Búgin qala ákimi N. Nálibaevtyń tóraǵalyǵymen ótken ákimdik májiliste qala ákimi Nurlybek Mashbekuly kadrlyq ózgeriske toqtaldy. Buǵan deıin qala ákiminiń orynbasary qyzmetin atqaryp kelgen Jálıev Nurhan Buharbaıuly jaqynda ǵana Elbasynyń Jarlyǵymen qurylǵan QR Din isteri jáne azamattyq qoǵam mınıstrliginiń «Taldaý jáne strategııalyq josparlaý departamenti» dırektorynyń orynbasary qyzmetine taǵaıyndaldy, dep habarlaıdy qala ákimdiginiń baspasóz qyzmeti.
"Nurhan Buharbaıuly qyzmet jolynda óziniń iskerligi men biliktiliginiń arqasynda túrli salalarda jemisti eńbek etip, aımaǵymyzdyń áleýmettik jáne ekonomıkalyq áleýetiniń artýyna erekshe úles qosyp júrgen, saıası tehnologııalardy jáne ıdeologııa salasyn jetik meńgergen maman retinde, tapsyrylǵan barlyq qyzmetterdi abyroıly atqardy"- degen qala ákimi, N.Jálıevke barsha áriptesteriniń atynan alǵysyn bildirip, jańa qyzmetine sáttilik tiledi.
Sonymen qatar, «Qyzylorda qalasynyń áleýmettik-ekonomıkalyq damýy men óńirdiń qoǵamdyq-saıası, mádenı-rýhanı ómiriniń ósip-órkendeýine qosqan úlesi jáne abyroıly eńbegi úshin» qala ákimdiginiń «Qurmet» gramotasymen marapattady.