Elbasy Nursultan Nazarbaev «25 kz qazirgi zaman tarıxy» derekti fılminde Astanadaǵy Senat, Úkimet jáne ózge de ǵımarattar kimniń qarajatyna salynǵanyn aıtyp berdi, dep xabarlaıdy QazAqparat.
«Astanada ornalasqan Senattyń ǵımaraty arab aqshasyna salyndy. Sultan hanzada 15 mıllıon dollar syılyq retinde berdi. Ol taǵy kardıologııalyq ortalyqtyń qurylysyna aqsha bóldi. Qazaqstan Úkimeti ǵımaratyn salýǵa elimizdegi munaı konsorsıýmdary 25 mıllıon dollar bóldi. Olardy elordamyzdyń qurylysyna qosqan úlesterińiz bolsyn dep men suradym. Kýveıt salǵan ǵımarat bar. Eski qalada qazir onda Aýyl sharýashylyǵy mınıstrligi ornalasqan. Burynǵy ákimdik. Ol kezde olar ákimdik qurylysyn júrgizý úshin 15 mıllıon dollar bergen edi.
«Saltanat saraıy» ǵımaratyna Oman basshysy 10 mıllıon dollarlyq chekti jazyp berdi. Ol chektiń tarıxy úlken. Men basqarýshyǵa chekti berip edim, ol qarajatty ne úshin jumsaımyz dep abdyrap qaldy, men «bar, Saltanat saraıyn sal» dedim. Túrik kompanııalary, qalǵandary da bizge qoldaý jasady. Barlyǵy 300 mıllıon dollar ınvestısııa tartyldy», - dedi Elbasy atalmysh fılmde.
Aıta keteıik, Astana qalasy qazir el bıýdjetine qarajat túsirip otyrǵan Qazaqstandaǵy donor qalalardyń biri. Elorda xalqy bıyl 1 mıllıon adamǵa jetti jáne elimizdiń brendine aınaldy. Qaladaǵy barlyq mańyzdy ǵımarattar men nysandar Elbasynyń jeke qatysýymen ashylady.