...Erte erte ertede aıdaharǵa aınalyp kele jatqan ábjylan oıanyp ketip, jer betine shyǵyp, mańaıyn jalmap, úlken apat, úreı týǵyzady. Aýyldardy otqa orap, qarsy kelgendi qaqyratyp kele jatqanda, bir qyran búrkit balapanyn qorǵap, onymen aıqasyp, aqyry ábjylan qaıta jer astyna qulap, joq bolady. Al qyran otqa oranǵan uıadan balapanyn alyp, alysqa ushyp ketedi. Adam jutyp dánikken ábjylan Kún tutylyp, óziniń aıdaharǵa aınalar sátin asyǵa kútedi. Al bul aıdahardy jeńe alatyn tek baıaǵy balapan – Muzbalaq qana.
Bul kúnderi Sh.Aımanov atyndaǵy «Qazaqfılm» AQ ótken jyly óndiriske jibergen «Muzbalaq» tolyqmetrajdy anımasııalyq fılminiń túsirilim jumystary jalǵastyrýda. Turdybek Maıdan men Tilek Tóleýǵazy rejısserlik jasap jatqan «Muzbalaqtyń» ekranǵa shyǵýy qazaq mýltıplıkasııasynyń 50 jyldyǵyna sáıkes, 2017 jyldyń kúzinde aıaqtalady dep josparlanýda.
Sondaı-aq, «Qazaqfılm» kınostýdııasynyń negizinde jasalǵan «Anımasııalyq kıno» shyǵarmashylyq-óndiristik birlestiginde óndiriske jibergeli otyrǵan «Kúltegin» tolyqmetrajdy mýltfılminiń daıyndyq jumystary bastaldy.
Ulttyq stýdııanyń «Anımasııalyq kıno» shyǵarmashylyq-óndiristik birlestigi 2009 jyldan beri jumys isteıdi. Osy aralyqta 36 qysqametrajdy anımasııalyq fılm (jylyna orta eseppen 6 fılmnen), sondaı-aq, qazaq anımasııasy tarıhynda tuńǵysh ret 3D formatynda «Er Tóstik jáne Aıdahar» tolyqmetrajdy anımasııalyq fılmi túsirildi.
О́tken jyly Sh.Aımanov atyndaǵy «Qazaqfılm» kınostýdııasy «Qazaqstan – bizdiń ortaq shańyraǵymyz» atty anımasııalyq fılm toptamasynyń tusaýyn kesti. Bul túrli halyqtardyń eń qyzyq áńgimelerin toptastyrǵan árqıly ertegilerdiń biregeı jınaǵy bolyp tabylady. Atalǵan anımasııalyq toptamanyń Qazaqstan halqy Assambleıasynyń 20 jyldyǵyna arnalǵan kirispe bólimi elimizdiń tarıhy men mádenıeti jaıynda, sondaı-aq, beıbitshilik pen kelisim jaǵdaıynda 130-dan astam ulttar men ulystar ómir súrip jatqan qazirgi táýelsiz Qazaqstan jaıly baıandaıdy. Qalǵan segiz fılm halyq ertegileriniń jelisi boıynsha jasalǵan.
Aınash ESALI,
«Egemen Qazaqstan»
ALMATY