Reseı prezıdenti Vladımır Pýtın amerıkalyq Forbes jýrnaly jasaǵan jylsaıynǵy reıtıngte osymen tórtinshi ret álemdegi eń yqpaldy saıasatkerlerdiń kóshin bastady. Bıyl ekinshi orynda – AQSh-tyń saılanǵan prezıdenti Donald Tramp, al úshinshi orynda – Germanııanyń federaldyq kansleri Angela Merkel tur, dep jazady DW.
Basylym jazǵandaı, «Reseı prezıdenti jer sharynyń túgelge derlik eline óz yqpalyna kórsete bildi», sonymen birge «Reseıden bastap Sırııaǵa deıin, tipti AQSh-taǵy saılaýda da Pýtın óz qalaýyn oryndady». Reseıdiń 64 jastaǵy basshysy «jahandyq konvensııalar erejelerimen shektelip qalmaıdy, onyń yqpaly sońǵy jyldary arty tústi», delingen basylymda.
Reıtıngte ekinshi oryndy ıelengen Donald Tramp týraly basylym bylaı deıdi: «daý-janjalǵa beıim, Kongrestiń qos palatasyndaǵylardyń basym kópshiligi ony jaqtaıdy, al onyń jeke kapıtaly mıllıardtap esepteledi». Yqpaldy saıasatkerlerdiń 2015 jylǵy reıtınginde Donald Tramp 72 orynda bolǵan.
Al 2016 jyldyń reıtınginde Eýropadaǵy iri ekonomıkany on bir jyldan beri basqaryp kele jatqan jáne 2017 jyly ótetin saılaýda GFR úkimet basshysy taǵyna óz kandıdatýrasyn taǵy usynýdy qup kórgen GFR kansleri Angela Merkel úshinshi orynnan kórindi. Basylym maýsym aıynda Angela Merkeldi álemdegi eń yqpaldy áıel dep ataǵan bolatyn.