Keıki batyrdyń bas súıeginen qalpyna keltirilgen sýreti ázirlendi. Atalmysh sýretterdi qoǵam qaıratkeri, saıasattanýshy Berik Ábdiǵalıuly Feısbýktegi paraqshasynda jarııa etti.
Aıtaıyq, osy jyldyń qazan aıynda Majarstanda Keıki batyrdyń bas súıegin qalpyna keltirý jumystary bastalǵan bolatyn. Vengrııanyń jaratylystaný ǵylymdary mýzeıiniń antropologııalyq bólimine jetekshilik etetin Agnesh Kýshtar Keıki batyrdyń bas súıegin qalpyna keltirý jumystaryn óz basshylyǵyna alǵan edi.
Berik Ábdiǵalıulynyń aıtýynsha, antropologter batyrdyń bet kelbetin jasap bolǵasyn, shamamen 1-2 aı kóleminde bas súıek jer qoınyna beriledi. Memlekettik komıssııa Keıki batyrdyń súıegin onyń týǵan jeri Qostanaı oblysy Amangeldi aýdanynyń Tasty aýylynda batyrǵa arnap salynǵan mazarǵa jerleý týraly sheshim qabyldaǵan bolatyn. Budan buryn habarlanǵandaı, 6 qazan kúni Keıki batyrdyń bas súıegi Reseıden Qazaqstanǵa jetkizildi. Ol 93 jyl boıy Sankt-Peterbor qalasyndaǵy Kýnstkamerada saqtalyp keldi.