2005 jyldan bastap Izraılden Qazaqstanǵa kelgen tikeleı ınvestısııalar kólemi 214 mıllıon AQSh dollaryn qurady. Bul týraly búgin Astana qalasynda Qazaqstan-Izraıl bıznes-forýmynda «KAZNEX INVEST» eksport jáne ınvestısııalar ulttyq agenttigi» AQ basqarma tóraǵasy Borısbıı Janqorazov málimdedi. Ol eki eldiń saýda-sattyq salasynda tyǵyz qarym-qatynas ornatqanyn málimdedi.
«2005 jyldan bastap kúni keshege deıin Izraılden Bul – qarjy, kepildendirý, medısınalyq qyzmet kórsetý jáne basqa da salalar boıynsha tartylǵan qarajat. Biz ızraıldik joǵary tehnologııaly kompanııalardy Qazaqstan ekonomıkasyna engizbekpiz. Sebebi, Izraıl – álemdegi ınnovasııalyq tehnologııalardy jetik meńgergen elderdiń biri. Sondyqtan qazaqstandyq kásipkerlerge bul sala qyzyqty dep oılaımyn», dedi ol.
Bıznes forým barysynda Borısbıı Janqorazov qos el arasyndaǵy saýda aınalymy sońǵy on jylda 6,3 mıllıard AQSh dollaryna jetkenin aıtty. «Sońǵy ýaqytty saýda aınalymynyń kórsetkishi birshama tómendedi. Biraq, bul ýaqytsha jaǵdaı dep oılaımyn. Byltyr Qazaqstan men Izraıl arasyndaǵy saýda aınalymy 306 mıllıon AQSh dollaryn qurady. Mundaǵy qazaqstandyq eksporttyń úlesi – 219 mıllıon dollar bolsa, ımport – 86,9 mıllıon dollar. Al bıylǵy 9 aıda qos memleket arasynda 237 mıllıon dollar kóleminde saýda-sattyq jasaldy», degen «KAZNEX INVEST» ókili elimiz Izraılge kóbinese munaı ónimderin, túrli shıkizattardy eksporttaıtynyn jetkizdi. Al Izraılden Qazaqstanǵa uıaly telefondar, navıgasııa júıeleri jáne joǵary tehnologııaly ónimder ákelinedi eken.
Basqarma tóraǵasy elimizdi ınnovasııalyq memleketke aınaldyrý jolynda tıisti sharalar júrgizilip jatqandyǵyn da áńgimeledi. Onyń aıtýynsha, Úkimet alty jyldan beri Indýstrııalyq ınnovasııa baǵdarlamasy aıasynda jumys isteýde. Baǵdarlama boıynsha 6 negizgi sala anyqtaldy. Olar – metallýrgııa, munaı óńdeý, mashına jasaý, hımııa ónerkásibi jáne azyq-túlik ónimderin shyǵarý. Osy salalardaǵy kásipkerler arasynda básekelestik basym bolady.
Esterińizge sala ketsek, búgin ótken Qazaqstan-Izraıl bıznes-forýmy Izraıl Premer-Mınıstri Benıamın Netanıahýdyń elimizge resmı sapary aıasynda uıymdastyrylǵan. Oǵan eki memlekettiń ókilderi men isker toptary qatysty. Qos taraptyń saýda-ekonomıkalyq, ınvestısııalyq yntymaqtastyǵyn nyǵaıtý jáne birlesken jobalardy iske asyrý maqsatyndaǵy sharada jańa múmkindikter keńinen talqylandy.
Ashat RAIQUL, "Egemen Qazaqstan".