Ońtústik Koreıa parlamenti daýys berý qorytyndysy boıynsha el prezıdenti Pak Kyn Hege ımpıchment jarııalady, - dep habarlaıdy RIA Novostı.
Ulttyq jıynnyń 234 depýtaty qoldap daýys berdi, 56-sy qarsy boldy. Eki depýtat daýys berýden bas tartty. Jeti túbirtek jaramsyz dep tanyldy. Ońtústikkoreıalyq telearna otyrystan tikeleı taratylym júrgizdi.
Prezıdentti bılikten ketirýge Pak Kyn He men onyń burynǵy tanysy Soı Sýn Sıldiń aınalasyndaǵy jemqorlyq daýy sebep bolǵan. Tanysy baılanystaryn paıdakúnemdik maqsatta qoldanyp, memlekettik isterge prezıdent pen onyń ákimshiligi arqyly aralasqan delinedi.
Endi ımpıchment bekitilýi tıis nemese Ońtústik Koreıanyń Konstıtýsııalyq soty ony keri qaıtarýy múmkin.