Premer-mınıstrdiń orynbasary – Ulttyq ekonomıka mınıstri Serik Jumanǵarın Qarjy mınıstrliginiń keńeıtilgen alqasyna qatysyp, bıýdjet-salyq saıasatynyń basymdyqtaryn belgiledi.
Vıse-premer vedomstvonyń memlekettik qarjynyń turaqtylyǵyn qamtamasyz etýge qosqan úlesin atap ótip, qyzmetkerlerdiń jas býyny eldiń bıýdjet júıesin tıimdi basqarý jumysyn laıyqty jalǵastyryp kele jatqanyn jetkizdi.
Onyń aıtýynsha, Úkimettiń ekonomıkalyq bloginiń aldynda aýqymdy mindet tur. Ony júzege asyrý kóbine Qarjy mınıstrliginiń júıeli ári maqsatty jumysyna baılanysty.
«О́tken jyly memlekettik qarjyny shoǵyrlandyrýǵa arnalǵan bıýdjet-salyq reformasy júrgizildi. Búginde ony júzege asyrýda Qarjy mınıstrligi sheshýshi ról atqarady. Memlekettiń áleýmettik baǵdaryn saqtaı otyryp, bıýdjet shyǵystaryn qatań tekserip otyrýymyz qajet», dedi S.Jumanǵarın.
Bıylǵy basymdyqtyń biri – tıimsiz shyǵystardy anyqtap, bıýdjettik baǵdarlamalardy ońtaılandyrý maqsatynda jan-jaqty qaıta qaraý. Salyqtyq ákimshilendirýge erekshe kóńil bólinedi. Bıyl 4 trln teńgeden astam salyq túsirý mindeti qoıyldy. Bul rette ákimshilendirý sıfrlyq quraldarǵa negizdelip, ádil bolyp qalýǵa ári bızneske artyq qysym jasamaýǵa tıis.
Sonymen qatar Serik Jumanǵarın qarjy bloginiń sıfrlyq transformasııasy júıelik sıpat alǵanyn atap ótti. «Smart Data Finance» taldamalyq bazasy qurylyp, salyq tóleýshilerdiń qyzmetin qadaǵalaý júıesi engizildi. Bul rette barlyq sıfrlyq sheshim úzdiksiz jumys isteýge tıis. Sebebi salyqtyq basqarýdyń jańa modeli sıfrlyq qyzmettiń sapasyna tikeleı qatysty.
Sondaı-aq alqa barysynda bıznesti jańa Salyq kodeksine birtindep beıimdeý úshin «Taza paraq» bir rettik aksııasy júzege asyrylyp, Salyq kodeksiniń jańa normalaryn ımplementasııalaý máselesi Jobalyq keńse sheńberinde apta saıyn talqylanatyny aıtyldy.
Mıkro jáne shaǵyn bıznes bıyl 1 sáýirge deıin negizgi boryshyn ótegen jaǵdaıda, ósimpul men aıyppuldy eseptemeı, jeńildetilgen joıý rásimin paıdalana alady. QQS boıynsha esepke ýaqtyly qoıylmaǵany úshin salynatyn aıyppul da joıylady.
Salyq qatynastaryn qaıta iske qosý sheńberinde: 2025 jylǵy 17 jeltoqsanǵa deıin usynylǵan esep berý boıynsha, 2026 jylǵy 1 qańtarǵa deıingi kezeńdegi mindettemege kameraldyq baqylaý toqtatyldy; 2026 jylǵy 1 qańtarǵa deıin salyq kezeńderi boıynsha salyqtyq tekserýler men ákimshilik jazalar toqtatyldy; 2026 jylǵy 1 qańtarǵa deıin jasalǵan mámileler men tirkeýlerdi jaramsyz dep taný týraly talap qoıý toqtatyldy.
Bul sharalar salyq tóleý eriktiligin arttyryp, memleket pen bıznestiń jańa ózara is-qımyly úlgisin qalyptastyrýǵa arnalǵan.
Bıyl salyq júıesin sıfrlandyrý jalǵasady. Ońaılatylǵan deklarasııany avtomattandyrý, salyq eseptiligi nysandaryn aldyn ala toltyrý, salyq tóleýshilerge arnap JI-servıs engizý, Memlekettik kirister komıtetiniń derekqoryn basqa vedomstvolarmen ıntegrasııalaý josparlanǵan. Zańdy tulǵalarǵa tólemderdi avtomatty túrde esepten shyǵaratyn «Salyq ámııany» tetigi engiziledi.
«Sıfrlyq QQS» jobasy sheńberinde negizgi aqparattyq júıelerdi ıntegrasııalaý jalǵasady. Memlekettik satyp alý salasynda sıfrlyq teńge qoldanylatyn qanatqaqty jobany iske qosý kózdelip otyr.
Qazir memlekettik kirister organdary 42 qyzmet túrin kórsetedi. Onyń 39-y (92%) elektrondyq formatqa aýystyryldy. 13 qyzmet tolyq avtomattandyrylǵan, 37-sine eGov.kz portalynda qol jetkizýge bolady. Bıznesti súıemeldeýdiń proaktıvti servıstik úlgisine kóshý jumysy odan ári jalǵasady.