Nursultan Nazarbaevtyń atyna Qazaqstan Respýblıkasy Táýelsizdiginiń 25 jyldyǵyna oraı shet memleketter basshylarynan quttyqtaýlar kelip túsýde, dep habarlady Qazaqstan Respýblıkasy Prezıdentiniń baspasóz qyzmeti.
Merekelik jedelhattarda eldiń ótken kezeńdegi tabystary jáne Qazaqstan Prezıdentiniń egemen memleket qalyptastyrý men damytýdaǵy róli atap kórsetiledi.
Belarýs Prezıdenti Aleksandr Lýkashenko Qazaqstan basshysyn bizdiń respýblıka tarıhyndaǵy aıtýly kúnmen shyn júrekten quttyqtaıdy.
«Sizdiń basshylyǵyńyzben osy jyldary kúshti memleket, sondaı-aq jańa serpindi ekonomıka quryldy. Qoǵamdyq kelisim men jaýapkershilikti syrtqy saıası baǵyt eldiń joǵary halyqaralyq bedelin qamtamasyz etti. Belarýs-Qazaqstan baılanystaryn dostyq jáne ózara túsinistik negizinde jan-jaqty nyǵaıtý bizdiń elderimiz halyqtarynyń umtylystaryna tolyq kóleminde jaýap beretinine senimdimin», – dep atap ótiledi Belarýs Prezıdentiniń quttyqtaýynda.
Sıngapýr Respýblıkasynyń Prezıdenti Tonı Tan Keng Iаm eki el arasynda qalyptasqan dostyq ráýishtegi qarym-qatynastar ózara is-qımyldardy ekonomıkanyń túrli salalarynda dáıektilikpen damytyp kele jatqanyn atap kórsetedi.
«Nursultan Nazarbaevtyń tikeleı basshylyǵymen respýblıka buǵan deıin bolyp kórmegen nátıjelerge qol jetkizdi. Qazaqstan óńirlik beıbitshilik pen turaqtylyqqa qosyp kele jatqan úlesiniń arqasynda halyqaralyq arenada mańyzdy ról atqarady. Sıngapýr aldaǵy jyly ótetin EKSPO-2017 halyqaralyq kórmesiniń ashylýyn taǵatsyzdana kútip otyr jáne oǵan belsendi túrde qatysatyn bolady», – delingen Sıngapýr Prezıdentiniń hatynda.
Belgııa Koroli Fılıpp óziniń quttyqtaýynda bizdiń elderimizdiń arasyndaǵy yntymaqtastyqty ári qaraı nyǵaıtý nátıjesi eki el halyqtarynyń múddesine qyzmet etetinine úmit bildiredi.
Avstralııanyń general-gýbernatory Pıter Kosgroýv qazaqstandyqtardy mereıtoıly datamen, sondaı-aq respýblıkanyń BUU Qaýipsizdik Keńesiniń turaqty emes músheligine saılanýymen quttyqtaıdy.
«25 jyl ishinde Qazaqstan men Avstralııa túrli salada aıtarlyqtaı tıimdi yntymaqtastyq qalyptastyrdy. Men ekijaqty qarym-qatynastardy ári qaraı da nyǵaıtý maqsatynda bizdiń barlyq qajetti sharany qabyldaıtynymyzǵa senemin», – dep atap ótiledi Avstralııa general-gýbernatorynyń hatynda.
Qazaqstan halqyna ıgilik pen ósip-órkendeý tilegen mazmundaǵy Táýelsizdik kúnimen quttyqtaýlar, sondaı-aq Nıderland Koroli Vıllem-Aleksandr men Rýmynııa Prezıdenti Klaýs Verner Iohanısten de keldi.