El táýelsizdiginiń 25 jyldyǵyn merekeleý qarsańynda belgili saıasatker, senator, saıası ǵylymdar doktory Aqan Bıjanovtyń «Ýrokı epohı» atty kitaby jaryq kórdi. Bul eńbekke Qazaqstan Respýblıkasynyń Tuńǵysh Prezıdenti, Elbasy N.Á.Nazarbaevtyń shırek ǵasyr ishinde memlekettilikti qalyptastyrýdaǵy tarıhı róli, memlekettik jáne áleýmettik-saıası qurylys máseleleri arqaý bolǵan.
Kitaptyń birinshi taraýynda toptastyrylǵan materıaldarda búkil álemge «qazaqstandyq damý joly» degen atpen tanylǵan memlekettilik ornatý úderisteri jaıynda egjeı-tegjeıli baıandalady. Avtor óz eńbeginde bıik belesterge bastaǵan damýdyń osy úlgisi Elbasynyń strategııalyq kóregendiginiń jáne saıası kóshbasshylyǵynyń jemisi ekendigin atap ótedi.
Qazaqstandaǵy parlamentarızm ınstıtýtyna arnalǵan ekinshi taraý teorııalyq jáne tanymdyq turǵydan óte tartymdy. Aqan Qusaıynuly qazirgi otandyq parlamentarızmniń tarıhı tamyrlaryn ashyp kórsetedi, onyń búgingi jaı-kúıine, damý perspektıvalaryna, parlamentarızmniń qoǵam ómirindegi róline taldaý jasaıdy, parlamenttik dıplomatııanyń negizgi baǵyttary týraly baıandaıdy.
Úshinshi taraýda avtordyń is ústindegi saıasatker ári zań shyǵarýǵa tikeleı qatysy bar depýtat retinde ózi etene aralasyp kele jatqan áleýmettik-ekonomıkalyq saıasattyń ózekti máselelerine baılanysty ustanymdary kórinis tapqan. Bul rette reformalardyń áleýmettik-saıası qyrlary, memlekettiń, bıznestiń jáne azamattyq qoǵamnyń ózara baılanysynyń máseleleri, Mádenı saıasat tujyrymdamasy, azamattardyń rýhanı tárbıesi sııaqty problemalar tilge tıek etilgen. Osy irgeli taqyryptar avtor ózi erekshe sezimmen qaraıtyn Almaty qalasynyń tarıhy men damý joldarymen úılestirilgen.
Tutastaı alǵanda, kitap taldamalyq-taǵylymdyq, qoldanbaly jáne ǵylymı sıpatta jazylǵan. Maqalalarda táýelsiz Qazaqstannyń jańa tarıhyndaǵy barlyq kezeńder, san qyrly, kúrdeli áleýmettik-saıası, ǵylymı-mádenı jáne quqyqtyq úderister qamtylǵan. Avtor Prezıdent N.Á.Nazarbaevtyń salmaqty da salıqaly basshylyǵymen tabysty júzege asyp otyrǵan áleýmettik jáne memlekettik qurylystyń erekshelikterin ashyp kórsetip, Qazaqstannyń ózindik kelbetin aıqyndaıtyn prezıdenttik baǵdar turǵysynan budan bylaıǵy damý baǵyttaryna toqtalady.
Jalpy alǵanda, kitap qalyń oqyrmanǵa, sarapshy-ǵylymı jurtshylyqqa jáne memlekettik qyzmetshilerge, táýelsiz Qazaqstannyń saıası tarıhy qyzyqtyratyn barsha qaýymǵa arnalǵan.
Jaqsybaı SAMRAT,
«Egemen Qazaqstan»