Memleket basshysynyń aıtýynsha, búginde Qazaqstan jasandy júrek ornatý jaǵynan álem boıynsha Germanııa men AQSh-tan keıingi úshinshi orynda tur. Osy oraıda Prezıdent otandyq medısınany álemdik deńgeıge kótergen eki qazaqstandyq dárigerdi erekshe atap ótti.
«Bizge jaqyn-alys shet elderden naýqastar kelip jatyr, búırek, baýyr, ókpe, júrek sııaqty aǵza múshelerin transplantasııasyna arnalǵan kúrdeli operasııalardyń bári ózimizde jasalady. Qazir árbir oblys ortalyǵynda júrekke ashyq operasııa jasaıtyn boldy. Osynyń barlyǵy - dárigerlerdiń daıyndyǵy men eń úzdik qondyrǵylardyń arqasy. Qanshama adamnyń ómirin alyp qaldyq. Buryn júrek aýrýlary birinshi orynda turatyn. 10 myń adam kezekte turdy. Ony batysqa baryp, kvota jasap kelýdiń baǵasy, turǵany men júrgenin sanaǵanda, 50-60 myń dollarǵa shyǵatyn. Qazir memleket tarapynan jasalyp jatyr»,- dedi Nursultan Nazarbaev Qazaqstan Táýelsizdiginiń 25 jyldyǵyna arnalǵan saltanatty jıynda.
«Elimizdiń medısınasyn álemdik deńgeıge kótergen eki dáriger bar. Olar - Iýrııa Pıa jáne Serik Aqsholaqov. Ekeýi de kúrdeli zertteýler jasap, tyń jańalyqtar ákeldi. Otandyq medısınany álemge tanytty. Olardyń bireýi keshe ǵana qıyn bir operasııa jasap, bala men onyń anasyn qutqaryp qaldy. Sondyqtan ekeýine de «Eńbek Eri» ataǵyn bergenim durys boldy dep sanaımyn», - dep atap kórsetti Nazarbaev.