Qazaqstan Respýblıkasy Prezıdentiniń № 387 Jarlyǵyna TÚSINDIRME

Qazaqstan Respýblıkasy Prezıdentiniń Jarlyǵy Qazaqstan Respýblıkasyndaǵy bas bostandyǵynan aıyrý oryndarynan bosatylǵan jáne probasııa qyzmetinde esepte turǵan azamattardy áleýmettik ońaltýdyń 2017-2019 jyldarǵa arnalǵan keshendi strategııasyn bekitý týraly Bas bostandyǵynan aıyrý oryndarynan bosatylǵan jáne probasııa qyzmetinde esepte turǵan azamattardy áleýmettik ońaltýdyń tıimdi keshendi júıesin qalyptastyrý maqsatynda QAÝLY ETEMIN: 1. Qazaqstan Respýblıkasyndaǵy bas bostandyǵynan aıyrý oryndarynan bosatylǵan jáne probasııa qyzmetinde esepte turǵan azamattardy áleýmettik ońaltýdyń 2017-2019 jyldarǵa arnalǵan keshendi strategııasy (budan ári – Keshendi strategııa) bekitilsin. 2. Qazaqstan Respýblıkasynyń Úkimeti ortalyq memlekettik organdarmen jáne jergilikti atqarýshy organdarmen birlesip: 1) 2016 jylǵy 31 jeltoqsanǵa deıin Keshendi strategııany iske asyrý jónindegi is-sharalar josparyn ázirlesin jáne bekitsin; 2) osy Jarlyqtan týyndaıtyn ózge de sharalardy qabyldasyn. 3. Osy Jarlyqtyń oryndalýyn baqylaý Qazaqstan Respýblıkasy Prezıdentiniń Ákimshiligine júktelsin. 4. Osy Jarlyq qol qoıylǵan kúninen bastap qoldanysqa engiziledi jáne resmı jarııalanýǵa tıis. Qazaqstan Respýblıkasynyń Prezıdenti  N.NAZARBAEV Astana, Aqorda, 2016 jylǵy 8 jeltoqsan  № 387

«Qazaqstan Respýblıkasynda bas bostandyǵynan aıyrý oryndarynan bosatylǵan jáne probasııa qyzmetinde esepte turǵan azamattardy áleýmettik ońaltýdyń 2017-2019 jyldarǵa arnalǵan keshendi strategııasyn bekitý týraly» Qazaqstan Respýblıkasy Prezıdentiniń 2016 jylǵy 8 jeltoqsandaǵy №387 Jarlyǵyna   TÚSINDIRME

Jarlyq 100 naqty qadam – Ult josparynyń 33-qadamyn iske asyrý maqsatynda ázirlendi. Keshendi strategııanyń maqsaty – bas bostandyǵynan aıyrý oryndarynan bosatylǵan jáne probasııa qyzmetinde esepte turǵan adamdardy keshendi áleýmetke qosýdyń ulttyq júıesin qurý, ony tıimdi iske asyrý úshin qaıtalap qylmys jasaý deńgeıin azaıtýǵa yqpal etetin jaǵdaılar jasaý bolyp tabylady. Keshendi strategııanyń negizgi mindetteri bolyp: 1) áleýmetke qosýdyń uıymdastyrýshylyq negizderin jáne normatıvtik quqyqtyq bazany jetildirý; 2) bas bostandyǵynan aıyrý oryndarynan bosatylǵan jáne probasııa qyzmetinde esepte turǵan azamattardy áleýmetke qosý prosesin jaqsartý úshin jaǵdaılar jasaý; 3) áleýmettik súıemeldeý júıesin qurý arqyly sottalǵandardy áleýmettik beıimdeý tetigin jetildirý; 4) kadr áleýetin jáne áleýmetke qosý prosesiniń ǵylymı negizderin damytý bolyp tabylady. Keshendi strategııa erejelerin iske asyrý kezeń-kezeńmen júzege asyrylady jáne Qazaqstan Respýblıkasynyń Úkimeti bekitetin Is-sharalar josparymen qamtamasyz etiledi. Jospardy iske asyrý boıynsha memlekettik organdar qyzmetiniń ashyqtyǵy qol jetkizilgen nátıjeler týraly qoǵamdyq pikirdi monıtorıngteý nátıjelerin esepke alýmen, olardyń is-sharalardy oryndaý barysy týraly ashyq eseptilikpen qamtamasyz etiledi. Qazaqstan Respýblıkasy Prezıdenti Ákimshiliginiń Quqyq qorǵaý júıesi bólimi