Búgin Parlament Senatynyń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine mindetti áleýmettik medısınalyq saqtandyrý máseleleri boıynsha ózgerister men tolyqtyrýlar engizý týraly» zań jobasyn eki oqylymda talqylap, qujatty qabyldady, dep habarlaıdy QazAqparat.
QR zań jobasyn tanystyrý barysyndaǵy Densaýlyq saqtaý jáne áleýmettik damý mınıstri Tamara Dúısenovanyń sózine qaraǵanda, engizilip otyrǵan ózgeristerge sáıkes bekitilgen merzim jarty jylǵa shegerilýde. Osy rette jumys berýshiler, jeke kásipkerler, jeke notarıýstardyń, jeke sot oryndaýshylardyń, advokattardyń, jeke tulǵalardyń aýdarymdary men jarnalaryn tóleý merzimi 2017 jyldyń 1 qańtarynan emes, 1 shildesinen iske asyryla bastaıdy. Sonymen qatar memleket halyqtyń belsendi emes bóligi úshin jarnany jarty jylǵa keıin tóleıdi, ıaǵnı 2018 jyldyń 1 qańtarynan bastap tólem jasaıdy. Ekinshiden, tólemder men jarnalardyń júıege túsý merzimi alty aıǵa shegerilgendikten, sáıkesinshe, júıede kórsetiletin medısınalyq kómekke aqy tóleý jarty jylǵa uzartylady (2018 jyldyń 1 qańtarynan bastap).
Budan buryn habarlanǵandaı, osy merzimde qor men onyń fılıaldary qurylady, densaýlyq saqtaý shyǵyndary respýblıkalyq deńgeıde shoǵyrlanady. Bul turǵyda Qor medısınalyq qyzmetterdiń biryńǵaı strategııalyq satyp alýshysy retinde qyzmet etedi. Atalǵan merzimdi uzartýǵa bıýdjettik zańnamadaǵy ózgerister yqpal etti. Zań jobasy qarastyratyn taǵy bir máselege toqtalatyn bolsaq, mektep medısınasyn bilim berý júıesinen densaýlyq saqtaý salasyna aýystyrýǵa baılanysty.
2018 jyldyń 1 qańtarynan bastap memleket balalar úshin medısınalyq saqtandyrý qoryna jarnalardy tóleıdi. Sondyqtan balalarǵa medısınalyq kómek kórsetý kelesi jyldan medısınalyq saqtandyrý qorynan iske asyrylady. Mektep medısınasyn jaýapty vedomstvoǵa aýystyrý aıasynda uıymdastyrýshylyq ózgerister qamtylady. Osy oraıda endi bilim berý júıesindegi medısınalyq pýnkter emhanalardyń qurylymdyq bólimsheleri bolady. Al medısınalyq mamandar shtattaǵy qyzmetkerler qataryna engiziledi.