Ulttyq ekonomıka mınıstri Qýandyq Bıshimbaev Úkimet otyrysy barysynda elimizdiń 11 aıy ishindegi áleýmettik-ekonomıkalyq damý qorytyndylary týraly málimdedi.
«Qańtar-qarasha aılarynda ekonomıka ósiminiń 0,8% jyldamdaýy baıqaldy, bul qańtar-qazan aılarymen salystyrǵanda 0,2% artyq. Taýarlar óndirisiniń ósimi 0,9%, qyzmetter ósimi – 0,6%, ónimderge salyq – 2,4%», – dedi Bıshimbaev.
«Bul oń betalystyń ekonomıkany ártaraptandyrý, ınfraqurylymdy, kásipkerlikti, AО́K damytý boıynsha baǵdarlamalar men josparlardy, sonymen qatar jumyspen qamtý sharalaryn júzege asyrýdyń arqasynda qamtamasyz etildi», – dep atap ótti.
Mınıstr elde iskerlik jáne ınvestısııalyq belsendiliktiń saqtalyp otyrǵanyn, qarjylyq naryqtaǵy jaǵdaıdyń turaqty ekenin atap ótti. 11 aıdyń qorytyndylary boıynsha ekonomıka ósiminiń basty qozǵaýshy kúshterine qurylys (ósim 7,5%), aýyl sharýashylyǵy (4,5%), kólik (3,8%), óńdeý ónerkásibi (0,5%) tárizdi sektorlar aınaldy
«О́nerkásipte oń betalystar baıqalady. Qarasha aıynda qazan aıymen salystyrǵanda ónerkásiptegi ósim 4% qurady, al ótken jyldyń qarasha aıymen 1,1% boldy. О́nerkásiptegi ósimniń negizgi kózderine óńdeý ónerkásibindegi ósimniń ozyq qarqyny aınaldy, ol taý-ken ónerkásibinen joǵary boldy», – dedi Bıshimbaev.
11 aı ishinde óńdeý ónerkásibinde metallýrgııa óniminiń óndirisi – 6,8%, azyq-túlik ónimderi – 3,8%, farmasevtıkalyq ónim – 2,8%, koks pen munaı ónimderi – 0,3%.
О́tken jyldyń osy kezeńimen salystyrǵanda óndiristiń tómendeýine qaramastan, mashına jasaýda qarasha aıynda qazan aıymen salystyrǵanda 12,6% ósim baıqalady. Taý-ken ónerkásibinde munaı, kómir, temir rýdasyn alýda dınamıka jaqsarady. Qarasha aıynda munaı alý ósimi 2015 jyldyń qarasha aıymen salystyrǵanda 3% qurady. Nátıjesinde, 11 aı ishinde ony óndirý boıynsha jospardy asyra oryndaý 2,4% qamtamasyz etildi. Josparda 69,2 mln tonna bolǵanda, 70,8 mln tonna munaı alyndy.
«О́simniń basty faktory qyrkúıek aıynda Qashaǵan ken ornynyń iske qosylýy boldy. Bul táýligine 75 myń barrelel kóleminde munaıdyń qosymsha óndirilýin qamtamasyz etti», - dedi mınıstr.
Arnur Asqarov, «Egemen Qazaqstan»