Jánibek Álimhanuly: Maqsatym – Tokıoda top jarý

Pavlodarda ótken bokstan Qazaqstan chempıonatynda Jánibek Álimhanuly 81 kıloda jeńiske jetip, týrnırdiń eń úzdik boksshysy atandy. Osy birinshilikten keıin biz onymen habarlasyp, áńgimege tartqan edik.  – Jánibek, jaz aıynda ótken Rıo-de-Janeıro Olımpıadasynda 75 kıloda aıqas­qanyńyzdy jurt biledi. Taıaýda Qazaqstan chempıonatynda 81 kıloǵa aýysyp, jańa salmaqta top jardyńyz. Sál árirekte, ıaǵnı 29 qazanda Almatyda ótken kásipqoı boks keshin­de óner kórsettińiz. Qysqa ýaqyttyń ishinde mundaı ózgerister ne úshin qajet boldy? – Rıo Olımpıadasynda jolym bolmaǵannan keıin 81 kıloǵa aýysýǵa bel býdym. Onyń birden-bir sebebi – artyq salmaq qýyp, sharshap qalmaý. Dene kúshi turǵysynda kemshin tustarym bar ekenine qaramastan, durys baǵytty tańdadym dep oılaımyn. Al kásipqoı boksqa kelsek, bul ekinshi josparymnyń alǵashqy sátti qadamy dep bilińizder. – Aıyp etpeńiz, alaıda, «eki kemeniń basyn ustaǵan sýǵa ketedi» degen maqal esime túsip turǵany... – Neni meńzegenińizdi túsindim. Biraq myna zamanda eki keme emes, bes kemeniń tizginin ustaý­ǵa múmkindik bar ekenine kelisersiz. Búgin­de áýesqoıda júrip-aq ARV, WSB jobasynda judyryqtasýǵa ruqsat etilgen. Tipti, osy joly kásipqoılarǵa da tórt jylda bir keletin jahan­dyq oıynnyń joldamasy úlestirilgenin bilesiz. Meniń maqsatym – aldymen Olımpıada chempıony atanyp, keıin kásipqoı boksta atoı salý. – Áýesqoıǵa qaraǵanda, kásipqoı boks­tyń qıyn tustary kóp dep jatady. Buǵan ne deısiz? – Ekeýiniń aıyrmashylyǵy – ýaqytynda. О́zderińiz biletindeı, áýesqoıda úsh raýnd bolsa, kásipqoıda jekpe-jek on eki kezeńge deıin sozyla beredi. Mysaly, Almatyda kolýmbııalyq Mılton Nýnes ekeýmizdiń urysymyz alty raýndqa josparlandy. Biraq men ony alǵashqy kezeńde-aq sulatyp tastadym. Sondyqtanda ázirge eshqandaı qıyndyq kórgenim joq. – Jaqynda álem chempıony Erdos Jańa­bergenov gazetimizge bergen suhbatynda sizdiń myqty ekenińizdi moıyndaǵanymen, búginde 81 kıloda Ádilbek Nııazymbetovke álemde teń keletin bir-eki boksshy bar ekenin aıtyp edi... – Erdos aǵamyz durys aıtypty. Nııazymbetov, sóz joq, myqty boksshy. Syılastyǵymyz óte jaqsy. Ol tájirıbesin bólisýden jalyqqan emes. Sol úshin kóp rahmet aıtamyn. Básekelestik bar jerde, nátıje de bolady. Qaısybirimiz álemde top jarsaq ta, bul eń aldymen qazaq boksynyń abyroıy. Myqtymen teń dárejede bolý ǵanıbet qoı. Men de qarap qalmaıtyn jandardyń birimin. Barlyǵyn ýaqyt kórsetedi. – Sózińizge qaraǵanda, negizgi josparyńyz Tokıo Olımpıadasy sekildi... – Árıne, nıetim de, armanym da sol. Ol kezde naǵyz babymda, 27 jasta bolady ekenmin. Buıyrtsa, Tokıo tórinde Qazaqstannyń gımnin shyrqatamyn degen oıdamyn. – Maqsatyńyz oryndala bersin! Áıtken­men, Tokıodan keıin kásipqoı boksqa ótip jatsańyz, tym kesh bolyp ketpeı me? – 2020 jylǵa deıin shamamen 18-19 kezdesý ótkizip, reıtıngimdi durystap alsam deımin. Ári qaraı myqty promoýterlermen kelisimshartqa otyrsam, qysqa ýaqyttyń ishinde chempıon atanýǵa múmkindik týar edi. – Sizdi Qazaqstan chempıonatynan keıin em-dom qabyldap jatyr dep estidik. Jalpy, qazir jaǵdaıyńyz qalaı? – Pavlodarda ótken el birinshiligi óte joǵary deńgeıde uıymdastyryldy. Barlyq boksshylar úlken jaýapkershilikpen kelipti. О́zim de joǵary deńgeıde judyryqtastym dep oılaımyn. Sońǵy kezde sol qolymnyń bulshyq etteri aýyryp júrgen. Fınalda Nurdáýlet Jarmanov­pen bolǵan aıqastan keıin asqyndyryp al­ǵan sııaqtymyn. Jaqyn kúnderi Máskeýge em qabyldaýǵa baramyz. – О́mirińizde este qalǵan erekshe jekpe-jegińiz qaısy? –  2013 jyly Almat­yda ótken álem chem­pıonatyndaǵy fınaldyq aıqas esten ketpesteı jattalyp qalypty. Meniń qurama músheligine qabyl­danǵanyma 7-8 aı ǵana bolǵanyna qara­mastan, sol jyly Iordanııa astanasy Ammanda ótken Azııa chempıonatynda top jardym. Basqa iri týrnırlerde óner kórsetpegen edim. Sol sebepti, jergilikti jankúıerlerdiń jáne qoldaý kórsetýge kelgen Elbasynyń aldynda qobaljyp, aqtyq synda judyryqtasý qıynǵa soqty. Sol kúni eki qurlyqtyń chempıondary kim myqtyny anyqtaǵan kesh boldy. Eýropa chempıony ırlandııalyq Djeıson Kýıglıdi alǵashqy raýndta nokdaýnǵa túsirgenimmen, qalǵan kezeńde ol kádimgideı qarsylasyp baqty. – Sizge qaı raýndta judyryqtasqan qıyndaý? – Alǵashqy raýnd. Sebebi, qarsylasyńdy zerttep, shabýyl jasaımyn degenshe, óziń de kóp soqqy alyp qalýyń múmkin. Jalpy, soqqy jasaý da, soqqy alý da qıyn ǵoı. Djeb, hýk, apperkotpen jasaǵan ádisteriń dóp tımese, kúsh zaıa ketedi. – Ataǵy jer jarǵan keıbir boksshylardyń áke-sheshesi balasynyń jekpe-jegin qara­maıdy eken. Sizderde bul jaǵy qalaı? – Anamnan góri, ákem meniń jekpe-jekterimdi kórmeıdi. Keıin sosyn «qalaı boldy?» dep surap júredi. – Judyryqty rıngten tys jumsaǵan kezderińiz boldy ma? – Er adam bolǵasyn sondaı kishigirim jaǵdaı­lar oryn alǵanyn moıyndaımyn. Biraq bireýdiń kózin shyǵaryp, basyn jarǵan oqıǵalar bolǵan joq. – Áńgimeńizge rahmet. Áńgimelesken Almas MANAP, «Egemen Qazaqstan» ASTANA