Sh.Aımanov atyndaǵy «Qazaqfılm» AQ jaryqqa shyǵarǵan kınotýyndylar Úndistandaǵy Kerala shtatynyń astanasy Tırývanantapýrama qalasynda jeltoqsannyń 9-y men 16-y aralyǵynda ótetin 21-shi Halyqaralyq úndi kınofestıvalinde - aıtýly oqıǵa - «Qazaqstanǵa nazar salý» baǵdarlamasy aıasynda kórsetiletin bolady, dep habarlady kazakhfilmstudios.kz.
Festıval sheńberinde «Qazaqfılm» kınostýdııasynyń ár jyldary túsirilgen fılmderi kórsetiledi, atap aıtsaq: «Kelin» (rej. E.Tursynov), «Shal» (rej. E.Tursynov), «Stýdent» (rej. D.О́mirbaev), sondaı-aq QR Mádenıet jáne sport mınıstrligi tapsyrysy boıynsha «SAQ» stýdııasy túsirgen «Qazaq eli» anımasııalyq fılmi (rej. B.Dáýrenbekov). Sonymen qatar, festıval sheńberinde Serik Aprymovtyń «Ańshy» jáne «Baýyr» fılmderi kórsetiledi.
Bul kartınalardy úndi kórermenderine rejısserdiń ózi tanystyratyn bolady. Aıta ketetin jaıt, Serik Aprymov festıvaldiń halyqaralyq qazylar alqasynyń quramyna kirip, belgııalyq rejısser Mıshel Hleıfı (qazylar alqasynyń tóraǵasy), Úndistannyń teatr jáne kıno aktrısasy Sıma Bısvas, ırandyq aktrısa Baran Kosarı jáne festıvaldiń baǵdarlamalar dırektory Pedro Pımentamen birge festıvaldiń úzdik fılmin anyqtaıtyn bolady. Halyqaralyq qazylar alqasymen qatar kınosynshylardan quralǵan - FIPRESSI jáne NETPAK qazylar alqasy da jumys isteıdi. Bıyl festıval barysynda 62 memleketten kelgen 185 kartına kórsetiledi.
1996 jyldan beri ótkizilip jatqan Halyqaralyq úndi kınofestıvali Úndistanda ótkizilip júrgen mańyzdy mádenı is-sharalardyń biri. Baıqaýdyń uıymdastyrýshylary - Kerala shtatynyń Mádenıet mınıstrliginiń qoldaýymen «Chalachitra» kınoakademııasy. Festıval Halyqaralyq kınoprodıýserler assosıasııasy federasııasynda 1999 jyly tirkelgen bolatyn.