Memleket basshysy Nursultan Nazarbaev Qazaqstan Respýblıkasy Táýelsizdiginiń 25 jyldyǵyna arnalǵan «Jetistikter men jeńisterdiń 25 jyly» atty merekelik konsertke qatysty, dep habarlady Prezıdenttiń baspasóz qyzmeti.
Konsertte qazaqtyń halyq ánderi men bılerinen bastap, álemdik klassıka týyndylaryna deıingi túrli janr kórermen nazaryna usynyldy.
Merekelik keshke álemdik sahna tórinde elimizdiń atyn áıgilep júrgen Qazaqstannyń betkeustar óner maıtalmandary qatysty. Atap aıtqanda, olardyń arasynda Aıman Musaqojaeva, Álibek Dinishev, Roza Rymbaeva, Bekbolat Tileýhan, Maıra Muhamedqyzy, sondaı-aq «Astana Opera» opera jáne balet teatrynyń, Abaı atyndaǵy Qazaq memlekettik akademııalyq opera jáne balet teatrynyń, «Astana Balet» teatrynyń shyǵarmashylyq toptary bar.
Urpaqtar sabaqtastyǵynyń sımvoly retinde elimizdiń bir top talantty jas mýzykanttary, halyqaralyq konkýrstardyń laýreattary, Qazaq ulttyq horeografııa akademııasy men T.Júrgenov atyndaǵy Qazaq ulttyq óner akademııasynyń stýdentteri, túrli óńirlerden kelgen bı ansamblderi de sahna tórinde óz ónerlerin kórsetti.