Qazaqstan Prezıdenti Nursultan Nazarbaev pen Reseı Federasııasynyń basshysy Vladımır Pýtın Sankt-Peterborda ekijaqty jáne halyqaralyq ózekti máselelerdi talqylamaq. Bul týraly Kremldiń resmı saıtynda habarlandy. Kezdesý 2016 jyldyń 26 jeltoqsanynda ótetin Joǵary Eýrazııalyq ekonomıkalyq keńesi (JEEK) men Ujymdyq qaýipsizdik keńesi sessııasynyń otyrystary qarsańynda ótetin bolady.
Sondaı-aq JEEK kezdesýi barysynda Qazaqstan, Armenııa, Belarýs, Qyrǵyzstan jáne Reseı basshylary Eýrazııalyq ekonomıkalyq odaǵynyń alǵashqy ekijyldyq jumysynyń qorytyndysyn shyǵaryp, ıntegrasııalyq birlestikti odan ary damytý boıynsha baǵyt-baǵdarlardy aıqyndaıtyn bolady. Sammıttiń basty sharalarynyń biri qol qoıý kútilip otyrǵan EAEO-niń Keden kodeksi týraly kelisimshart bolmaq. Sonymen qatar birqatar ózge de mańyzdy kópjaqty qujattardyń qabyldanýy josparlanǵan.
Memleket basshylary Odaqtyń 2017 jylǵy halyqaralyq qyzmetiniń negizgi baǵyttaryn bekitip, Eýrazııalyq odaqtyń basty saýda-ekonomıkalyq seriktesterimen yqpaldastyǵynyń túrli aspektilerin talqylaıtyn bolady. Ujymdyq qaýipsizdik týraly shart uıymy (UQShU) otyrysynyń sheńberinde Qazaqstan, Armenııa, Belarýs, Qyrǵyzstan, Tájikstan jáne Reseı kóshbasshylary Uıym aıasyndaǵy odaqtyq ózara árekettestiktiń ózekti salalaryn, onyń aǵymdaǵy qyzmetin qamtamasyz etý máselelerin kóteredi. Lańkestik jáne ekstremıstik qaýip-qaterlerge qarsy turý, esirtki men qarý-jaraqtyń zańsyz aınalymymen kúres taqyryptaryn qosa alǵanda, jahandyq jáne óńirlik kún tártibindegi basty máseleler boıynsha pikir almasý josparlanýda.
«JEEK pen UQShU otyrystary qarsańynda Qazaqstan Prezıdenti Nursultan Nazarbaev jumys saparymen Sankt-Peterbor qalasyna keledi. Reseı jáne Qazaqstan basshylary ekijaqty jáne halyqaralyq ózekti máselelerdi talqylaıtyn bolady», - delingen Kreml taratqan habarlamada.