Memlekettik nagradalar tapsyryldy

Parlament Senatynda Qazaqstan Respýblıkasy Táýelsizdigine 25 jyl tolýyna arnalǵan saltanatty jınalys boldy, dep habarlady Par­lament Senatynyń baspasóz qyzmeti. Palata Tóraǵasy Qasym-Jomart Toqaev óz sózinde Prezıdent Nursultan Nazarbaevtyń parasatty, kóregen basshylyǵymen táýelsiz memleketimizdiń berik negizi qalyptasqanyn jáne onyń búkil álem moıyndaǵan tarıhı derek ekenin atap ótti. «Qysqa merzim ishinde Qazaqstan álem qaýymdastyǵy qur­met­teıtin abyroıly memleket deńgeıine kóte­rildi. Búginde adamzatty alańdatqan eń ózek­ti máseleler boıynsha Qazaqstannyń usta­nymy dúnıe júziniń túkpir-túkpirine belgili. Qazaqstan birligi jarasqan ulttar men ulystardyń beıbitómir súrip jatqan kıeli shańyraǵyna aınaldy», – dedi Tóraǵa. Q.Toqaev dúnıe júzindegi eń damyǵan elderdiń qataryna ený týraly Prezıdenttiń uzaq merzimdi strategııasyn júzege asyrýda, elimizdiń egemendigi men memleketimizdiń qarqyndy damýyn zańnamalyq jaǵynan qamtamasyz etýde Parlamenttiń róli aıryqsha ekenine toqtaldy. Ol Qazaqstannyń ıgiligi jolyndaǵy eren eńbekteri úshin depýtattarǵa rızashylyǵyn bildirdi. Tóraǵa Memleket basshysynyń atynan belsendi memlekettik jáne qoǵamdyq qyzmeti, eldiń áleýmettik-ekonomıkalyq jáne mádenı damýyna, halyqtar arasyndaǵy dostyq pen yntymaqtastyqty nyǵaıtýǵa qosqan eleýli úlesi úshin bir top Senat depýtattaryna memlekettik marapattardy tabys etti. Atap aıtqanda, Bektas Beknazarov, Ikram Adyrbekov jáne Qaırat Ishanov III dárejeli «Barys» ordenimen, Dýlat Qusdáýletov pen Erbolat Muqaev «Parasat» ordenimen, Asqar Beısenbaev pen Lıýdmıla Poltorabatko II dárejeli «Dos­tyq» ordenimen, Olga Perepechına «Qurmet» ordenimen marapattaldy. Senatorlarǵa «Qazaqstan Respýblıkasynyń Táýelsizdigine 25 jyl» mereıtoılyq medali tabys etildi. Depýtattar Bektas Beknazarov, Serik Bilálov, Jabal Erǵalıev, Sergeı Ershov jáne Ańsar Musahanov TMD Parlamentaralyq As­sam­bleıasynyń «Parlamenttik yntymaq­tastyqty nyǵaıtqany úshin» medaline, Rashıt Ákimov, Murat Baqtııaruly, Serik Jaqsybekov, Lázzat Qıynov, Manap Kóbenov, Tóleýbek Muqanov jáne Marat Taǵymov TMD PAA Qurmet gramotasyna ıe boldy. Senatorlar Rashıt Ahmetov pen Aqan Bıjanov UQShU Parlamenttik Assambleıasynyń «UQShU parlamenttik yntymaqtastyǵyn ny­ǵaıtqany úshin» medalimen marapattaldy. Par­la­mentshiler Ertarǵyn Astaev pen Georgıı Kımge UQShU Parlamenttik Assambleıasynyń Qur­met gramotasy tabys etildi. Sondaı-aq, «Egemen Qazaqstan» Respýb­lı­kalyq gazetiniń basshysy Darhan Qydyráli TMD Parlamentaralyq Assambleıasynyń «Baspasóz jáne aqparatty damytýǵa sińirgen eńbegi úshin» belgisimen nagradtaldy.