El Táýelsizdiginiń 25 jyldyǵyn merekeleý qarsańynda «QazMunaıGaz» aksıonerlik qoǵamynda saltanatty jıyn ótip, onda kompanııalar toby qyzmetkerleri marapattaldy.
«Aspanda juldyz bitken dabyl qaqty,
Al jerde munaralar shamyn jaqty.
Munaıshynyń tógilgen teri qusap,
Darııalap qara altynnan aǵyp jatty...»
Iá, saltanatty jıyn munaıshylardyń osyndaı rýhty jyrlarymen shymyldyǵyn túrdi. Qara sózdiń qudiretin túsinetin qazaqtyń qara balalary qara altynnyń da qadirin nege bilmesin?! El ekonomıkasynyń kúretamyry sanalatyn basty salanyń basy-qasynda osyndaı qaısar rýhty jastarymyzdyń júrgenine ishteı qýanyp ta, maqtanyp ta turdyq. Tula boıyńdy titirkendirgen rýhty jyrlardy jumysshy-munaıshylardyń jeter jerine jetkize jalyndata oryndaýy mereke qarsańynda onsyz da kóterińki turǵan kóńildi odan saıyn kókke ushyrǵandaı. Táýelsiz eldiń ór ulandarynyń osyndaı asqaq rýhyna tamsanasyń ári rıza bolasyń. Árıne, munyń bári – shırek ǵasyrǵa jetken el Táýelsizdiginiń tartýy, el egemendiginiń erekshe qasıeti, Máńgilik Eldiń maqtanyshy.
Saltanatty jıynnyń ashylýynda «QazMunaıGaz» ulttyq kompanııasynyń basqarma tóraǵasy Saýat Myńbaev jáne osy salanyń qurmetti ardageri Uzaqbaı Qarabalın sóz sóılep, qatysýshylardy aıtýly merekelerimen quttyqtady.
«Mundaı kúnderi bizdiń júregimizdi maqtanysh sezimi kerneıdi jáne Táýelsiz Qazaqstannyń energetıkalyq júıesin qurý baǵytyndaǵy úlken de mańyzdy iske ózimizdiń qatysymyz baryn tereń sezinemiz. Biz jas memleketimizben birge ósip, damyp kelemiz. Búginde «QazMunaıGaz» kompanııalar tobynda 85 myńnan astam adam jumys isteıdi. Olar tabandy eńbegimen táýelsiz Qazaqstannyń ıgiligin molaıtyp kele jatqan munaıshylar men gaz óndirýshiler, óńdeýshiler men barlaýshylar, ózge de aralas kásip ıeleri. Al elimiz álemdik energetıka kartasynan laıyqty ornyn aldy», dedi «QazMunaıGaz» ulttyq kompanııasynyń basqarma tóraǵasy Saýat Myńbaev.
Táýelsizdiktiń shırek ǵasyrynda elimiz munaı jáne gaz kondensaty óndirisin ulǵaıtý arqyly álemdik munaı-gaz salasy «sahnasynan» oıyp turyp oryn aldy. Oǵan dálel, 1991 jyly munaı jáne gaz kondensaty óndirisi 26,6 mln tonnany qurasa, ótken jyly bul kórsetkish 80 mln tonnaǵa deıin jetti. Álbette, jas jáne táýelsiz Qazaqstannyń qazirgi úlken jetistigi óz isine shyn júrekten berilgen, týǵan jerine degen jarqyn bolashaqty armandaǵan alǵashqy izasharlardyń zor talpynysy, eńbekqor jurttyń qajyr-qaıratynsyz múmkin emes edi. Olar egemen elimizdiń munaı-gaz salasynyń damýynyń basty qatysýshylary men alǵashqy kýágerleri. Keshegi saltanatty jıynda mine, osyndaı munaı maıtalmandary marapattalyp, eldiń damýyna qosqan eren eńbekteri elendi.
Marapattalǵandardyń qatarynda «QazMunaıGaz» bıznes baǵytynyń basshylary, «Úzdik maman» jáne úzdik ınnovasııalyq ıdeıalar konkýrsynyń jeńimpazdary, QMG jastar uıymdarynyń belsendileri bar. Olar «Qazaqstan Respýblıkasy Táýelsizdigine 25 jyl» merekelik medaldary, Qazaqstan Respýblıkasy Energetıka mınıstrliginiń, «Samuryq
Qazyna» ulttyq ál-aýqat qory jáne «QazMunaıGaz» UK» AQ qurmet gramotalary jáne alǵys hattaryna ıe boldy.
Jyl boıy «QazMunaıGaz» ulttyq kompanııasy «KAZENERGY» assosıasııasymen birigip respýblıka Táýelsizdiginiń 25 jyldyǵyna arnalǵan «Táýelsiz Qazaqstannyń munaı jáne gazy» atty jobasyn daıyndaǵan eken. Bul jobaǵa el ekonomıkasyndaǵy munaı-gaz salasynyń tarıhı rólin aıqyndaıtyn – munaıdyń memleketimiz úshin mańyzdylyǵyn keleshek urpaqqa jastaıynan túsindirý maqsatynda jazylǵan balalarǵa arnalǵan kitap, sondaı-aq, óz eńbegi arqyly turaqtylyqty saqtap, otanymyzdyń órkendeýine úlesin qosyp otyrǵan qazaqstandyq munaıshylarǵa arnalǵan fotoalbom, sonymen qatar, munaı-gaz ındýstrııasyna úlken úles qosqan adamdardyń tarıhı sátterden aıtqan estelikteri men munaı salasynyń bolashaq damýyna qatysty oılary qamtylǵan fılmder sıkly kiredi.
Saltanatty sharada osy derekti fılmnen úzindi kórsetilip, qatysýshylardy ótkenniń taǵylymyna tamyr tartqyzyp, tarıh tereńine taǵy bir súńgitti. Al shara aıasynda uıymdastyrylǵan «Táýelsiz Qazaqstan munaıy» kórmesine osy jobamen daıyndalǵan albomnyń sýretteri qoıyldy. Iаǵnı, munaı-gaz salasynyń jáne «QazMunaıGaz» ulttyq kompanııasynyń damýyna erekshe úles qosqan munaıshylardyń, munaı-gaz salasynda júrgen túrli mamandyq ıeleriniń portrettik sýretteri kólemdi formatta kórermen nazaryna usynyldy. Bul kórme «Munaı maıtalmandary» dep ataldy.
Dınara BITIKOVA,
«Egemen Qazaqstan»