donald Tramp ataqty NBC telearnasynyń The Celebrity Apprentice (Tanymaldyń shákirti) realıtı shoýynyń atqarýshy prodıýseri qyzmetine keldi, dep habarlaıdy BBC.
Tramp 2008-2015 jyldar aralyǵynda osy baǵdarlamanyń júrgizýshisi bolǵanyn eske sala keteıik. Alaıda ótken jyldyń jazynda Tramptyń meksıkalyqtarǵa qatysty saılaýaldy sózinde aıtqan daýly málimdemesinen keıin telearna onymen kelisimshartty buzǵan edi. Odan keıin baǵdarlama múlde toqtaǵan.
Baǵdarlamanyń jańa shyǵarylymdary 2017 jyldyń 2 qańtarynan bastalady. 15 maýsymnyń júrgizýshisi gollıvýdtyq akter, Kalıfornııa shtatynyń burynǵy basshysy Arnold Shvarsenegger bolmaq.
The Celebrity Apprentice shoýyna ár túrli ataqty adamdar kelip, belgili bir qaıyrymdylyq sharalaryna barynsha kóp aqsha jınaý úshin saıysqa túsedi. Tramptyń bul kelisimsharty ázirge egjeı-tegjeıli aıtylmaıdy. Naqtyraq aıtar bolsaq, prezıdenttiń bul jumystan qansha jalaqy alatyny belgisiz. Esterińizge sala keteıik, sál erterekte Tramp prezıdenttikpen birge óziniń bıznesin qatar alyp júrmeıtinin aıtqan edi.