Bestamaq aýylyndaǵy «Kóktas-Aqtóbe» AQ-qa qarasty «Aq qus» fabrıkasynyń jumys isteı bastaǵanyna on jyldyń júzi boldy. Bul fabrıka Batys óńirindegi broılerlik baǵyttaǵy birden-bir qus fabrıkasy bolyp tabylady. Munda óndirilgen qus eti óz óńirimizge, sondaı-aq, Mańǵystaý, Atyraý jáne Batys Qazaqstan oblystaryna ótkizilip keledi. Taıaý ýaqytta fabrıka qus etin Reseı jáne Qytaı naryǵyna shyǵarýǵa qadam jasaýda. Táýelsizdiktiń 25 jyldyǵy qarsańynda kásiporynda jańa qus soıý sehy paıdalanýǵa berildi. Munyń ózi fabrıkanyń óndiristik qýatyn arttyrýmen birge, qus etin syrtqy naryqqa shyǵarýǵa múmkindik bereri sózsiz.
«Aq qus» fabrıkasyndaǵy jańa qus soıý sehynyń saltanatty ashylýyna arnalǵan jıynda sóz alǵan oblys ákimi Berdibek Saparbaev jańa óndiristik jeliniń paıdalanýǵa berilýimen quttyqtaı kelip, elimizde qus etine degen suranystyń artyp otyrǵanyn jetkizdi.
Jańa sehta 35 jańa jumys orny ashyldy. Jobanyń quny 1440 mıllıon teńge turady. «Aq qus» fabrıkasy basshylarynyń aıtýynsha, jumsalǵan qarjy úsh jyl merzimde óteletin bolady. Fabrıkadaǵy negizgi tehnologııalyq úderisi – ınkýbasııalaý. Aıyna úsh-tórt ret 31 myń jumyrtqa arnaıy shkaftarǵa qoıylady. Ázirge jumyrtqalar Reseıden jetkizilýde. Bul joba ónimniń ózindik qunyn kemitýge qol jetkizedi dep kútilýde.
Jańa sehtyń saltanatty ashylýy barysynda oblys ákimi alǵalyq 15 otbasyna 100 myń, 150 myń, 200 myń teńgeniń sertıfıkattaryn tapsyrdy. Bul qoldaýǵa ıe bolǵandar arasynda «Altyn alqa» ıegeri Aqmaral Qurmanbaeva, múgedektikke ushyraǵan bala baǵyp otyrǵan analar Araılym Ádilhanova men Tatıana Alekseeva, eki bala baǵyp otyrǵan múgedek ana Oksana Mengel, zeınetker ana Marha Barshıgova jáne basqalar bar.
Satybaldy SÁÝIRBAI,
«Egemen Qazaqstan»
Aqtóbe oblysy,
Alǵa aýdany