Ishki ister mınıstrliginiń málimetine sáıkes, osy ýaqytqa deıin qyzmette júrgen 764 tártip saqshysy qaza tapty. Solardyń ishinde 115 ulan men polıseıdiń otbasyna memlekettik nagradalar tabystaldy, dep habarlaıdy QazAqparat.
«Jalpy, Táýelsizdik alǵannan beri qyzmet babyndaǵy erligi men janqııarlyǵy úshin 1 093 qyzmetker marapattaldy. Olardyń ishinde qaza bolǵan ulttyq ulan men ishki ister organdarynyń 115 qyzmetkeri bar. Oǵan qosa, bıyl Táýelsizdiktiń 25 jyldyǵyna oraı ishki ister organdary men Ulttyq ulannyń 54 qyzmetkeri memlekettik nagradamen, sondaı-aq 659 adam vedomstvolyq nagradalarmen, dıplomdarmen marapattakdy», - delingen resmı habarlamada.
Aıta keteıik, 25 jyldyń ishinde ishki ister organdarynyń eki qyzmetkeri «Halyq Qaharmany» ataǵymen marapattalǵan bolatyn. Olardyń bireýi - Ǵazız Baıtasov. 2011 jyly ol Tarazdaǵy lańkesti ustaý operasııasy barysynda granatany óz denesimen jaýyp, erlikpen qaza tapqan edi.
Budan bólek, bıyl Aqtóbe men Almatydaǵy terrorlyq áreketter kezinde oqqa ushqan polıseılerdiń otbasylaryna memlekettik jáne úkimettik nagradalar tabystalatyn bolady.
«Negizi, bizde adamdy qutqaramyn dep, opat bolǵan polıseıler az emes. Bireýdi pyshaqtap ketedi, endi bireýi júk mashınasyn óz kóligimen toqtatyp, adam qutqarǵan. Ondaı mysaldar kóp. Olardyń barlyǵy - búgingi kúnniń qaharmandary», - deıdi polıseıler.