«Ońtústik» aımaqtyq ınvestısııalyq ortalyǵy 2009 jyldan beri 14 myńǵa jýyq jobaǵa qoldaý jasap, jumys jasaımyn degenderdiń qolyna balyq emes, qarmaq ustatty. Buǵan deıin «Maksımým» AIO atalyp kelgen ortalyq kúngeı aımaqtyń ımıdjin kóterý úshin «Ońtústik» atyna aýystyrylǵan edi.
OQO aımaqtyq kommýnıkasııalar qyzmetinde ótken brıfıngte «Ońtústik» AIO tóraǵasy Arman Danaev búginge deıin jalpy somasy 5 429,9 mln teńge bolatyn 4 114 jumys orny ashylatyn 1 608 joba qarjylandyrylǵanyn aıtty. Atalǵan jobalar iske qosylǵan ýaqytta jyl saıyn 23 mlrd teńgeniń ónimi óndiriledi dep josparlanýda.
«Ońtústik» AIO ındýstrııalandyrý kartasyna engen 6 joba, mal sharýashylyǵyn damytý baǵytynda 661, kóktemgi dala jumystary boıynsha 839, ıntensıvti baý sharýashylyǵy boıynsha 2 joba, al aýylsharýashylyq ónimderin qaıta óńdeý salasy boıynsha 3 joba jáne basqa da baǵyttarda 97 jobaǵa qarjylaı qoldaý kórsetken.
Jalpy, 2009-2016 jyldary «Ońtústik» aımaqtyq ınvestısııalyq ortalyǵy men enshiles «Yrys» mıkroqarjy uıymy birlese otyryp jalpy quny 41 889 mln teńgeni quraıtyn 13 921 jobany qarjylandyrdy. Nátıjesinde 36 419 jańa jumys orny ashyldy.
2016 jyly ortalyq qarjylandyrǵan jobalarynyń aýdan, qala kesindisi boıynsha qazirgi tańda Ordabasy aýdany eń joǵary kórsetkishpen tirkelip otyr. Iаǵnı bıyl atalǵan aýdanda 126 joba 1 214,0 mln teńgege nesıelendirilgen.
Sondaı-aq, kompanııa basshylyǵy aldaǵy jylǵa óz aldyna birqatar mindettemeler men josparlar qoıyp otyrǵandyǵyn málim etti. Aıtylǵan derekter boıynsha, ortalyq qosymsha eki jańa baǵdarlama ázirlep usynýdy josparlap otyr. Olar – aýylsharýashylyq ónimderin óńdeý jáne bıznes ınkýbator baǵdarlamalary.
Baqtııar TAIJAN,
«Egemen Qazaqstan»
Ońtústik Qazaqstan oblysy